O togi togayeere, o wi'i: “Yaa Jawmiraawo honooɓe asama, laar bone korɗo ma, siftoram, ittanam mbustu ngu'u! To a hokki yam ɓiɗɗo gorko, fakat mi hokkititte mo balɗe ngeendam maako fuu. Gaasa hoore maako meeɗataa laɓeego.”
Hanna jaabi mo: “Aa'a, barkaama, mi yaraay inaboojam malla nguykinoojam sam, ammaa mi debbo cuniiɗo. Mi rufi ko woni haa ɓernde am fuu yeeso Jawmiraawo.
Mawri maajum Elkaana yehi fahin haa Silo, kaŋko e yimɓe saare maako fuu, ngam haa o lii'ano Jawmiraawo kirseteeŋga hitaande man e kirseteeŋga feere nga o togi ɗum.
Elkaana jaabi mo: “Waɗ ko fottani ma, jooɗa haa saare haa to a enti ngel. Jawmiraawo boo tabitin wolde mum nde o wi'no dow maagel.” Bana nii Hanna jooɗi haa saare, hakkilani ɓiyum Samuyila.
Ɓaawo Hanna enti mo, o yahri mo haa suudu Jawmiraawo haa Silo. O yahri boo ngaari ndi duuɓi tati e kuroori buhuure e kanyakanyaawu inaboojam. Wakkati man Samuyila o ɓiŋngel pamarel tawon.