Mam kẽna yãmb taoore, al m yãadmẽ n ta rũnna. Ad ma! Togs-y-ma, Soaala-Wẽnd taoore, la b sẽn sõog a soab naam kaama taoore: ãnda la m yẽeg n deeg a naafo, n deeg a bõanga? Ãnda la m weoog yã, la ãnd soab la m tall toogo? Ãnda nengẽ la m deeg ligdi n mum m nini n kedb bʋʋdo? M na lebs-y y ligdi.»
A Zakoob sẽn wa Ezipt tẽnga, Ezipt rãmb namsa y ba rãmba la b kelma Naaba-Wẽnde. B tʋma a Moyiiz ne a Aarõ tɩ b tɩ yiis-b Ezipt tẽnga, n tall-ba n wa zĩndig zĩ-kãnga.
La bãmb yĩma Wẽnnaam, b Soaala, tɩ b na n bas ba tɩ b lʋɩ, Asor zabrẽ, dĩm a Sisera nugẽ, la b lʋɩ Filisti rãmba la Moab dĩma sẽn kaoog zabre ne bãmb nusẽ.
B kelma Soaala-Wẽnd taoore n yetẽ: ‹Tõnd beegame, tõnd basa Soaala-Wẽnd n nok a Baal la Astarte rãmba. Marsã, fãag-y tõndo d bɛɛb nusẽ tɩ tõnd na waoog yãmba.›
La yãmb sẽn yãe t'a Naas, Amonitsa dĩma, yiisa tãpo, n wat n na n zab ne yãmba, yãmb yeela maam: ‹Ad-y tõnd me rata dĩma sẽn na n dɩ naam d zugu.› Naaba-Wẽnd n yaool n ya yãmb dĩma.
yãmb sã n pa kɩɩsd b gomde, n kell n mobg bãmba, yãmb ne y dĩma yam na kẽ Wẽnnaam. La yãmb sã n pa sakd b koɛɛga, yãmb sã n kɩɩsd b gomde, b nug na n sɩbga yãmba, wala b sẽn sɩbg y saam-dãmbã.
Marsã ka saas wẽnd ye, yaa alkam kẽebg wakato. Mam na n pʋʋsa Naaba-Wẽnde, la b na tʋma sa-tãse la saaga. Bɩ y bãnge la y gese, tɩ y konga wʋsgo, Soaala-Wẽnd taoore, y sẽn kos tɩ b kõ yãmb dĩma.»
La b fãa yeela a Samwɛl: «Pʋʋs Naaba-Wẽnd n kõ f yemsã, tɩ b ra ki ye, tɩ tõnd sẽn kos tɩ b kõ-d dĩma, d maana yel-wẽnde, n paas yel-wẽn a taaba.» A Samwɛl yeela neba fãa:
Da bas-y bãmb tũudem ye, tɩ sã n pa rẽ, yãmb na n zoe n pʋga bõn-yood sẽn ka võore, sẽn kõn zĩnd yõod yãmb yĩnga, la sẽn kõn fãag yãmba, tɩ b yaa wẽn-faado.