Cha daihtizy liata, Izarei liata bei ama y lei nota, Livai chi pakha cha Epharai tlâh râh chhâna lâ liata pahrâ ta, Zudâh râh Bethlehe zuah cha nôtho ta hnei ta.
A vahpa cha thyu ta, a nôtho lâ cha sie ta, bie phapa a chhopa ta, a vaw chhi heih awpa a chhuah ta. A chakaotuhpa satlia pakha nata alâ pô no a chhi ta. A nôtho ta a vahpa cha a paw o lâ a ngiakhei ta. Chanô paw ta a piahpa cha a vaw hmô nahta, a ly kawpa ta bie a chho ta.
A noh palihna noh ta mydi kari ta thyu ei ta, sie awpa ta a pachhuah ta, châhrasala chanô paw ta a piahpa hnohta, “Viahchhâ a chyhta chhâ nie tua la, na palôh tha a padâh chy mah y, cha khai tawhta sie lah vâ ei chi,” tah ta.
A noh pangawhna noh mydi kari ta sie a chhuahpa ta thyu ta. Chanô paw ta, “Na palôh tha a padâh chy la, zâlâ noh nai râhsa a ngiah chy muh vy,” tah ta. Ama pano ta pati zy nie khoh heih ei ta.
Chatawhcha Livai chyhsa nata a nôtho nata satliapa cha sie awpa ta thyu ei ta, a puhpa, chanô paw ta a hnohta, “Moh teh, noh hawh a zei ha ta a zâlâ ha hih. Ngiachhiepa ta tazâ cha a rie thlâh ha teh u. Moh teh, noh a tla ha hih, he liata a rie la, na palôh a palysa chy teh. Mylâ thyu patoh aw ei chi ta, o lâ cha sie lah vâ ei chi,” tah ta.
Châhrasala Livai chyhsa cha a rie khoh khao leipa ta, thyu ta, sie ta, Zebu khih dady kei tlô ta. Cha cha Zerusale khih a châ. Alâ pô no, ky padia chiehpa a chhi ta, a nôtho chhao cha a hnohta sie hra ta.
Zebu khih amâ hnia nahta, noh tla daihmâ ha ta, satliapa ta a zibeipa hnohta, “A vy teh, he Zebu mo khihpi lâ he tlei sih la, he liata a rie thlâh ha ei suh u,” tah ta.
Cha liata tlei ei ta, a rie awpa ta Kibia khih lâ pangai ei ta. Khihpi cha a ngia ei ta, ama o liata pariesa awpa ta a hruapa ama y leipa vâta, khihpi tlyliah liata a tyuh ei ta.
Moh teh u, pawpipa pakha cha a lyu rai hriana lâ tawhta zâlâ ta vaw tlô ta. Cha chyhsa cha Epharai tlâh râh chyhsa Kibia liata a pahrâ chypa a châ. Cha su liata chyhsazy deikua cha Benzami mo ama châ.
Pawpipa cha mohmia pasaih ta, khitlyhpa khihpi tlyliah liata a y thlâh hapa cha hmô ta. A hnohta, “Khataih lâ na sie aw? Khataih lâ tawhta a vypa ma na châ?” tah ta.
Ano ta a hnohta, “Zudâh râh Bethlehe tawhta ei yna Epharai tlâh râh chhâna lâ a siepa eima châ. Zudâh râh Bethlehe lâ khi kei tlyh na ta, tahmâ he Abeipa o lâ sie a chhuah na ta, châhrasala o liata nâ patlôsa khohpa y veih ei.
Eima alâzy châta sâhkô nata sahroh laozy hnei pi ta, kei nata na seichanô nata châ chakaotuhpazy hnohta a ypa satliapa châta chhao viahchhâ nata kresawhti eima hnei. Khâpa hmah a phahlapa hnei ma pi,” tah ta.
Palôh thaphapa ta ama y hai nota, moh teh u, khihpi chyhsa moleipazy ta o cha vaw dôh ei ta, ochhi thata phy ei ta. O hneituhpa pawpipa hnohta, “Na o liata a vaw tlôpa chapaw kha vaw papua teh, eima ykhei aw,” tah ei ta.
O hneituhpa pawhrâhpa cha âmo lâ kei pua ta, ama hnohta, “Châ bao va, ei unawhzy saih u, ei châ haw ei, cha hawhpa moleina rarôh ypa cha tao cheita khah u. He chyhsa he ei o liata a vaw ngia hapa châ ta, cha hawhpa hmo pasichhihpa cha rie tao khuh vy.
Moh teh u, ei sawchanô laihsa kôpa y ta, ei khichhaipa nôtho chhao a y. Âmo cha tahmâ ei vaw papua aw ei. Âmo cha ykhei u la, pha nama tahpa hawhta ama chô liata tao teh u. He chyhsa chô liata deikua cha, cha hawhpa hmo pasichhihpa cha tao khuh vy,” tah ta.
Châhrasala chyhsazy ta a bie cha nathlie khoh leipa ei ta. Livai chyhsa ta a nôtho cha patu ta, chyhsazy lâ cha papua ta. Azozâkhihdei ta patupakhi ei ta. Khih a vaw dei pathao nahta, pathlie ei ta.
A zibeipa cha my ta kaw thyu ta, ochhizy pahy ta, sie a chhuahpa ta pua ta, moh teh u, a nôtho cha châkeih patupa ta ochhi thaby liata a vaw thy thlâh ha ta.
A zibeipa ta a hnohta, “Thyu teh, sie ei si,” tah ta. Châhrasala a chhy khao vei. A nôtho ri cha alâ chô liata khaih ta, thyu ta, a o lâ pangaipa ta sie ha ta.
A vaw hmôpa zydua ta, “Izarei sawzy Izi râh tawhta ama kaw pua noh tawhta tanoh taihta, he hawhpa hmo he tlô beih leipa ta, hmô beihpa châ hra vei. Pachâ u la, ryhrao u la, reihpahmaoh teh u,” tah ei ta.