Ku makya ku lunaku olwookutaano bwe yasituka okugenda, kitaawe w'omuwala n'amugamba nti: “Nkwegayiridde, gira wezzeemu ku ndasi; Linda okutuusa akawungeezi.” Bombi ne balya wamu.
Ne batuuka e Yebusi; olunaku nga lweyezeewo nnyo, omuweereza n'agamba mukama we nti: “Nkwegayiridde, gira, tukyame mu kibuga ky'Abayebusi kino tusule eyo.”
Akawungeezi ne wajjawo omukadde eyali ava mu nnimiro ye okukola: naye yali azaalibwa mu nsozi za Efurayimu, naye nga yasenga mu Gibewa. Ab'omu kitundu bo baali Babenyamiini.
N'amwanukula nti: “Tuvudde Beteleemu ekya Yuda, tugenda eyo mu masosso g'e Efurayimu gye mbeera. Eyo gye nava ne ŋŋenda e Beteleemu mu Yuda, kati ŋŋenda ku kiggwa ky'Omukama; tewali n'omu atututte kutusuza.
Baali bakyali mu kusanyuka, abasajja b'omu kibuga ekyo abagwagwa, ne bajja ne beetooloola ennyumba, ne bakuba enzigi nga baleekaana, nga bwe bagamba nnannyinimu nti: “Fulumya omusajja eyayingidde omumwo twebake naye.”
Naye abasajja nga tebamuwuliriza. Omusajja kwe kukwata omuzaana we n'amufulumya gye bali, bo ne bamusobyako n'okumujolonga ekiro kyonna; mmambya ng'asala ne bamuta.
Ku makya omusajja n'azuukuka, n'aggulawo oluggi, n'afuluma ayongere olugendo lwe. Gye yakuba amaaso, nga ku mukazi omuzaana we, agudde mu mulyango, emikono gigudde ku mwango.
Buli eyakirabanga ng'agamba nti: “Ekifaanana kiti tekirabwangako era tekikolwangako bukya bajjajjaffe bambuka kuva mu Misiri n'okutuusa ku lunaku lwa leero. Mukyekkaanye, musale amagezi, mutubuulire eky'okukola.”