×

Biblia Ande Chib Romani 2018

1 Samuel 11

1
Mapalal avilo o Najas kai saia charo katar e phuv katar o Amon. Leke boñikura thodepe pasa o Jabes ando Galaad te marenpe lenchar. Ta sa e llene katar o foro o Jabes mangle te lacharenpe e Najasea, ta phende leke gia: Aide ta achi amenchar pe iek orba, ta amen ka ava che sluge.
2
Ta o Najas phenda lenge: Me ka achav tumenchar pe iek orba samo te ikanena tumare iak e chachi ta te kusena e Israele.
3
Ondaka e phure katar o foro o Jabes phende e Najaseke: De amen efta llive te sai bichala llenen pe sa o Israel. A te inai niko te marelpe pala amende, ka lla tute.
4
Ta kana avile e llene kai bichalde po Israel ando Gabaa, o foro kai zivila o Saul, phende saurrenge so nakhela. Ta sa e llene katar o foro thodepe te roven.
5
Ta isto kote avela o Saul katar o vos palal pala e guruva, ta puchla: ¿Soke sa roven? Ta phende leke so llangle katar e llene kai avile katar o foro o Jabes.
6
Kana o Saul asunda gala ezgode, o duo e Devleko avilo zurale pe lete ta lia le iek bari joli.
7
Ta lia dui guruva ta chinda len pe kotora. Ta bichalda llenen te inllaren e kotora pe sa e phuv katar o Israel, ta te phenen: Gia ka cheren e guruvenchar katar gola llene kai ni ka llan e Saulea ta e Samuelea. Ta sa e llene katar o foro daraile but, ta sa likiste ande iek mislo.
8
O Saul llinda len ando Bezek. E llene katar o Israel sea trin stotine milie, ta e llene katar o Juda sea tranda milie.
9
Ta phende e llenenge kai avile katar o Jabes: Phenen e llenenge katar o Jabes kai thiara kana ka pekarel o kham, tumen ka aven braduime. Ta gola llene avile ando Jabes ta phende e foroke so phendea lenge, ta sa o foro veselisailo but.
10
Ta e llene katar o Jabes phende pe dusmanonenge: Thiara amen ka lla tumende te sai cheren amenchar sogo kamena.
11
Thiarinako o Saul fulada e boñikonen pe trin, ta mai anglal te likel o kham die pe amonitura ta marde len llik kana pekarda o kham. Ta e amonitura nasle ta sa fuladile iek averetar.
12
Ondaka o foro phenda e Samueleke: ¿Ko si gola llene kai phenena: O Saul ka gazdaril pe amende? Anen len karinga ta ka mundara len.
13
Ta o Saul phenda: Niko ni ka merel allive, soke o Del braduisarda e Israele.
14
Ta o Samuel phenda e foroke: Aven sa ando Gilgal te chera pale incha e charoina.
15
Ta sa o foro llelo ando Gilgal ta thode e Saule charo angla o Del. Ta die ofrende te sai o Del prostil. O Saul ta sa e llene katar o Israel veselisaile but.
Romani Ursari Bible 2018
Biblia ande chib Romani Sociedad Bíblica Chilena, 2018
:
Save Notes