Na mũlaĩka wa Yeova ambata kuma Ngilikali kũthi Mbokimu. Na asya, Nyie nĩnatumie mwambata kuma Misili, na nĩnamũetie nthĩ ĩla nameavĩe aaĩthe menyu; na nĩnaisye, Ndikananga o na ĩndĩĩ ũtianĩo wakwa nenyu:
Na andũ mamũthũkũmaa Yeova mĩthenya yonthe ya Yosua, na mĩthenya yonthe ya atumĩa ala mekalangile thayũ kwĩ Yosua, ala monete wĩa mũnene w’onthe wa Yeova ũla wekĩte kwondũ wa Isilaeli.
O na andũ onthe ma nzyawa ĩsu yonthe moombanw’a vamwe na aaĩthe moo, na kwookĩla nzyawa ĩngĩ ĩtina woo, ĩla ĩtamwĩsĩ Yeova, o na ĩteesĩ wĩa ũla wekĩte kwondũ wa Isilaeli.
na mamũtia Yeova, Ngai wa aaĩthe moo, ũla wamaumisye nthĩ ya Misili, na maatĩĩa ngai ingĩ, ngainĩ sya ngo sya andũ ila syamathyũlũlũkĩte, na masyĩkunamĩsya: na mamũthatya Yeova.
Na ũthatu wa Yeova wakanĩa Isilaeli, nake amanengane mokonĩ ma anangi ala mamanangaa; na amathoosya mokonĩ ma amaitha moo ala mamathyũlũlũkĩte, mũvaka matyaatonya kũũngama ĩngĩ mbee wa amaitha moo.
Na vamwe na ũu matyaamethukĩĩasya asili moo; nĩkwĩthĩwa nĩmeekaa ũmalwaya makĩatĩĩa ngai ingĩ, na kũsyĩkunamĩsya: nĩmelelũkaa na mĩtũkĩ kuma nzĩanĩ ĩla aaĩthe moo maendelaa, makĩw’aa mĩao ya Yeova; ĩndĩ mo matyaaĩka ũu.
Na yĩla Yeova wamaũngamĩsya asili, nĩvo ĩndĩ Yeova waĩ vamwe na mũsili ũsu, na aimavonokya kuma mokonĩ ma amaitha moo mĩthenya yonthe ya mũsili ũsu: nũndũ Yeova nĩwetũngaa nũndũ wa kũluma kwoo kwondũ wa ala mamathĩnasya na kũmew’ĩthasya woo.
Ĩndĩ kweethĩawa, o yĩla mũsili wakw’a, nĩmasyokaa na ĩtina, na kwĩvukasya kwĩ aaĩthe moo, kwondũ wa kũatĩĩa ngaĩ ingĩ na kwithũkũmaa, na kũsyĩkunamĩasya; matyaaekana na meko moo kana mũendele woo wa kwaa matũ.