×

Ika Bible 2018

Ndị Han Eṅẹn 12

1
Jẹfta e mẹrigụ ndị Amọnụ, ndị Ifrem nọ kpọ ndị agha wẹ, fetu, bịa Zafọnụ, sị Jẹfta, “Kị haịn i gi jẹn d'a lụsọn ndị Amọnụ agha bụ y'a kpọrịnị ẹnyi? Ẹnyi jẹnkọ d'a kpọ ụlọ ị ọkụn ebe ị rị imẹ ẹ!”
2
Jẹfta nọ sị wẹ, “Ogẹn ndị Amọnụ gi rị e busọn mmẹ lẹ ndị nke m agha, a kpọ m ụnụ, ụnụ azụọpụhanị m ẹka wẹ.
3
Ogẹn m gi hụn a nị ụnụ eyekọnị m ẹka, m nọ be isi ye ọb'ẹka, fetu d'a lụsọn ndị Amọnụ ọgụn, Osolobuẹ nọ we wẹ ye m mẹri. Kị ụnụ bịanị nwan d'a lụsọn m ọgụn tannị?”
4
Ya Jẹfta nọ kpọkwama ikẹnnyẹ Gilẹdị d'a lụsọn ndị Ifrem ọgụn. Ndị Gilẹdị nọ gbumẹ wẹ, makẹni ndị Ifrem rị a kpari wẹ, sị, “Ndị gbapụnị kẹ ụnụ wụ, ụnụ gha Ifrem lẹ Manasẹ gbapụ.”
5
Ndị Gilẹdị nọ nọkin ebe wẹ gha e fetu iyi Jọdanị e shi Ifrem. Onyẹ Ifrem ọwụlẹ họdụnị sị, “Nị m fetu,” ndị Gilẹdị a sị a, “Ị wụ onyẹ Ifrem?” Ọ sị, “Mba,”
6
a sị w'a, “Ọ hụghọ mma; sị, ‘Shibolẹti.’ ” Ọ sị, “Sibolẹti,” makẹni ọ sanị ẹka kpọ a ọhụnma, e kwọndọn w'ẹ, gbu ẹ tọ ebẹhụ wẹ gha e fetu iyi Jọdanị. Ndị Ifrem wẹ gbu ogẹn ahụn rị mmadụ nnụ-uku ẹbụọ kwasị ọgụn ẹbụọ (42,000).
7
Ahụa isin kẹ Jẹfta hannị Izrẹlụ eṅẹn, du wẹ. Omẹgụ, ọ nọ nwụnhụn, wẹ nọ li ẹ ye obodo ohu rị Gilẹdị.
8
Ogẹn Jẹfta gi nwụnhụngụ, Ib'zanị onyẹ Bẹt'lẹhẹm nọ a hanmanị Izrẹlụ eṅẹn, dumẹ wẹ.
9
Ikẹnnyẹ iri kwasị ọgụn lẹ ikpoho iri kwasị ọgụn k'ọ mụ. O we ụmụ a ikpoho ye ndị wụlẹni ndị ebọn ẹ lụrụ, gha ebọn ọzọ wẹhẹni ụmụ a ikẹnnyẹ ikpoho iri kwasị ọgụn lụrụ. Ahụa ẹsa kẹ Ib'zanị du Izrẹlụ hannị wẹ eṅẹn;
10
ọ nọ nwụnhụn, wẹ nọ li ẹ ye Bẹt'lẹhẹm.
11
Ib'zanị a nwụnhụngụ, Ẹlọnụ onyẹ ebọn Zẹbulọnụ nọ du Izrẹlụ ahụa iri, a hannị wẹ eṅẹn.
12
Omẹgụ, Ẹlọnụ nọ nwụnhụn, wẹ nọ li ẹ ye Aịjalọnụ hụn rị alị Zẹbulọnụ.
13
Ẹlọnụ a nwụnhụngụ, Ab'dọnụ nwa Hilẹlụ, onyẹ Piratọnụ nọ du Izrẹlụ, a hannị wẹ eṅẹn.
14
Ikẹnnyẹ ọgụn ẹbụọ lẹ ụmụ-ụmụ iri kwasị ọgụn wụ ikẹnnyẹ k'ọ mụ. W'e nyin jaki iri kwasị ọgụn ẹtọ. Ahụa ẹsatọ k'o hannị Izrẹlụ eṅẹn, du wẹ.
15
Omẹgụ Ab'dọnụ nwa Hilẹlụ nọ nwụnhụn, wẹ nọ li ẹ ye Piratọnụ hụn rị Ifrem imẹ alị ugu ndị Amalẹki.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes