|
| 1 |
|
| Kè chi̍t tōaⁿ sî-kan, kàu koah be̍h-á ê sî, Chham-sun tòa chi̍t chiah soaⁿ-iûⁿ-á khì chhē i ê bó͘. I tùi i ê tiūⁿ-lâng kóng, “Góa beh ji̍p-khì pâng-keng chhē goán bó͘.” I ê tiūⁿ-lâng m̄-chún i ji̍p--khì. |
|
| 2 |
|
| Tiūⁿ-lâng kóng, “Góa siūⁿ lí chiok chhoeh--i, só͘-í góa chiong i kè hō͘ lí ê phōaⁿ-chhōa--ê. I ê sió-bē pí i khah súi, lí thang chhōa i.” |
|
| 3 |
|
| Chham-sun kā in kóng, “Chit-piàn góa ū chèng-tong ê lí-iû tùi-hù Hui-lī-sū -lâng.” |
|
| 4 |
|
| Chham-sun chiū khì lia̍h saⁿ-pah chiah hô͘-lî, chiong in nn̄g-chiah nn̄g-chiah ê bé pa̍k chòe-hé, koh chiong hé-pé pa̍k tī hô͘-lî-bé ê tiong-kan. |
|
| 5 |
|
| I chiong hé-pé tiám-to̍h, pàng hô͘-lî ji̍p-khì Hui-lī-sū -lâng ê be̍h-hn̂g, chiong koah hó chhāi tī hia, kap iáu-bē koah ê be̍h-á lóng sio-liáu-liáu, liân phû-tô-hn̂g kap kaⁿ-ná-chhiū mā lóng sio--khì. |
|
| 6 |
|
| Hui-lī-sū -lâng kóng, “Che sī siáⁿ-lâng chòe--ê?” Ū lâng kóng, “Sī Têng-ná -lâng ê kiáⁿ-sài Chham-sun, in-ūi i ê tiūⁿ-lâng chiong i ê bó͘ kè hō͘ i ê phōaⁿ-chhōa--ê.” Hui-lī-sū -lâng chiū khì pàng-hé sio hit-ê hū-jîn-lâng kap i ê lāu-pē. |
|
| 7 |
|
| Chham-sun tùi Hui-lī-sū -lâng kóng, “Lín kì-jiân chòe chit-khoán tāi-chì, góa it-tēng beh pò-siû, m̄ pàng lín soah.” |
|
| 8 |
|
| Chham-sun chiū chhut tāng-chhiú kong-kek in, thâi-sí chin chōe lâng. Āu-lâi, i lo̍h-khì tòa tī Í-thán ê chio̍h-tōng lāi. |
|
| 9 |
|
| Hui-lī-sū -lâng khì chat-iâⁿ tī Iû-tāi, tī Lī-hi pâi-tīn. |
|
| 10 |
|
| Iû-tāi -lâng kóng, “Lín sī-án-chóaⁿ chiūⁿ-lâi kong-kek goán?” In kóng, “Goán lâi sī beh lia̍h Chham-sun; i án-chóaⁿ tùi-thāi goán, goán mā beh án-ni tùi-thāi i.” |
|
| 11 |
|
| Tùi án-ni, saⁿ-chheng ê Iû-tāi -lâng chiū khì Í-thán ê chio̍h-tōng hia, kā Chham-sun kóng, “Lí kiám m̄ chai Hui-lī-sū -lâng ap-chè lán? Lí ná kā goán jiá chiah tōa ê mâ-hoân?” Chham-sun ìn kóng, “In án-chóaⁿ tùi-thāi góa, góa mā án-ni tùi-thāi in.” |
|
| 12 |
|
| Iû-tāi -lâng kā i kóng, “Goán lâi beh kā lí pa̍k khí-lâi kau hō͘ Hui-lī-sū -lâng.” Chham-sun kā in kóng, “Lín tio̍h chiù-chōa, lín bōe hāi góa.” |
|
| 13 |
|
| In tùi i kóng, “Goán it-tēng bōe hāi lí, kan-ta beh kā lí pa̍k khí-lâi kau hō͘ Hui-lī-sū -lâng.” In chiū ēng nn̄g tiâu sin ê soh pa̍k Chham-sun, tùi chio̍h-tōng kā i tòa--chhut-lâi. |
|
| 14 |
|
| Chham-sun kàu Lī-hi; Hui-lī-sū -lâng chiū kiâⁿ óa--khì, tùi i tōa-siaⁿ hoah. Siōng Chú ê sîn tōa-tōa chhiong-móa i, pa̍k i ê chhiú ê soh chiū chhin-chhiūⁿ hé sio--kè ê môa-soh, tùi i ê chhiú lak--lo̍h-khì. |
|
| 15 |
|
| I khòaⁿ-tio̍h chi̍t tè iáu-bē ta ê lû-á ê chhùi-phóe-kut, chiū khioh--khí-lâi, ēng lâi phah-sí chi̍t-chheng lâng. |
|
| 16 |
|
| Chham-sun kóng, “Góa ēng lû ê chhùi-phóe-kut phah-sí chi̍t-chheng lâng; góa ēng lû ê chhùi-phóe-kut phah-sí lâng, chi̍t-tui koh chi̍t-tui.” |
|
| 17 |
|
| Kóng soah, chiū chiong chhiú--ni̍h ê chhùi-phóe-kut hiat-ka̍k; hit só͘-chāi chiū kiò-chòe La-boa̍t Lī-hi. |
|
| 18 |
|
| Chham-sun hui-siông chhùi-ta, chiū kiû-kiò Siōng Chú kóng, “Lí kì-jiân hō͘ lí ê po̍k-jîn tōa sèng-lī, ná thang hō͘ góa chhùi-ta kah beh sí, hō͘ bô siū kat-lé ê lâng lia̍h--khì?” |
|
| 19 |
|
| Siōng-tè chiū hō͘ Lī-hi lap-o ê só͘-chāi li̍h--khui, chúi tùi hia chhèng--chhut-lâi. Chham-sun lim-liáu, goân-khì hôe-ho̍k; hit-ê chúi-chôaⁿ chiū kiò-chòe Ún Hap-ko-lī, kàu kin-á-ji̍t iáu tī Lī-hi. |
|
| 20 |
|
| Í-sek-lia̍t -lâng hō͘ Hui-lī-sū -lâng ap-chè ê sî, Chham-sun chòe sū-su jī-cha̍p nî. |
|
|
|
|