1
O mẹgụ, ogẹn wẹ gi e be ọka-witi, Samsịn nọ weri nwa-ewu jẹnmẹ d'a hụn nwunyẹ ẹ. O ru ebẹhụ, ọ nọ sị, “M jẹnkọ mmughẹ nwunyẹ m.” Kanị nẹdi nwunyẹ ẹ anịn'a banye.
2
Ọ sị Samsịn, “M te roni ize ẹ a bancharịngụọ ị, ya m nọ we ẹ ye ọwụ ị. Gwẹrụ gi nwẹnẹ ẹ hụn nta nọkin ẹnya a, nị ịya kad'a nwan mma a ma.”
3
Samsịn nọ sị wẹ, “Ndị Filistia a malẹ nwan enwẹn wẹ ikpe; onwọnzini nwan ihiẹn w'e gi kọrịanị m ihiẹn ile m jẹnkọ nwan d'e mẹ wẹ.”
4
Ya ọ nọ pụ, jẹn d'a nwụnrụn ufu ọgụn mmisẹn, kẹngbama wẹ ẹbụọ-ẹbụọ ọdụndụn, kẹnsọnmẹ ọwa ye wẹ ọdụndụn ndị hụ o kẹngbama,
5
mụ ọkụn ye ọwa ndị hụ, ha ufu ndị hụ ye alị ọka-witi ndị Filistia. Ọ nọ dụnpụchanrịn ọka-witi wẹ ọkụn — kẹ ndị wẹ betọgụ kẹ ndị turuni, kẹ alị vaịnị wẹ kẹ alị olivu wẹ.
6
Ndị Filistia a jụma, “Onyẹ mẹ ihiẹnni?” Wẹ nọ sị wẹ, “Samsịn, ọgọ onyẹ Timna rọ, makẹni wẹ we nwunyẹ ẹ ye ọwụ a lụrụ.” Ya ndị Filistia nọ jẹn d'a dụnpụ okpoho hụ lẹ nẹdi ẹ ọkụn.
7
Ya Samsịn nọ sị wẹ, “Hụnnị ụnụ mẹ ihiẹnni, akụsịkọ m d'e ru nị e mẹgwarịgụ m ụnụ.”
8
Ya ọ nọ gi iwe maye wẹ ọgụn, gbu ndị bu ọda. Ya ọ nọ jẹn d'a nọdị imẹ okporo rị imẹ ọmụma hụ rị Ẹtam.
9
Ya ndị Filistia nọ bịa Juda ebẹhụ d'e weri ọnọdị agha, gha ebẹhụ bịa d'a maye obodo Lehi.
10
Ndị Juda nọ jụma ndị Filistia, “Kị ụnụ bịanị d'a maye ẹnyi ọgụn?” Ndị Filistia nọ sị, “Ẹnyi bịa d'a nwụnrụn Samsịn, nị ẹnyi d'e mẹ ẹ ihiẹn o mẹ ẹnyi.”
11
Ya ikẹnnyẹ Juda nnụ-uku ẹtọ nọ jẹn okporo ahụn rị ọmụma Ẹtam, sị Samsịn, “Y'a marịn nị ndị Filistia rị a kị ẹnyi? Kị wụ ihiẹnni ị rị e mẹ ẹnyi?” Samsịn nọ sị, “Ihiẹn wẹ nwẹn mẹ m kẹ m mẹgwarị wẹ hụ.”
12
Wẹ nọ sị a, “Ẹnyi bịa d'e kẹnmẹrin i, nị ẹnyi we i ye ndị Filistia.” Samsịn nọ sị wẹ, “Kuni ni m ẹfan Osolobuẹ nị ụnụ e gikọ ẹka ụnụ gbu m.”
13
Wẹ nọ sị, “Ẹnyi k'e kẹnmẹ i weye ndị Filistia. Ẹnyi egbukọ ị.” Ya wẹ nọ gi eriri ọhụn ẹbụọ kẹnmẹ ẹ, gha imẹ ọmụma hụ wepụha a.
14
O rumẹ ẹhụ Lehi, ndị Filistia nọ zụnhan, yila oro d'a maye ẹ. Ya Mmọn Osolobuẹ nọ ban imẹ ẹ, eriri ndị rị a ẹka nọ rị kẹ ụdọ ọkụn rẹn, gha ẹka a danpụsọnmẹ.
15
Ọ hụn ọkpụkpụ agban jaki oyiyi ebẹhụ, ọ nọ tịnpụ ẹka weri ẹ, gi ẹ gbu ndị Filistia nnụ-uku (1,000).
16
Samsịn nọ sị, “E gigụọ m agban jaki gbu wẹ kịtọ ikpọn! E gigụọ m agban jaki gbu ikẹnnyẹ nnụ-uku.”
17
Ogẹn o gi kugụ, ọ nọ tuhu agban jaki hụ, Ọ nọ kpọ ebẹhụ Ramatị Lehi (hụn wụ Ugu Ọkpụkpụ-agban.)
18
Ẹgụn mirin rị a gụn a ọda-ọda, ya ọ nọ kpọku Osolobuẹ, sị, “Y'e gigụọ odibo i mẹri okẹn mmẹrini. Nị ẹgụn mirin gbu m nwan, a danye m ẹka ndịnị ghalẹni e fe i?”
19
Ya Osolobuẹ nọ kpupụ alị ebẹhụ mgbugbu shịanị rị imẹ Lehi, mirin nọ gha a hupụha. Samsịn a ragụ, ndụn nọ ban a, ọ tụlụa. Ya wẹ nọ kpọ mirin ahụn, Ẹn-Hakore hụn wụ “Mirin Onyẹ-hụ-yi-oro.” Ọ hụkwọ nwan Lehi d'e ru tannị.
20
Samsịn du Izrẹlụ ọrọgbọ ahụa ọgụn ogẹn ahụn ndị Filistia gi rị a kị wẹ.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc