Olofeka viaco vievi: Olombuale vitãlo via va Filisiti, la va Kanana vosi, la va Sitono, la va Hiwi vana va tunga komunda ya Levanone, tunde komunda ya Baale Herimone toke koku panda ko Hamati.
Oco onyeño ya Yehova ya wengukila Isareli, kuenje wa va landisa peka lia Kusiana Risiatayimi, Soma ya Mesopotamia. Oco va Isareli va vumba Kusiana Risiatayimi anyamo ecẽlãla.
Espiritu lia Yehova lio wila, kuenje wa tetuluila Isareli. Wa tunda oku yaka, kuenje Yehova wa eca peka liaye Kusiana Risiatayimi. Soma ya Mesopotamia. Wa yula Kusiana Risiatayimi.
Va Isareli va linga vali eci cĩvi kovaso a Yehova. Kuenje Yehova wa pamisa Egilone, Soma ya Moavi, ha katukila va Isareli, momo va linga eci cĩvi kovaso a Yehova.
Eci va Isareli va vilikiya ku Yehova, Yehova wa va katuila upopeli, Ehudi, omõla a Gera, u Benjamini, haeye ulume ukuepĩli. Va Isareli vo tuma oku tuala ulambu ku Egilone, Soma ya Moavi.
Eye muẽle wa ñualela kovawe a songiwa, ocipepi la Giligali, kuenje hati, A Soma, ñuete ondaka yimue yuyombeki oku ku sapuila. Soma hati, Uhiko. Oco vosi va talamele konele yaye, va tundako.
Osimbu a tumãla lika liaye vohondo yaye yokosapalalo, haiyo yoku pita ofela, oco Ehudi weya kokuaye. Ehudi wa popia hati, Hu kuetele ondaka yimue ya tunda ku Suku. Oco Egilone wa votoka komangu yaye.
Eci a tunda, akuenje va Soma veya. Eci va mõla okuti apito ohondo yosapalalo a yikiwa losapi, va sima vati, Mbi o li loku panga usenge vokati kohondo yaye yoku pitila ofela.
Va amisapo toke ca va kuma. Puãi omo lopo ka yikuile apito ohondo yosapalalo, va nyañula osapi, kuenje va a yikula. Ota, cime cavo wa fa, wa liyala posi.
Wa popia lavo hati, Ñuami, momo Yehova wa eca peka liene ovanyãli vene va Moavi. Oco va loka, loku u kuama, yu va kuata olonjiva via Yordão, via lisuñama la va Moavi, kuenje ka va tavele okuti umue o yokilapo.