Kate sem me. Fiko te phenel angla o Del ta angla tumaro charo dal liem tumendar iek guruv, o liem iek magarcho, o diem orba kojamni fikatar, o cherdem bilachipe fikake, o pochinda mange vareko te chinav iek kris bangi. Te si gia, me ka iriv e love.
Ondaka o Samuel phenda e foroke: O Del kai ikharda e Moisese ta i e Aarone te aven leke sluge. Kai ikanda tumare daden katar o Ejipto, vou dikhel akana.
Kana o Jakob dia ando Ejipto, tumare dada urkindo ikharde e Devle soke e ejipsiura patina len, ta o Del bichalda e Moisese ta e Aarone, kai ikande tumare daden katar e phuv katar o Ejipto, ta cherde len te zivin pe gaia phuv.
A von bristardepe e Devletar, ta o Del dukhada len e Sisaraea, kai saia gazda e boñikonengo katar o charo Jabin, kai saia katar e phuv katar o Jazor. Ta dukhada len e filisteonenchar, ta dukhada len e charoia katar e phuv katar o Moab. Sa gala avile te marenpe lenchar.
A von mangle urkindo e Devletar, ta phende: Amen cherdam o bilachipe soke muklam e Devle ta blagosisardam avere delen kai ikhardon Baal ta Astarot. Ta von molisaile e Devleke te braduil len katar lenge dusmanura, ta achile pe orba kai ka blagosin samo e Devle.
Ondaka o Del bichalda e Jerubaale, e Barake, e Jeftee ta e Samuele te braduil tumen katar tumare dusmanura kai sea truial. Mapalal tumen zivisarden esmiro.
Kana tumen dikhlen kai o Najas, kai saia charo katar e amonitura, avilo te marelpe tumenchar, tumen phenden mange: Iok, amen manga te gazdaril pe amende iek charo. Ta o Del si tumaro chachuno charo.
Te si kai tumen blagosin e Devle, asunen leke alava. Cheren leki volia, ta tumen ta o charo kai charoil pe tumende, samo blagosin e Devle. Te si gia, ka cheren o lachipe.
¿Inai akana o vreme kana chiden o lliu? Me ka ikharav e Devle, ta vou ka cherel te germil ta te delpeke, te dikhen ta te llanen kai tumaro bilachipe kai cherden angla o Del si but baro, soke tumen manglen iek charo.
Ondaka sa o foro phenda e Samueleke: Molisao e Devleke pala amende, te na mera. Soke pe sa o bilachipe kai cherdam, aver bilachipe cherdam, kai amen manglam iek charo.