Na lūūlū ū Seeba ūbajinja mu makono ga ng'wa Yabini, ūmò wa batemi ba Bakanaani, wikalo wakwe walī Hazooli; ū ntaale wa mabità gaakwe ga būlūgū walī Sisela, muna Halosheti-hagoyimu.
Walī amanīīlile kwigasha ha mbeho ya ntī gwa nhende, gwitanagwa go ng'wa Debola. Gwalī ha gatī ya Lama na Beeseli, mū sī ya magūlya ya Efulaimu; a Baisilaeli bang'wenhelaga henaho ī mihayo yabo wabalamula.
Nakūnduta ū Sisela ū ntaale wa mabità ga ng'wa Yabini, hamò na a magogoteni gaakwe na a bashilikale bakwe, nang'wenhe kū mongo gwa Kishoni, nize nantūūle mu makono gaako.’”
Walīho Hebeeli, ūmò wa Bakeni; ū munhū ng'wenūyo walī wikomanya, ūbīngīla a Bakeni biye, a ba lūganda lwa kaya ya būkwiye o ng'wa Musa; ūūkakoma iheema lyakwe kūīlīīla Kadeeshi, bbihī na ntī ntaale gwa mu Zaananimu.
Haho na haho ū Sisela ūgakuminga pye a magogoteni gakwe ga chūūma ayo magana kenda, na a bashilikale bakwe a bose, kūfuma Halosheti-hagoyimu kūshisha kū mongo gwa Kishoni.
Ū Seeba ūlīpyeena kībi no ī libità lya ng'wa Sisela, hamò na a magogteeni gakwe, ūpyenwa no ū kū būtongi wa līlūshū lya ng'wa Balaaka. Ū Sisela wika ū ng'wigogoteni lyakwe, ūpeela nhambo wa magūlū.
Ū Sisela ū ng'weeene ūbiza wapeela nhambo lwa magūlū, ūūkashika kwiheema lya ng'wa Yaeli, nke o ng'wa Hebeeli ūmò wa Bakeni; nguno walīho wimane a ha gatī ya ng'wa Yabini ū ntemi wa Hazooli nū lūganda lwa Hebeeli ū Nkeni.
Alīyo aho walaala yūmīta ī tūlo īkī walī wanoga, ū Yaeli ū nke o ng'wa Hebeeli ūsola līīlūmambo lya hiheema na nundo, hūna ūng'wegeela alīkūngīla poole poole aho walī alaalile. Ūshika ūlūtūlīīla ū lūmambo a ha būshū lūūpulung'hanya lūūkalibīla na hasī, ūchīla henaho.