×

Ika Bible 2018

Ndị Han Eṅẹn 19

1
Ogẹn ndị Izrẹlụ kelẹni nwọn eze, onyẹ Livaị ohu hụn bi obodo ohu tegbu enwẹn ẹ elu ugu Ifrem nwọn mgba, okpoho Bẹt'lẹhẹm alị Juda.
2
Kanị okpoho hụ esọnchanrịnn'a. Ọ la okẹnnyẹ hụ tọ, lashi iwe nẹdi ẹ rị Bẹt'lẹhẹm imẹ alị Juda. Ọ nọpụ ebahụn ifọn ẹnọ,
3
ya di ẹ nọ jẹn d'a rịọkin ẹ. Okẹnnyẹ hụ lẹ odibo ẹ nyinhẹn jaki ẹbụọ. Okpoho nwẹn nọ nabanhan a iwe nẹdi ẹ. Ogẹn ọgọ a gi hụn okẹnnyẹ hụ, ọ nọ gi obi ụsụọ nabanhan a.
4
Ọgọ a, nẹdi hụn okpoho, nọ m'ẹ nọdị; wẹ nọ sọn wẹ nọdị akpọhịn ẹtọ, e ri, a ra, a ranhịn ebẹhụ.
5
Nke akpọhịn ẹnọ rịn'a, wẹ nọ lihi ẹgwa, kwademẹ ụla, kanị nẹdi hụn okpoho nọ sị ọgọ a, “Rigụ ihiẹn-oriri nị ndụn ban ị, i kebe la.”
6
Ya wẹ ẹbụbụọ nọ nọdị alị, rigbama, ragbama. Omẹgụ nẹdi nwata-okpoho nọ sị a, “Dodo nọdịzị uhinhinni n'i rizi, ra, zu ikẹn.”
7
Ogẹn o gi lihi ọtọ n'ọ lama, ọgọ a nọ sị a nọdịzị, ya ọ nọ nọdịzị uhinhin hụ.
8
Eki e fọn ụtụntụn nke akp'ọhịn isẹn rịn'a, o lihi n'ọ lama, nẹdi nwata-okpoho nọ sị a, “Zu ikẹn. Cheri n'o ru efinnaị!” Ya wẹ ẹbụbụọ nọzị rigbama.
9
Ogẹn okẹnnyẹ hụ lẹ mgba a lẹ odibo ẹ gi lihi ọtọ nị wẹ la, ọgọ a, nẹdi nwata-okpoho, nọ sị a, “Lee ẹ nwan, ọhịhị e d'a gbama. Nọdị nị ebeni uhinhinni, tannị e d'a gụ. Nọdị n'i ri, ra zu ikẹn. Eki ghahụ e fọn ụnụ e buli, ban ụzọ, lama.”
10
Kanị, okẹnnyẹ hụ a chọzịnị n'ọ nọru uhinhin ọzọ, ya ọ nọ buli, dọn ihun Jebusu (hụn wụ Jerusalẹm), ya lẹ jaki ẹ ẹbụọ bu ibu lẹ mgba a.
11
Ogẹn wẹ gi ru ẹhụ Jebusu, ọhịhị e d'a gba, ya odibo hụ nọ sị di-nwọnn'ẹ, “Nị ẹnyi kụsị nwan imẹ obodo ndị Jebusu ebeni, nị eki fọn.”
12
Di-nwọnn'ẹ nọ sị a, “Mba. Ẹnyi abanyekọ obodo ndị alị ọzọ wụlẹni ndị Izrẹlụ. Ẹnyi shikọ d'a ranhịn Gibia.”
13
“Pụha nwan, nị ẹnyi lịlịma rụ Gibia mọbụ Rama, nị ẹnyi d'a ranhịn imẹ ohu imẹ wẹ ẹbụbụọ.”
14
Ya wẹ nọ jẹnmẹ. Ẹhụ Gibia rị Bẹnjamini kẹ wẹ ru nwan, anwụn nọ dan.
15
Ya wẹ nọ kụsị ebẹhụ, nị wẹ ranhịn. E jẹn wẹ d'a dịnọ alị ebe ndị alị hụ nọ e zu, kanị onwọnni nwan onyẹ weri wẹ shi iwe ẹ d'a ranhịn.
16
Ẹnyasị hụ, okẹnnyẹ-ọba ohu, onyẹ alị-ugu Ifrem hụn bi obodo Gibia ndị Bẹnjamini hụ, gha ugbo lụapụha.
