Kanị odinẹ abalị sụọ kẹ Samsịn nọru ebẹhụ. Ya ọ nọ lihi ọtọ, ọ pụha ọnụ-mgbọn obodo hụ, ọ nọ tụ ẹka ye ẹkwe ẹbụọ rị ọnụ-mgbọn hụ, wẹ lẹ ogwe osisi ẹbụọ wẹ gi zumẹ ẹ, hueri wẹ lẹ ihiẹn wẹ gi fidọn ẹ; o bu wẹ che uvun, bu wẹ shi elu ugu bu ihun zinmẹ Hibrọnụ.
Ya Dilaịla nọ sị Samsịn, “Ị hụkwọ nwan e dufie m, a tụ m ntụ. Gwa m kẹ w'a dọn saẹka kẹn i.” Samsịn nọ sị a, “Ị we ukun ntutu ẹsa rị m isi tụgbama ya lẹ oruru ẹkwa wẹ n'a kpa ye osisi we gi a kpa ẹkwa, gi ihiẹn wẹ gi a kpọdọn ẹ kpọdọnkẹnmẹ ẹ, akakọzị m ndị ọzọ ndụn e nwọn.” Ebe ọ rị ụran, Dilaịla nọ nwan seri ukun ntutu ẹsa ndị ahụn rị a isi, tụgbama wẹ lẹ ukun oruru hụn rị osisi ahụn nyịngbu enwẹn ẹ wẹ gi a kpa ẹkwa,
gi ihiẹn wẹ gi a kpọdọn ẹ kpọdọnkẹnmẹ ẹ. Ọ nọzị hị a, “Samsịn, ndị Filistia e rugụọ ị ẹhụ!” Ọ nọ gha ụran tẹnhin, hueri kẹ ihiẹn o gi kpọdọn ẹ kẹ osisi ahụn nyịngbu enwẹn ẹ, wẹ lẹ ukun oruru hụ.
Ya Samsịn nọ gwachanrịn a ihiẹn ile, sị a, “Ẹbeke isi a hụatuni m isi, makẹni, kete wẹ mụlẹ m, Nazaraịtị kẹ m wụ, onyẹ wẹ wechanrịn kwanị Chuku. Wẹ kọ m isi ndụn m a la, akakọzị m ndị ọzọ ndụn e nwọn.”
Mgbe Dilaịla gi hụn a n'ọ gwachanrịngụọ a ihiẹn ile, ọ nọ zi ozi jẹnni ndị-isi Filistia, sị, “Kinhẹnzi ni mgbe ohuni; ọ gwachanrịngụọ m ihiẹn ile.” Ndị-ọkịkị Filistia nọ kinhẹn, wẹ gihụ siliva hụ wẹ sikọ a kụ Dilaịla.
Ya ọ nọ hị a, “Samsịn, ndị Filistia e rugụọ ị ẹhụ!” O tẹnhin ụran, e ro, “M k'a pụ kẹ m'a pụ mbụ, mẹhunmẹ, a nahịn m.” Ọ marịnnị Osolobuẹ a lagụọ a tọ.
Ogẹn wẹ gi hụn Samsịn, wẹ nọ ja mmọn wẹ mma, sị, “Mmọn ẹnyi e wegụọ eṅẹnrẹn ẹnyi che ẹnyi ẹka mẹri, onyẹ nwẹn la alị ẹnyi iwi, gbu ndị nke ẹnyi bu ọda.”
Ikẹnnyẹ lẹ ikpoho jun ụlọ-mmọn hụ ogẹn hụ; ndị-ọkịkị Filistia ile rịzị ebẹhụ: ihiẹn rịkẹ ikẹnnyẹ lẹ ikpoho nnụ-uku ẹtọ hụzị ibe elu, e lee Samsịn wẹ rị e gi a mụ ẹmụ.
Ya Samsịn nọ kpọku Osolobuẹ, sị, “Osolobuẹ ihiẹn ile rị okpuru ẹ, dodo nyanhan m! Chuku dodo, yezi m ndụn mgbe ohuni sụọ, nị m gi ube-ohu mẹgwarị ndị Filistia ẹnya m ẹbụbụọ wẹ gụpụ!”
Ọ nọ sị, “Nị m sọn ndị Filistia nwụn!” Ọ nọ gi ndụn a ile nu adansụn ẹbụbụọ hụ, ụlọ hụ nọ ziẹnkpumẹ ndị-ọkịkị lẹ ndị hụ ile rị imẹ ẹ. Ndị Samsịn gbu nwan ebe ọ nọ nwụn nọ karị ndị o gbu k'ọ rị ndụn.
Mmunẹ ẹ ikẹnnyẹ lẹ ndị ile rị iwe nẹdi ẹ nọ jẹn d'e bulụa a; e bulụa w'a, wẹ nọ li ẹ ye ẹgbata Zora lẹ Ẹsh'tawolu, imẹ ili nẹdi ẹ wụ Manụa. Ahụa ọgụn k'o du Izrẹlụ.