A Samwɛl rɩka kaam tʋko, n pʋdg a Sol zugu, n mobg-a, n yeele: «Ka Naaba-Wẽnd n taag foom ne naam kaam, tɩ f yɩ a Israyɛl naab bɩ? Yaa foo n na n fãag Soaala pʋɩɩrã a bɛɛba sẽn gũbg-a wã nusẽ.
Dũnna, fo sã n bas maam n looge, fo na n sega dapa a yiibu, a Rasɛl yaooga sɛɛga, a Bẽnzame soolma toaagẽ, b na n yeel-f lame: ‹Bõeensã fo sẽn da kẽnge n na n tɩ bao wã, yãeeme la ade, marsã, f ba ka le tagsd bõeensã yell ye, b bʋʋda fo poorẽ n yetẽ: m biiga yelle na n yɩɩ wãna?›
Fo na n yii be, n yõsg n ta taoore, Tabor tɩɩg ning sẽn wẽnd kʋka tẽngre, bee, fo na n sega dapa a tã sẽn dabd Betɛl, n na n tɩ pʋʋs Wẽnd, t'a yembre tʋk bulli a tã, a yembre bur a tã, a yembr rãam ne ko-waooga.
F sã n yõsg be, f na n taa Wẽnd tãnga, Filisti rãmba sẽn ning b toaaga kugra zĩig ningã. Tẽnga pʋgẽ fo na n sega bãngdba sẽn yit maoonga zĩigẽ n watẽ, tɩ neb lʋɩ b taoore ne kʋnde la gãngãoog, la wɩɩs la pɛndga, tɩ bãmb meng wɩlemd bãngr goama.
la ade mam na n wa bʋʋga foom, n kʋ bark pʋʋsg la yũ-nood maando. Fo na n yalsa dasma a yopoe tɩ m yaool n wa f nengẽ n wilg-f f sẽn tog n maan bũmb ninga.»
A Sol sẽn ta Gibea, la bãngdb kʋʋngo sẽn sũ taaba n wa seg-a; la Naaba-Wẽnd pãng sig-a lame, a yama fʋsga a yĩngã t'a sɩng bãngr goam wɩlengo, bãmb sʋka.
La rũnna yãmb zãgsda y Wẽnnaama, sẽn yols yãmb ne bãas buud fãa, la namsgã buud fãa, la yãmb yet-b lame: ‹Ning dĩm d sʋka.› Marsã, wa-y Soaala-Wẽnd taoor ka, roogo fãa ne a neba, sak fãa ne a neba.»
A Samwɛl kɩtame t'a Bẽnzame sak kolge, yir woo yiri, la yaa a Matri yiri la b tees yã. Dẽ poore, yaa a Kis biiga a Sol la b yãk yã. B bao-a lame, la b pa yãend-a ye.
A Samwɛl yeela neba fãa: «Yãmb yãee Naaba-Wẽnd sẽn tũus a soaba bɩ? Nebã fãa sʋka, a ka tar a to ye.» La neba fãa zẽka b koɛɛg n kaase n yetẽ: «Wẽnd na wogl dĩma yõore!»
La nin-yaals me yaool n zĩnda be n yeele: «Bõe? Yão n na n fãag tõnd bɩ?» La b paoog-a lame: b ka wa ne b kũun n pʋʋs-a ye, la a Sol maana wala pa zab-a ye.