Ya okpoho hụ nọ jẹn d'a gwa di ẹ, sị, “Okẹnnyẹ ohu Chuku zihẹ bịa d'e kunrun m! Ọ nọ kẹ mmọn-ozi Chuku! Ọ tụka m egun. Ajụnị m'a ebe ọ gha bịa; ọ gwanị m ẹfan a.
Kanị, ọ sị m, ‘Lee ẹ, i jẹnkọ d'a tụ imẹ, mụ okẹnnyẹ. Aralẹ nwan manya ọwụlẹ: kẹ manya a tụnị kẹ hụn ghalẹni a tụ; erilẹ ihiẹn ọwụlẹ Iwu sị w'e rilẹ. Makẹni, nwata hụ sikọ d'a gha ebe wẹ nọ mụ a wụrụ nazịraịtị wẹ gi kwanị Osolobuẹ ọkwụkwa pụ-ichẹn o we nwụn.’ ”
Mmọn-ozi Osolobuẹ nọ sị Manụa, “Ọsụọn'a y'a anịnị m la, ẹlẹ m k'e ri ihiẹn-oriri i ọwụlẹ. Kanị, omẹni i sikọ d'a chụn ẹjan w'a dụn ọkụn, chụn a nwan yeni Osolobuẹ.” Manụa amarịn nị mmọn-ozi Osolobuẹ rọ.
Manụa e weri nwa-ewu lẹ oyiye-ọka, gi wẹ chụnyeni Osolobuẹ ẹjan elu ọmụma. Ya kẹ Osolobuẹ nọ mẹ ihiẹn a tụ ẹnya, ebahụn Manụa lẹ nwunyẹ rị e lee ẹjan hụ wẹ chụnye:
Kanị, nwunyẹ ẹ nọ sị a, “Omẹni Osolobuẹ chọ n'o gbu ẹnyi, o ke narịn ẹnyi ẹjan ẹnyi gi ọkụn ye ẹ lẹ oyiye-ọka ẹnyi ye ẹ; o ke ghọsị ẹnyi ihiẹn ndịnị mọbụ gwa ẹnyi ihiẹnni ọ gwa ẹnyi.”