A Booz tɩ zĩnda noor ninga tẽnga rãmb sẽn kaood b bʋʋdã la a waa n yãee raoa a ye sẽn tõe n welg a roagda a Elimelɛk raboogo, la a bool-a lame n yeel-a: «Zagla, yaas ka! Wa zĩnd ka bilfu!» A waa n zĩndame.
Dẽ la m tʋlg n wilg-fu, tɩ f bãnge, la m yet tɩ f ra pʋʋgã tɩ tẽnga rãmb la tẽnga nin-kẽemba yɩ d kaseto. F rat n yaoo pʋʋga bɩ f yao, f pa rat bɩ f wilg-ma. Foo n so koɛɛga pipi tɩ sã n ya rogmẽ wã foo n pẽ n yɩɩd maam.» La raoã yeelame t'a na n daa pʋʋgã.
T'a Booz na n paase: «Bãng tɩ f sẽn deeg pʋʋga raare, baraar me f reegda a Rut, Moab biigã, a Nowemi bi-pagã, n tong a Elimelɛk rogem yũuga, a Elimelɛk meng soolmẽ.»
Yaool n da yaa Israyɛl rãmb dog-n-miki tɩ f sã n da bũmbu, bɩ f sã n tek bũmbu n dat n pids kaseto, bɩ f yãk f neodr n kɩse. Yaa boto la Israyɛl kamba da pidsd b kaseto.
Yaa y nifẽ la m deegd a Rut, Moab biiga, a Malõ pʋg-kõorã, n na n tong m kẽema rogem yũuga, a meng soolmẽ t'a yʋʋr da menem a buudẽ la a tẽngẽ ye. Dẽ fãa yaa y nifẽ.»
Sẽn da zĩ-b tẽnga bʋʋd sẽn kaood noor ningã, fãa yeelame: «Yaa d nifẽ.» La b paasame: «Bɩ Wẽnd kɩt tɩ pag ning f sẽn na n peegã wẽneg a Rasɛl ne a Lea. Tɩ bãmb b yiib n mee Israyɛl doogo. Wẽnd na kɩt tɩ f kɩ yẽgen Efrata, Wẽnd na kɩt tɩ f yʋʋr yi Bɛtelyɛɛm!
Biiga na le pids f vɩɩma ne sũ-noogo la a na bʋk f sũur f kʋʋlem pʋgẽ. F bi-paga sẽn nong-fa roga biig n kõ-fo la f nanda pʋg kãnga n yɩɩd kamb a yopoe.»