Wẽnd kãng t'a Israyɛl da nan pa tar dĩm ye. Levit a ye n da kẽed Efrayim tãmsa sʋka. A waa n dɩka pag n paase, a waa n dɩka Bɛtelyɛɛm bi-pugla n maan a paga. Bɛtelyɛɛm bee Zɩɩda tẽn-peelmẽ.
A sɩda bʋʋga-a lame n wilg-a sẽn segd la a paam t'a le rɩk yir sore. Sɩda ra yii ne a yamba la a bõeens a yiibu. Paga tall-a lame n kẽes a ba zakẽ. Paga baaba yãend-a lame t'a yik ne sũ-noogo n wa seg-a.
Daar a nu soaba, Levitga sãda beoogo n na n looge la paga ba le yeel-a lame: «M kot-f lame tɩ f reng n dɩ la y paa n ta zaabre.» La b yiiba naaga taab n dɩ.
A sẽn bob n na n loog ne a pag la a yamba, la rɛɛmba sẽn le yeele: «Gese, wĩndig lʋɩɩme, zĩig zoe sobgame, gãand yʋngã yɛsa n noog d sũuri. Beoogo y na yik pĩnd n loog y tẽngẽ.»
Raoa zãgsame n yik n dɩk a sor ne yʋngo n ta Zebuze rãmb tẽnga. (B boond-a lame tɩ Zerizalɛɛm yɛsa.) Da yaa yẽ ne a paga la a yamba la a yaanwaoor bõeens a yiibu.
T'a yeele: «D yii Bɛtelyɛɛm, Zɩɩda tẽn-peelmẽ la yaa Efrayim tãmsa poor tẽnsa la d data. Yaa be la m da be. M da taa Bɛtelyɛɛm, a Zɩɩda tẽn-peelmẽ n lɛɛgdẽ la kaanẽ m ka paam gãag-soab ye.
La ned ning fãa sẽn yãend yellã ra yeta a sũurẽ: «Israyɛl kamb sẽn yi Ezipt tɛka n ta rũnna zĩ n yãend yell a woto buud ye.» Levitga ra kõo noor kãngã a sẽn tʋm b rãmbã: «Gom-y woto ne Israyɛl kamba: Zĩ bug la b yãe yell a woto buudu, a Israyɛl sẽn yi Ezipt tẽng tɛk n tãag rũnna? Dɩlla tags-y, yẽs-y ne taaba la y leoke.»