Saulo noyiero ji alufu adek kuom jo-Israel, mondo ji alufu ariyo kuomgi obed kode Mikmash, kendo e piny gode mag Bethel, to alufu achiel obed gi Jonathan wuode, Gibea, dala jo-Benjamin. Ji moko duto to noweyo, modok miechgi.
mi jo-Israel duto nowinjo ni Saulo osenego jatend jolweny mag jo-Filistia, kendo ni jo-Filistia ojok kodgi. Omiyo ne giwakore ir Saulo, mane oyudo ni Gilgal.
Jo-Filistia nochokore mondo oked gi jo-Israel. Ne gin gi geche alufu piero adek, gi joidh farese alufu auchiel, kod ji mathoth ka kuoyo mae dhonam. Ne gidhi Mishmash, mi gijot kuno, yo wuokchieng’ mar Bethaven.
To kane jo-Israel oneno ka wach otamo wang’gi, nikech nothung’gi ahinya, ne gipondo kamoro amora mane ginyalo tonyie, kaka buche gi bunge gi bugni kod sokni, kendo e kind lwendni.
Samuel nopenje niya, “En ang’o misetimoni?” Saulo nodwoke niya, “Naneno ka ji ke a kuoma, to bende in ne ok ibiro kaka ne ichiko, kendo jo-Filistia chokore Mikmash.
Samuel nowacho ni Saulo niya, “Itimo tim mofuwo. Ok iserito chik mane Ruorh Nyasaye omiyi. Da bed ni iserito chikne, to da oguro lochni e Israel nyaka chieng’.
To koro lochni ok nosiki. Ruoth Nyasaye osedwaro ng’at ma chunye mor godo, kendo osekete mondo obed jatend joge, nikech ne ok irito gima ne Ruoth Nyasaye ochiki.”
Eka Samuel noa Gilgal, modhi adhiya. Saulo bende noa kuno, mowuotho kochomo kambi mar lweny, ka ji duto modong’ luwo bang’e. Kane ochopo Gibea, dala jo-Benjamin, nokwano joma ne ni kode, monwang’o ni gin ji ma dirom mia auchiel.
Omiyo kane ndalo mar lweny ochopo, ne ok nyal yud ligangla kata tong’ e lwet ji duto mane ni kod Saulo gi Jonathan, to mak mana Saulo gi Jonathan kende ema ne nigi gilweny.