17
O lee ẹnya, ọ hụn onyẹ-ijẹn ogbe ebẹhụ ndị alị a nọ e zu; ọ nọ jụma wẹ, “Elebe kẹ ụnụ jẹnkọ? Elebe kẹ ụnụ gha bịa?”
18
Ọ nọ sị, “Ẹnyi gha Bẹt'lẹhẹm rị Juda lakọ ebe tegbu enwẹn ẹ imẹ alị ugu Ifrem ebe m bi. M jẹn Bẹt'lẹhẹm rị alị Juda, m jẹnkọ nwan ụlọ-Osolobuẹ. Onwọnni onyẹ we m shi iwe ẹ.
19
Ẹnyi e nwọnghọ ẹfịfịa ọkpọ-nkụn lẹ ihiẹn-oriri ọzọ jaki ẹnyi k'e ri, kẹ ihiẹn-oriri kẹ manya ẹnyi wụ ụmụ ị jẹnkọ d'e ri, ra — mmẹ, nwa-ị-okpohoni lẹ nwata-okẹnnyẹ ẹnyi lẹ ya wị. Onwọnni ihiẹn ẹnyi gilẹni.”
20
Okẹnnyẹ-ọba hụ nọ sị wẹ, “Nsọngbu arịa, nị m yeghọ ụnụ ihiẹn ọwụlẹ rị ụnụ mkpa, ka aranhịnlẹni ogbe obodo ebeni.”
21
Ya ọ nọ we wẹ shi iwe ẹ, ye jaki wẹ ihiẹn-oriri. A changụ wẹ ụkụ, wẹ nọ ri, ra.
22
Ebẹhụ wẹ rị e ri, a ra, ndị-ejẹ rị obodo hụ nọ kehunmẹ ụlọ hụ. Wẹ hụ a dụ ẹka ẹkwe, e yini okẹnnyẹ-ọba hụ nwọn ụlọ oro, “Wepụhakwọ okẹnnyẹ hu bịa iwe i nị ẹnyi mẹ mgba a.”
23
Ya onyẹ nwọn ụlọ nọ pụha ezi d'e kunrun wẹ, sị wẹ, “Mba nị, umunẹ m! Emẹlẹ ni eje-ihiẹnni. Ebe o mẹ ni okẹnnyẹni bịahụ abịa iwe m, emẹlẹ ni ihiẹn-ifẹnrẹnni.
24
Lee ni nwan nwa m okpoho wẹ kelẹni wa ụkụ lẹ mgba okẹnnyẹni ebeni: ni m wepụhanị ụnụ wẹ kikẹnni, ụnụ nwọn ikẹn mẹ mgba wẹ, mẹ wẹ ihiẹn ọwụlẹ ụnụ chọ. Kanị, nke okẹnnyẹni, emẹlẹ ni ihiẹn-ifẹnrẹnni.”
25
Kanị egọnni wẹ ẹ ntịn. Ya okẹnnyẹ hụ nọ nwan weri mgba a ye wẹ, wẹ nọ kwọn ẹ, mẹ mgba a uhinhin hụ ile, mẹtịta a. Eki e fọnmẹ, wẹ nọ hapụ a n'ọ la.
26
Eki e fọn, ya okpoho hụ nọ lashi ụlọ hụ di ẹ rị, dantọ ọnụmụzọ, dinẹ ebẹhụ, eki e we fọnchanpụ.
27
Ogẹn di ẹ gi lihi ọtọ ụtụntụn, kpọpụ ụzọ n'ọ lama, e lee mgba a k'ọ dantọ ọnụmụzọ, ẹka a hụ ebe wẹ gha e nyinban ọnụmụzọ!
28
Ọ sị a, “Lihi ọtọ; nị ẹnyi la.” Kanị ọ shịarịn'a ihiẹn anaị. Ya ọ nọ bu ẹ che elu jaki ẹ, lama.
29
Ogẹn o gi ru ụlọ, ọ nọ weri ẹbeke, jakịka mgba a, okẹn-ẹhụ, okẹn-ẹhụ ụzọ mmẹbụọ, ke ẹ ghagbarị Izrẹlụ ile.
30
Onyẹ hụn a, ọ sị, “Ihiẹn nọ ẹnịna emẹtukwọnị kete Izrẹlụ ghalẹ Ijiptu pụha, anụtudẹni wẹ ihiẹn nọ ẹnịna. Rokwọ n'a! Leban n'a ẹnya! Gwa nị ẹnyi ihiẹn ẹnyi jẹnkọ d'e mẹ!”
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes