Jo-Gaza nowinjo ni Samson ni kuno, ne gilworo kama ne entieno, ka gibutone otieno duto e dhoranga dala to ne ok gitimone gimoro ka giparo ni gibiro nege ka piny oru.
To noyudo nyakono osepando jomoko e ot moro maiye. Eka nokok niya, “Samson! Jo-Filistia osebiro monji!” Samson nochodo puyego mana ka omimi ma much mach ogoyo. Omiyo ne pod ok ong’eyo kuma tekone aye.
Omiyo Delila nokawo tonde manyien, motueyego. Eka nokok niya, “Samson, jo-Filistia osebiro monji!” E sano noyudo ka jomoko osebuto e ot maiye. Samson nochodo tonde mane otuego bedene, mana ka gima gin tond otieng’.
Omiyo nohulone adiera, konyise niya, “Nyaka ne nywola mirich pok okayo wiya, nikech an ja-Nazir, ng’at mowal ni Nyasaye. Koliela, to tekona dirum, kendo anyalo bedo mana machalre gi ji mamoko.”
Kane Delila oneno ni Samson osehulone adiera, nooro wach ni ruodhi mag jo-Filistia niya, “Duoguru kendo nikech koro osehulona adiera.” Mi ne gibiro gi pesa e lwetgi.
Eka delila nokok niya, “Samson, jo-Filistia osebiro monji!” Mi Samson nochiew, ka paro ni obiro guecho kendo wuok kaka pile. To ne ok ong’eyo ni Ruoth Nyasaye oseweye.
Chieng’ moro ruodhi mag jo-Filistia nochokore e sawo maduong’, mondo otim misango ni Dagon nyasachgi, ka gigoyone erokamano kuom chiwo jasikgi ma Samson e lwetgi.
Kane gisemetho, mi giromo, ne giwacho niya, “Kelnwauru Samson, mondo obi otugnwa.” Omiyo ne gigole e od tuech, motugonigi. Bang’e ne gimiyo ochung’ e kind sirni mag ot.
Noyudo ka chwo gi mon opong’o ot, kendo ruodhi duto mag jo-Filistia bende ne ni kanyo, kendo chwo gi mon alufu adek ne ni ewi tado. Giduto ne ging’iyo Samson katugo.
Nodhiro sirnigo gi muche duto, kokok niya, “We atho gi jo-Filistiagi.” Mi ot noruombore piny kuom ruodhi gi ji duto mane ni e iye. Kamano ji mane Samson onego kotho, ne ng’eny moloyo mago mane onego ka pod ongima.