Ụnụ e nwọngụọ nwan eze k'e duni ụnụ. O mẹ nke m, a kagụọ m ẹgẹdi, isi e pugụọ m ẹwọ; ụmụ m nkẹ hụ imẹ igunrun ụnụ ebeni. E duọlẹ m ụnụ kete m wụ nwata d'e rukwọ nwan tannị.
M wuzohụ nwan ebeni: Nọ nị nwan ihun Osolobuẹ lẹ onyẹ o tumẹ shịagbu m ẹri. Onyẹ kẹ m narịn efin ẹ? Onyẹ kẹ m narịn jaki ẹ? Onyẹ kẹ m mẹgbu? Onyẹ kẹ m bịangbu? Onyẹ kẹ m narịn egho-azụụn kẹni m fepụ ezioku ẹnya? Gwa nị m hụn ọwụlẹ m mẹ imẹ ihiẹn ndịnị, m k'e dọnzi ẹ.”
“Kanị, o mẹgụ, wẹ nọ zọ Osolobuẹ wụ Chuku wẹ, ya ọ nọ we wẹ ye Sisẹra, ọkị-agha Hazọ; o wezighọ wẹ ye ndị Filistia lẹ eze ndị Mụabụ, hụn ndịnị ile gi lụsọn wẹ agha ogẹn rị ichẹn-ichẹn.
Ya wẹ nọ kwanghọsị Osolobuẹ, sị, ‘Ẹnyi e mẹọlẹ njọ; ẹnyi a latọgụọ Osolobuẹ, femẹ Baalụ lẹ Ash'ta. Ka gbapụha ẹnyi nwan ẹka ndị-iṅẹnrẹn ẹnyi, ẹnyi jẹnkọ d'e fe i.’
Osolobuẹ nọ zihẹ Jeru-Baalụ wụ Gidiọnụ; o zihẹzi Barakị; o zihẹ Jẹfta, o zihẹzi nwan Samuẹlụ: o zihẹ wẹ ile d'a gbapụha ụnụ ẹka ndị-iṅẹnrẹn ụnụ azụụn ile, ẹhụ nọ fu ụnụ.
“Kanị ogẹn ụnụ gi hụn nị Nahashi wụ eze Amọnụ e d'a maye ụnụ, ụnụ nọ bịa d'e kunrun m, sị m, ‘Isi-wụ-isi, ẹnyi chọ eze jẹnkọ d'a kị ẹnyi,’ ọ sụọn'a nị Osolobuẹ wụ Chuku ọnụ wụ eze ụnụ.
Omẹni ụnụ a tụghọ egun Osolobuẹ, e fe ẹ, e mẹ ihiẹn o ku; omẹni ụnụ apanị oku ẹ, omẹni ọnụ lẹ eze rị a kịnị ụnụ e sọnghọ Osolobuẹ wụ Chuku ụnụ, ọ hụghọ mma!