×

現代台語譯本漢字版

撒母耳記上 14

1
有一日, 掃羅 的子 約拿單 給攑伊的軍器的少年人講:「咱來去 非利士 人的軍營彼旁。」毋拘 約拿單 無給伊的老父講。
2
掃羅 佇 基比亞 的郊外,坐佇 米磯崙 的石榴樹腳;隨伊的人約有六百。
3
閣有 亞希突 的子 亞希雅 帶以弗得來佇遐。伊是 以迦博 的兄哥, 非尼哈 的子,是曾佇 示羅 做上主祭司的 以利 的孫。無人知 約拿單 已經離開營地。
4
約拿單 欲去 非利士 的軍營著經過的隘口,兩旁攏是尖尖真崎的石壁,一個叫做 播薛 ,一個叫做 西尼 ;
5
北旁的石壁及 密抹 相對,南旁的石壁及 迦巴 相對。
6
約拿單 給攑伊的軍器的少年人講:「來,咱來去無受割禮的人的軍營遐,可能上主會幫贊咱,因為上主互人得勝毋是在佇人多人少。」
7
攑軍器的給伊講:「我及你同心,你照你所愛的去做;你做前,我隨你。」
8
約拿單 講:「來!咱過來去𪜶遐,互𪜶看著咱;
9
𪜶若給咱講『徛咧!等阮過去』,咱就定定徛啲,上去。
10
毋拘𪜶若講『來阮遮』,咱就上去;這是上主將𪜶交佇咱的手的記號。」
11
𪜶兩人就刁故意互 非利士 防守的兵看著; 非利士 人講:「你看, 希伯來 人對𪜶匿的洞出來啦。」
12
防守的兵給 約拿單 及攑軍器的人講:「恁過來,阮欲互恁知死 。」 約拿單 就給攑軍器的講:「你隨我上去;因為上主已經將𪜶交佇 以色列 人的手。」
13
約拿單 就手擒腳踜𬦰起去,攑軍器的隨伊。 約拿單 拍倒 非利士 人,攑軍器的隨後面刣死𪜶。
14
第一遍突擊, 約拿單 及攑軍器的佇四分一公頃內刣死約二十人。
15
所有的 非利士 軍兵,無論佇軍營,佇野外;無論防衛的,突擊的,攏驚甲皮皮惙;大地嘛搖動,這是上帝降落互𪜶的大恐怖。
16
佇 便雅憫 地區的 基比亞 , 掃羅 的哨兵看著 非利士 軍兵四散,四界亂闖。
17
掃羅 給隨伊的軍兵講:「恁點算,看啥人對咱遮出去。」𪜶算了,就知 約拿單 及給伊攑軍器的人無佇遐。
18
掃羅 給 亞希雅 講:「你將上帝的約櫃扛來。」彼陣上帝的約櫃佇 以色列 人遐。
19
掃羅 及祭司講話的時, 非利士 營中喊喝的聲愈來愈大。 掃羅 就給祭司講:「免啦!𣍐赴問囉!」
20
掃羅 及隨伊的軍兵攏聚集來到戰場,看著 非利士 人互相殘殺,大混亂。
21
以前倚 非利士 人,對逐所在來到𪜶營中的 希伯來 人,現在反倒轉來幫贊隨 掃羅 及 約拿單 的 以色列 人。
22
許個匿佇 以法蓮 山區的 以色列 人聽著 非利士 人逃走,就出來追殺𪜶,及𪜶交戰。
23
彼日上主互 以色列 得勝;戰爭延續到 伯‧亞文 彼旁。
24
彼日 以色列 人枵甲真艱苦,因為 掃羅 有咒誓,命令軍兵講:「無等到日暗,我給對敵報冤仇了就食物件的人著受咒詛。」所以軍兵攏無食什麼。
25
𪜶入樹林,發見此所在土腳攏有蜜。
26
軍兵入樹林,看著有蜜啲滴,毋拘無人敢用指頭仔挖來食,因為驚受咒詛。
27
約拿單 無聽著𪜶老父的咒誓,所以伸枴仔尾揬蜜房,然後用指頭仔挖來食,目睭就金,回復元氣。
28
有一個軍兵對伊講:「你的老父有嚴嚴咒誓命令軍兵講:『今仔日食物件的著受咒詛。』所以軍兵真厭倦。」
29
約拿單 講:「阮老父有害著咱諸個軍兵。恁看,我干焦啖一點仔蜜,就回復元氣;
30
今仔日若出在軍兵食𪜶給對敵搶來的食物,豈毋是閣較有力通拍死較多 非利士 人?」
31
彼日,𪜶拍敗 非利士 人,對 密抹 趕到 亞雅崙 ;軍兵非常厭倦。
32
軍兵闖去掠所搶的牛、羊、牛仔子,就佇遐刣,食含血的肉。
33
有人給 掃羅 報告:「軍兵有犯罪違背上主,因為𪜶食含血的肉。」 掃羅 大聲喝:「恁得罪上主啦!今去翱一塊大石來遮。」
34
掃羅 閣講:「恁著去叫逐個軍兵牽𪜶的牛及羊來我遮,佇遮刣來食;毋通食含血的肉來得罪上主。」彼暝軍兵攏牽𪜶家己的牛去遐刣。
35
掃羅 給上主起一座祭壇;這是伊頭一遍給上主起的壇。
36
掃羅 講:「今咱著透暝落去趇 非利士 人,給𪜶搶,直到天光,給𪜶攏刣死,連一個都毋通留啲。」 軍兵講:「你看做好的,就照按呢做。」 祭司講:「咱著代先問上帝。」
37
掃羅 就問上帝:「我著落去趇 非利士 人無?你豈會給𪜶交互 以色列 人?」彼日上帝無應伊。
38
掃羅 講:「恁軍隊的官長攏來我遮,查明咱今仔日有犯著什麼罪。
39
我指互 以色列 勝利的永活的上主咒誓:『犯罪的人攏著死,甚至我的子 約拿單 ,嘛著死。』」毋拘無人應伊。
40
伊就給 以色列 眾人講:「恁徛彼旁,我及我的子 約拿單 徛此旁。」 軍兵對 掃羅 講:「你看做好的,就照按呢做。」
41
掃羅 對上主 — 以色列 的上帝講:「求你指示實情,看啥人有罪。」𪜶就抽著 約拿單 及 掃羅 ,軍兵無代誌。
42
掃羅 講:「著佇我及我的子 約拿單 中間抽看啥人有罪。」𪜶抽著 約拿單 。
43
掃羅 給 約拿單 講:「你給我講,你有做什麼代誌。」 約拿單 講:「我確實有用枴仔尾挖一點仔蜜來啖。我甘願死。」
44
掃羅 講:「 約拿單 ,你一定著死;若無,願上帝加倍責罰我。」
45
軍兵給 掃羅 講:「 約拿單 有互 以色列 得著大勝利,伊豈著死?絕對毋通!阮指永活的上主咒誓,伊連一支頭毛都𣍐用得互伊落落土腳,因為伊今仔日所做的有上帝的幫贊。」按呢,軍兵救 約拿單 免死。
46
掃羅 無閣追趇 非利士 人; 非利士 人就轉去𪜶本所在。
47
掃羅 確立 以色列 王權了後,去攻打周圍所有的對敵,就是 摩押 人、 亞捫 人、 以東 人、 非利士 人,及 瑣巴 的諸王;伊百戰百勝 ,拍到叨位贏到叨位。
48
掃羅 奮勇拍敗 亞瑪力 人,救 以色列 脫離搶劫𪜶的人的手。
49
掃羅 的子有 約拿單 、 亦施韋 、 麥基‧舒亞 ;伊有兩個查某子,大的叫做 米拉 ,細的叫做 米甲 。
50
掃羅 的某叫做 亞希暖 ,是 亞希瑪斯 的查某子;伊的元帥叫做 押尼珥 ,是 掃羅 的阿叔 尼珥 的子。
51
掃羅 的老父 基士 , 押尼珥 的老父 尼珥 ,攏是 亞別 的子。
52
掃羅 一生常常及 非利士 人有劇烈的交戰;伊看著強猛的人及勇士,攏招集𪜶加入伊的部隊。
Chinese TTVH 2021
The Bible Society in Taiwan, 2021
:
保存笔记