E are tak tinimit wa' ri xebuya' can ri Ajawaxel pa ri ulew, che qui c'ambejexic ri aj israelib ri c'ä maja' que alaxic aretak xcoj chuk'ab che u ch'äquic ri Canaan.
Xecanaj ri job c'ämal qui be ri aj pilisteyib, conojel ri aj cananeyib, ri aj sidonib, ri aj hebeyib ri e jekel pa tak ri juyub re ri Libano, cächapletaj bic ruc' ri juyub Baal-hermon c'ä pa ri oquibal pa Hamat.
Jeri' ri aj israelib xquichaplej ri qui c'aslemal chquixo'l ri aj cananeyib, ri aj hititib, ri aj amoreyib, ri aj perezeyib ri aj hebeyib xukuje' ri aj jebuseyib,
ri e qui c'ojol xukuje' ri e qui mia'l ri aj israelib xec'uli' cuc' ri qui c'ojol xukuje' ri qui mia'l we winak ri', xequik'ijilaj c'u ri e qui diosib.
Sibalaj c'u man utz ta ri qui c'aslemal ri aj israelib chuwäch ri Ajawaxel, man xnataj ta chic ri Dios chque, xquichaplej qui k'ijilaxic ri jalajoj tak u wächbal ri Baal xukuje' ri Astarte.
Rumal ri' xpe royowal ri Ajawaxel che qui c'ulelaxic, xebujach c'u pu k'ab ri Cusan-risataim, ajawinel aj Mesopotam. Wajxakib junab xquipatanij ri Cusan-risataim,
Ri ruxlabal ri Ajawaxel xpe puwi' ri Otoniel, xuc'am c'u qui be ri aj israelib, xebe pa ri ch'o'j, ri Ajawaxel xuya' che chi xch'äcan puwi' ri Cusan-risataim.
ri aj israelib xquiban chi jumul ri etzelal chuwäch ri Ajawaxel, rumal ri' ri Ajawaxel nim na ri chuk'ab xuya' che ri Eglon ri ajawinel re Moab, chquiwäch ri aj israelib.
Ri Eglon xuban jun c'ulwächinic cuc' ri aj amonib, xukuje' cuc' ri aj amalesib xech'ojin c'u cuc' ri aj israelib, xquich'äc ri tinimit ri e c'o wi tut.
c'ä xquitz'onoj na tok'ob che ri Ajawaxel, ri Ajawaxel xuwalijisaj jun achi che qui to'ic. We to'banel ri' are jun ajmox ri Aod u bi', ri u tat ri Aod are' ri Jer, aj Benjamin. C'o jun k'ij, ri aj israelib xquitak bic ri puak ri caquitoj pu k'ab ri Eglon, are c'u xc'amow bic ri Aod.
Aretak c'ut xopan cuc' ri diosib ri e c'o chunakaj ri Jilgal, ri Aod xtzelejic jawije' c'o wi ri Eglon, xubij che: “Wajawinel, c'o jun takquil quinwaj quinbij che la pa tuquiel wi la.” Ri ajawinel xuya' takanic chque ri pataninel tak rech xubij chque chi pa yinelem chebel bic chuwäch.
Aretak ri Aod u tuquiel chic c'o can ruc' ri Eglon, t'uyul pa ri rachoch re k'alaj, xkeb ruc' xubij che: “Wajawinel, ri takquil ri nu c'amom ulok che la are ri Dios yowinak chwe.” Aretak ri Eglon xuta' ri xbix che, xwalij puwi' ri u tem re ajawibal,
Sibalaj co u jutic xubano, rumal ri' man xuwi ta xoc bic ri ch'ich' re ch'o'j xane' xukuje' xoc bic ri chapbal rech, xq'uis bic ri ch'ich' re ch'o'j chupam ri Eglon, ri Aod c'ut man xresaj ta che.
Aretak benak chic ri Aod, xepe ri pataninel tak rech ri ajawinel, aretak xquil ri uchi'ja tz'apitalic, ri e are' xquichomaj chi ri ajawinel u tz'apim rib pa ri ja re k'alaj che u banic ri u rajawaxic.
Aretak c'ut naj chic queye'm, xeboc il aretak xquilo chi man quel ta ulok ri ajawinel chquiwäch. Xquic'am ri lawe, aretak c'ut xquijak ri uchi'ja c'äte cäquilo jilin chic ri cajaw liq'uin cho ri ulew.
Aretak xopan pa ri culew ri aj israelib, xrok'esaj ri trompet pa tak ri juyub re Eprain che qui siq'uixic ri aj israelib, conojel c'ut xekaj ulok cho tak ri juyub xnabej ri Aod chquiwäch.
Ri Aod xubij chque chi cheteren chrij, are' c'u ri Ajawaxel cäyo'w na ri ch'äcanic chque, paquiwi' ri aj moabib ri qui c'ulel. Ri e are' c'ut xquiterenej, xquiya' quib chquichi' tak ri k'axebal pa ri nima' Jordan, man xquiya' ta be chi c'o ta jachin jun coc'owic.
Ri jun chi c'amal qui be are ri Samgar (u c'ojol ri Anat), xebucämisaj wakib sient (600) aj pilisteyib ruc' jun tz'imaj ch'ich'. Xukuje' ri are' xebuto'tajisaj ri aj israelib.