Ki inem anyun Samuel chuboitap mwaita ak koroong'ji metinnyi, yeityo kong'utut ineendet ak koleenji, “Tos ma kagoiilin Kamuktaindet ne Toroor iegu pounindet ne po piikyik?
Iwendi tai eng' yooto kot iit keetitap Tabor, ak ko nyoorun eng' yooto piik somogu kotogosyin ye mi Kamuktaindet eng' Bethel, ko kanabi age aarek somok che po ng'oroor, koibei age magatiinik somok ak koibei age soteetap divaik.
Ye ibata, iwe itestai agoi iit tulweetap Kamuktaindet ole mi kiplugotinigap Philistiik. Ye iit nganaseet, ituiye maotik che kaiyumgei kochoorugei eng' kapkoros kotinyei kibugandet, sugutit ne ming'in, ndurerut ak ketubet eng' tainnywa komaotenonu.
Yeityo ichoortegei indoena iwe Gilgal amu achoorugei ole imi, anyoo agoite kagoochinoik che kibeelei, ak aeeny tiseiywek che kagoochinoik che po kaalyeet. Igenisye peetuusyek tisap agoi aitu ole imi si aboorun kiit ne iyae.”
Kingo it tulweet, kotuiye ineendet maotik che kigaiyumgei, ak ki nyoonji ineendet Kabuusetap Kamuktaindet eng' kimnateet, ak ki maoten eng' kwenunnywa.
Ye kingo keer piik tugul che ki ingen ineendet eng' tai komaoteni ak maotik, koleenjigei, “Nee ni kogonyonji weeriitap Kish? Tos agenge Saulo eng' maotik?”
ki teebee `imametap Saulo ineendet ak otwogindennyi koleenji, “Kigobe ano?” Kowol kole, “Kiga kibe kecheeng'ate sigiroik, ak ye ki ngegeer keele mata kobiit, kebwa ole mi Samuel.”
yeityo koleenji piigap Israel, “Kamwa ko uu ni Kamuktaindet ne Toroor, Kamuktaindetap Israel kole, ‘Ki amutu Israel kotogos eng' Misiri, ak asarwok eng' eunegap Misiriik, ak eng' eunegap laitornatosyek tugul che kiusok.’
Ago kaoeesye ra Kamuktaindeng'wong' ne ineendet ko sarwok eng' pichiinwekwok ak nyalilwogikwok tugul. Komwa ole, ‘Achicha, itoroorwech laitoryat koboiywech.’ Obwa anyun taitap Kamuktaindet ne Toroor obwanune pororyosyekwok ak ortinwekwok.”
Ak ki imut pororyetap Benjamin koriik kobwanune ortinwekwak ak ki kinam ooreetap Matirik. Eng' let ko ki kinam Saulo weeriitap Kish. Ago ye ki ngecheeng' ineendet, koma kinyoor.
Koleenji `Samwel piik tugul, “Ogeere ineendet ne kogolewen `Kamuktaindet ne Toroor, ole ma mi ne kergei ak ineendet eng' piik tugul?” Komwa piik tugul eng' kutit ne oo kole, “Ingwo keny laitoryat!”