1
Nahashi eze Amọnụ kịha ndị-agha a d'a lụsọn obodo Jabẹshi-Gilẹdị rị Izrẹlụ agha. Ndị Jabẹshi nọ sị a, “Dodo kwehụ ẹnyi nkwa n'o nwẹn ihiẹn i k'e mẹ ẹnyi, nị ẹnyi gwarị femẹ ụnụ.”
2
Nahashi nọ sị, “Nkwa m jẹnkọ d'e kwe wụ nị m jẹnkọ d'a gụpụchanrịngụ ụnụ ile ẹnya ẹka-nni, gi ẹ gbe ifẹnrẹn kpu Izrẹlụ ile!”
3
Ndị ichẹn Jabẹshi nọ sị a, “Ye nwan ẹnyi akpọhịn ẹsa nị ẹnyi gi zigbarị Izrẹlụ ile ozini; omẹni onwọnni onyẹ bịa d'a zụọpụhanị ẹnyi, ẹnyi e we enwẹn ẹnyi ye ụnụ.”
4
Ogẹn ndị wẹ zi gi ru Gibia ebe Sọlụ bi, gwa ndị obodo hụ ihiẹn rị e mẹni, wẹ ile nọ kwansusu.
5
Ogẹn ahụn kẹ Sọlụ gihụ gha ugbo lụaha imẹ obodo, dukọ efin o gi a rụn ugbo; ọ nọ sị wẹ, “Kị rị e mẹ wẹ? Kị wẹ ri a kwannị?” Ya wẹ nọ gwa a ihiẹn ndị Jabẹshi ku.
6
Ogẹn Sọlụ gi nụ ihiẹnni, Mmọn Osolobuẹ nọ ban imẹ ẹ, okẹn olulu nọ bumẹ ẹ.
7
Ọ nọ gbu okẹn-efin ọrụn a ẹbụọ wẹ kẹngbama, jakịka wẹ, kpọn wẹ ye ndị ozi d'e we wẹ ghagbarị Izrẹlụ ile, ebe-lẹ-ebe wẹ ru, wẹ sị wẹ, “Ọnwan wụ ihiẹn jẹnkọ d'e mẹ okẹn-efin onyẹ ọwụlẹ jụ n'o sọnkọ Sọlụ lẹ Samuẹlụ jẹn agha.” Ya kẹ egun Osolobuẹ nọ bịa Izrẹlụ ile, wẹ ile nọ pụhachanrịn.
8
Ogẹn Sọlụ gi kpọnpụha wẹ nke agha imẹ Bẹzẹki, gụn wẹ, ndị ghasọnmẹ ebọn mmanaị Izrẹlụ pụha agha rị mmadụ nnụ-uku ọgụn-mmisẹn (300,000), ndị gha ebọn Juda sụọ rị nnụ-uku iri-kwasị-ọgụn (30,000).
9
Ya Sọlụ nọ nwan sị ndị hụ ndị Jabẹshi-Gilẹdị zihẹ, “Sị nị ndị Jabẹshi-Gilẹdị, ‘Anwụn gini d'e kẹnrẹn eki, a gbapụhagụọ wẹ ụnụ.’ ” Mgbe ndị hụ gi zi ndị Jabẹshi ozi hụ, ịghọghọ nọ jun wẹ obi.
10
Ya ndị Jabẹshi nọ sị ndị Amọnụ, “Ẹnyi lalaghọ ekile, nị ụnụ gi ẹnyi mẹ ihiẹn sụọ ụnụ.”
11
Hụn eki gihụ rị e fọn, Sọlụ nọ kebe ndị-agha a ụzọ ẹtọ, wẹ nọ gi ụz'ụtụntụn biribiri hụ zụnban ebe ndị-agha Amọnụ rị, gbu wẹ d'e ru ogẹn anwụn gi kẹnrẹnmẹ. Ndị-agha ndị Amọnụ nọ fe ohu-ohu, nke wụnị onwọnzini madụ ẹbụọ rị ụzọ ohu.
12
Ya ndị Izrẹlụ nọ sị Samuẹlụ, “Elee ndị wụ ndị ahụn sị, ‘Elee Sọlụ k'a wụ eze ẹnyi?!’ Wẹhẹ ni wẹ nwan, nị ẹnyi gbu wẹ!”
13
Kanị Sọlụ nọ sị wẹ, “Mba, onwọnni onyẹ w'e gbu tannị, makẹni Osolobuẹ a zụọpụhagụọ Izrẹlụ tannị!”
14
Ya kẹ Samuẹlụ nọ sị wẹ, “Pụha nị, nị ẹnyi shi Gil'galụ d'e biyezi ẹka eze Chuku kin Sọlụ.”
15
Ya wẹ ile nọ shi Gil'galụ, nọ ihun Osolobuẹ kin Sọlụ eze. Ya wẹ nọ chụnyesọnmẹ ẹjan-ekele ihun Osolobuẹ, Sọlụ lẹ ndị Izrẹlụ ile nọ ghọghọ ọda-ọda.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc