Galaad kãng tom-paga roga kamb a taaba, kom-dibli la kom-pugli. La b sẽn waa n bɩ b riga a Zɛfte. B yeel-a lame: «Fo kõn naag tõnd n dɩ d ba paoong ye tɩ f yaa pag a to biiga.»
Amonitsa dĩma leoka a Zɛfte sẽn tʋm b rãmbã: «Ade, a Israyɛl sẽn yi Ezipt tẽnga, a waa n deega m soolem. Yɩɩ Arno kʋɩlga n ta Yabok la Zʋrdẽ. Lebs maam m soolem tɩ ket n maasa.»
B A Israyɛl zĩnda be n tʋm tɩ b yeel Edom dĩma: ‹Kabr tɩ m bʋdg f soolma n looge.› La Edom dĩma pa kelg-a ye. A toola Moab dĩma nengẽ la yẽ me ka sak ye. Dẽ la a Israyɛl kong n pa Kadɛs.
Dẽ poore b pãrga we-raoogã n gil Edom ne Moab tẽn-peelem n wa Moab yaanga. B wẽ-la b sika Arno kʋɩlga rʋʋre, la b pa kẽ Moabitsa tẽngẽ tɩ Arno kʋɩlga la a toaaga.
Ya yʋʋm kobs-tã marsã la Israyɛl kamba kẽed Esbõ la Aroɛr ne b tẽn-toose, n paas tẽns nins sẽn be Arno kʋɩlga noorã, bõe tɩ ta rũnna tɩ y ka rig-ba n yiisi?
A Zɛfte sẽn wa n lɛɛg n wat Mispa, a tẽngẽ, yaa yẽ meng bi-pugl n yi n seg-a ne gãngãoog bila la a saoodẽ. Da yaa a bi-yende, a ka paam biig a to, pag bɩ raoa sã ka yẽnda a ye tãa.
A Zɛfte sẽn yãend-a, a kẽesa a fut n yetẽ: «M biiga, f kẽes-m-la yell sẽn ka be tɩɩm, fo waa n tʋʋg-m-la zu-beedo! M goma wʋsg Naaba-Wẽnd taoore, m pʋlma Wẽnd la m ka le tõe n lebs m zelemd ye.»
La bi-pugla yeel-a lame: «M ba sõngo, yãmb pʋlma Wẽnde, yãmb goma wʋsg Naaba-Wẽnd taoore, bɩ y maan wa y sẽn yeele. Soaala sõng-y lame tɩ y rok y sũur ne y bɛɛba, ne Amoritsã.»
A le paasame: «Ad-m sẽn kot y bũmb ninga: Bas-y-m ne m meng kiis a yiibu. M na rʋ n yeeb tãmsã zut ne m tũud-n-taase n yãb m sẽn na n kong rogem sũ-noogã.»