|
| 1 |
|
| Khä urusti Deborampi, Abinóam chachan Barac sat yuqapampix aka q'uchu q'uchupxäna: |
|
| 2 |
|
| “Tatitur taqin yupaychapxam, Israel markan nuwasiñatak wakicht'ak chachanakax utjaskiwa; marka taypinxa nuwasiñatak jawsatar ist'iri chachanakax utjaskarakiwa. |
|
| 3 |
|
| ¡Reyinaka, ist'apxita! ¡Marka apnaqirinaka, ist'apxita! ¡Nayax Tatituruw q'uchü! ¡Nayax Israelan Diosaparuw q'uchü! |
|
| 4 |
|
| “Tatay, jumax Seír chiqat mistuwaykta ukkhaxa; Edom pampanakat sarawayxta ukkhasti, uraqix khathatïnwa, alaxpachas chhijthaptarakïnwa; qinayanakas jallurak waraqtayanïna. |
|
| 5 |
|
| Tatay, juman nayraqatamana, Israelan Diosapa, juman nayraqatamana, qullunakax khathatïna, Sinaí qullus khathatïna. |
|
| 6 |
|
| Anat chachan Samgar yuqapan urunakapana, Jael warmin urunakapana, saririnakax thakhinak jaytanukupxäna, jan sartkay thakhinakan sarnaqapxäna; |
|
| 7 |
|
| Israelitanakan jisk'a markanakapax q'ala apanukutaw uñjasïna. Ukapachaw nayax sartasta, ¡naya, Débora warmi, Israel markan taykapa! |
|
| 8 |
|
| “Taqinis yaqha diosanak ajllisipxäna, ukchañkamasti nuwasiñax niyaw marka punkur purinïna, pusi tunka waranqa israelitanak taypinsti, janiw mä jark'aqasiñasa, mä lanzas uñjaskänti. |
|
| 9 |
|
| “¡Nayax taqi chuymax churta Israelan jach'a jilïrinakap layku, markaxankir jaqinak layku, nuwasiñar jawsatax mäki ist'asipxatapata! ¡Tatitur taqini yupaychapxam! |
|
| 10 |
|
| “Janq'u asnonakar qunxatirinaka, arsupxamaya, suma jant'akunakar qunurinaka; jumanaka, saririnakasa: |
|
| 11 |
|
| ¡Kawkhantix uywanakax um umapki, platillonakan chhulluqitapamp chika, Tatitun atipjäwinakapat arsupxam; Israel markapan atipjäwinakapata! |
|
| 12 |
|
| “¡Sartasim, Débora, sartasim; sartasim mä q'uchu q'uchurakim! ¡Jumasti Barac, Abinóam chachan yuqapa, sarthapim, katuntat jaqinakamar apasxam! |
|
| 13 |
|
| “Israelitanakax ukapachaw saraqanipxäna ch'amaninakampi nuwasiñataki; nayïpan Tatitun tamanakapax saraqanïna nuwasir jaqinakamp nuwasiñataki. |
|
| 14 |
|
| Efraín ayllunkirinakat yaqhip chachanakax qhirwaruw saraqanipxäna, jupanakan qhipapsti Benjaminankir tamaw sarapxäna. Maquir chiqankirinakat jilïrinakapaw saraqanipxäna, Zabulón ayllunkirinakatsti marka apnaqirinakapaw saraqanipxäna. |
|
| 15 |
|
| Deborampi chikasti Isacar chachan jilïr jaqinakapaw sarapxäna; Isacar chachax Barac chachan yanapiripänwa, jupasti qhipapat qhirwarux mantantarakïna. “Rubén chachan tamanakap taypina, taqi chuymamp sayt'ir chachanakaw utji, |
|
| 16 |
|
| ¿kunatarak tamanak taypin qhiparapxta, awatirinakar ovejanakap jawsaskir ist'asasti? ¡Rubén chachan tamanakap taypin, axsartir chuyman jaqinakaw utji! |
|
| 17 |
|
| “Galaad jaqinakax Jordán jawirat khurkatan qhiparäna; Dan ayllunkirinakax barconak jak'an qhiparäna, Aser ayllunkirinakasti quta thiyaruw qhiparäna, uka chiqatsti janiw kawksarus unxtkänti; |
|
| 18 |
|
| ukampis Zabulón, Neftalí ayllunkirinakax niyapuniw jakañanakapsa nuwasïwin apt'asipxi. |
|
| 19 |
|
| “Ukatsti reyinakax Taanac chiqaruw jutapxäna, Meguido markan umanakap jak'aru; cananeo reyinakax nuwasiñ amtampiw jutapxäna, jupanakasti janiw qullqsa, qamir yänaksa apasipkänti. |
|
| 20 |
|
| Warawaranakax alaxpachatpacha, utjäwinakapatpach Sísara chachatak sayt'asipxäna; |
|
| 21 |
|
| jisk'a jawira, nayra jisk'a jawira, Quisón chiqankir jisk'a jawiraw jupanak apasxäna. ¡Jumaw ch'amaninakan arsutaparux amukt'ayäta! |
|
| 22 |
|
| “Caballonakan casconakapax chhulluqiwa! ¡Thuqtas, thuqtasaw ch'amani caballonakax jalapxi! |
|
| 23 |
|
| Tatitun angelapasti yatiyiwa: ‘¡Meroz markxaru, jaqinakapxaru jach'a ñanqhachäwi jutpan!’ sasa. Tatitun ejercitopar yanapt'ir jan jutapxatapata, ¡Tatit layku nuwasiñ jan munapxatapata! |
|
| 24 |
|
| “¡Héber sat quenita jaqin Jael warmipasti, taqi warminak taypin qullanäpan! ¡Chhujllankir warminak taypin qullanarakïpan! |
|
| 25 |
|
| Sísara chachax uma mayïna; Jael warmisti leche churäna. ¡Suma imat qiruruw puqtat leche waxt'äna! |
|
| 26 |
|
| Ukchañkamasti ch'iqa amparapampix mä ch'akur katüna, kupi amparampisti jathi martillo katurakïna, Sisararux ukampi p'iqita jisktasin, p'iqip ch'iyjäna, parapat uka ch'akurumpi liq'intarakïna. |
|
| 27 |
|
| Sísara chachax Jael warmin kayup jak'aruw jaqutattäna, usuyasitap laykux uraqiru liwitattäna, ukawjan jiwxarakïna. |
|
| 28 |
|
| “Sísara chachan taykapax llakt'ataw uta ventanar jak'achasisin säna: ‘¿Kunatarak carropasti jan mäki purinisti? ¿Kunatarak nuwasiñ carropasti qhipt'pachasti?’ sasa. |
|
| 29 |
|
| Wali ch'ikhi uywat warminakasti ukxaruw arusxatapxi, jupasa pachpa arunak arsuraki: |
|
| 30 |
|
| ‘Inas kuntix nuwasïwin apaqanipki uka yänak jaljasisipkchi. Sapa maynitakix mä warmi, jan ukax pä warmi; Sisaratakisti suma saminakat lurat isinaka: maya, jan ukax paysa, suma saminakan p'itakipata isinaka, atipjirin kunkap k'achachañataki’ sasa. |
|
| 31 |
|
| “¡Tatay, taqpach uñisirinakamax ukham tukjatäpxpan, jumar munirinakasti qhanapxpan, kunjämtix intix chika urun qhanki ukhama!” Uka qhipatsti uka uraqinxa, pusi tunka maraw samarañax utjäna. |
|
|
|
|