Ndaa mo jonta yeeso mooɗon ngam o ardo on. Min kam mi ndottiijo, marɗo dandanndi. Ɓiɓɓe am ɗon ngondi bee mooɗon. Mi huuwi yeeso mooɗon diga nderkaaku am haa wargo hannde.
Samuyila wi'i ɓe: “To non kam, sey mi wullo on yeeso Jawmiraawo. Sey mi siftinora on kuuɗe booɗɗe ɗe Jawmiraawo huuwani on, onon e kaakiraaɓe mon. Nde Yaakubu e yimɓe saare mum ngari haa Misra, nde kaakiraaɓe mon tori Jawmiraawo ballal, saa'i maajum o nelani ɓe Muusa e Haruna. Bee juuɗe worɓe ɗiɗo ɓe'e o wurtiniri ɓe lesdi Misra, o hokki ɓe joonde nder lesdi ndi'i.
Ɓe tori Jawmiraawo ballal, ɓe mbi'i: Min mbaɗi hakke, yaa Jawmiraawo, ngam min ngudini ma, min ndewi suuraaji Ba'al e Astarot. Ammaa jonta hisnu min juuɗe konne'en amin, nden kam min njagganto ma an feere ma.
Ammaa nde ngi'ɗon Nahas, laamiiɗo Ammooni'en ɗon wara ngam haɓugo bee mooɗon, on mbi'i yam: Sey min keɓa laamiiɗo. On ngejjiti Allah Jawmiraawo mon woni laamiiɗo mon.
Naa jonta ɗum wakkati codol alkamaari na? Bee non fuu mi toroto Jawmiraawo, kaŋko boo o neldan diggaali e iyeende. To ɗum waɗi, on anndan no kaɓɓotiral mooɗon ɗaɓɓugo laamiiɗo halliri yeeso Jawmiraawo.”
Ɓe mbi'i Samuyila: “Useni, torana min Allah Jawmiraawo ma, ngam taa min maaya. Fakat min marɓe hakke, dow maajum fuu min ɓesdi halleende bee ɗaɓɓugo laamiiɗo.”