Mmọn Osolobuẹ nọ gi ikẹn ban imẹ Samsịn, nke wụnị o gi ẹka mmaka dọwa ẹwọrọ hụ ẹbụọ, nọkẹsị nwa-ewu k'ọ dọwa. Kanị, ọ gwanị nẹdi ẹ lẹ nnẹ ẹ ihiẹn o mẹ.
Ọ nọ gi ẹka gwọrị a, rakọ a, jẹnkọ. Ogẹn o gi kunrun nẹdi ẹ lẹ nnẹ ẹ, ọ nọ yebeye wẹ, wẹ nwẹn nọ ra. Kanị ọ gwanị wẹ nị imẹ ozun ẹwọrọ k'ọ gha gwọrị ya wụ mirin-ẹnwụn.
Samsịn nọ sị wẹ, “Nị m tụnị ụnụ ilu ụnụ jẹnkọ d'a shịa m. Ụnụ sa ẹka shịa m'a imẹ akp'ọhịn ẹsanị oririni k'a nọ, e ye m ụnụ ẹwuru linẹni iri kwasị ọgụn tueni lẹ ẹwuru iri kwasị ọgụn ọzọ.
Kanị, omẹni ụnụ asanị ẹka kọwa a, ya wụ nị ụnụ k'e yerịrị m ẹwuru linẹni iri kwasị ọgụn tueni lẹ ẹkwa iri kwasị ọgụn ọzọ.” Ya wẹ nọ sị a, “Gwa ẹnyi ilu i.”
Hụn mẹ akpọhịn ẹnọ, wẹ nọ sị nwunyẹ Samsịn, “Rẹrẹkwọ di i n'ọ gwa ẹnyi azịza ilu hụ; ị jụ, ẹnyi e gi ọkụn dụngbu ịyụ lẹ ndị rị iwe nẹdi i. Ụnụ kpọha ẹnyi ebeni d'e rigbudẹ ẹnyi ra?!”
Ya nwunyẹ Samsịn nọ bịa d'a kwan ẹkwan ye ẹ olu, sị, “Ize m rị e ze i! Ihiẹn m asụọn'ị kaka! Y'a gwagụọ ndị nke m ilu wẹ k'a shịa ị, bụ y'a gwanị m azịza a!” Samsịn nọ sị a, “Agwadẹni m nẹdi m mọbụ nnẹ m. Kị m'a gwan'ị y'a?”
Ọ nọ kwan ẹkwan ye ẹ olu d'e ru hụn mẹ akp'ọhịn ẹsa oriri hụ. Hụn mẹ ẹ akpọhịn ẹsa, Samsịn nọ gwa a azịza a makẹni ọ rị e ye Samsịn nsọngbu, a jụ a ọjụjụ-ọjụjụ. Ya nwẹn nọ gwa ndị nke ẹ ya.
Anwụn gini d'a rọ nke akpọhịn ẹsa hụ, ikẹnnyẹ obodo hụ nọ sị Samsịn, “Kị ka mirin-ẹnwụn a sụọ? Kị ka ẹwọrọ e ze?” Ya Samsịn nọ sị wẹ, “Omẹni ẹlẹ hụn ụnụ limẹ ewu m imẹ rị e mẹ, ụnụ e ke saẹka shịa m ilu m.”
Ya Mmọn Osolobuẹ nọ ban imẹ Samsịn. Ọ nọ shi obodo wẹ ọzọ wụ Ash'kẹlọnụ, gbu ikẹnnyẹ Ash'kẹlọnụ iri kwasị ọgụn, kwarị ihiẹn wẹ, we ẹkwa wẹ ye ndị shịa a ilu hụ. Ọ nọ gi olulu la iwe nẹdi ẹ.