×

Biblia alo Ŋɔŋlɔ Kɔkɔe 1913

Ɖelawo 17

1
Eye ŋutsua ɖe no Efrayim-to dzi, si ŋkɔ nye Mixa.
2
Eya gblɔ na dadaa bena: Wò klosalo akpe ɖeka kple alafa, si wofi, eye nedo ɖiŋu ɖe eŋu, nye hã mese la, le asinye; nyee tso klosalo la. Tete dadaa gblɔ bena: Yehowa ayra wò, vinye!
3
Esi wògbugbɔ klosalo akpe ɖeka kple alafa la na dadaa la, dadaa gblɔ bena: Mekɔ klosalo, si le asinye la ŋu na Yehowa hena vinye, be wòatsɔe awɔ aklama kpakpɛ kple legbae; eyata megagbugbɔe na wò.
4
Eye wòtsɔ klosalo la na dadaa Ke dadaa ɖe klosalo alafa eve na sikanutula, amesi tsɔe wɔ aklama kpakpɛ kple legbae, eye wotsɔe va Mixa ƒe me.
5
Eye Mixa tu mawuxɔ, etɔ kɔmewu, eye woli aƒeli heɖo viaŋutsu ɖeka, be wòanye nunɔla nɛ.
6
Ɣemaɣi la fíaa ɖeke mena Israel o, eye amesiaame wɔ nusi dze eŋu.
7
Eye ɖekakpuia ɖe tso Betlexem-Yuda le Yuda ƒe ƒome la me; enye Lewitɔ, eye wònye amedzro le afima.
8
Eye woʋu tso Betlexem-Yuda-du la me, be wòaɖanɔ afisi wòkpɔ; eye wòva Efrayim-to la dzi heyi ɖe Mixa ƒe me, be wòagayi eƒe azɔli dzi emegbe.
9
Tete Mixa gblɔ nɛ bena: Afika nètso? Eɖo ŋu nɛ bena: Lewito menye tso Betlexem-Yuda, eye meyina, be manɔ afisi makpɔ.
10
Mixa gblɔ nɛ bena: Tsi gbɔnye, eye nanye fofo kple nunɔla nam, ekema mana klosalo ewo wò ƒe sia ƒe hekpe ɖe avɔtata kple nuɖuɖu ŋu. Ale wozi Lewito la dzi.
11
Lewito la lɔ̃ be, yeatsi ŋutsu la gbɔ, eye ɖekakpui la le nɛ abe viawo dometɔ ɖeka ene.
12
Eye Mixa ɖo Lewitɔ la. Ale ɖekakpui la trɔ zu nunɔla nɛ, eye wòtsi Mixa ƒe me.
13
Tete Mixa gblɔ bena: Azɔ menyae bena, Yehowa le nyui wɔ ge nam, elabena Lewitɔe nye nunɔla nam.
Ewe Bible 1913
Bible in Éwé Revised Version Bible Society of Ghana, 1913, 2006
:
Save Notes