Dahin shɛli ka Jɔnatan daa ti yɛli nachimbil’ so ŋun ʒir’ o tɔbutuhiri’ nɛma, “Kamina ka ti chaŋ Filistia tɔbbi’ shɛb’ bɛn be yaɣili ŋɔ polo ha nim’ sani.” Amaa o daa bi saɣi yɛl’ o ba.
Ka maligumaana Ahija ŋun daa nyɛ Ikabɔd biɛli Ahitub bia la daa mali tan’ shɛli din ŋmani mukuru la lɔr’ o shee ni. Ahitub daa nyɛla Finɛhas bia ka nyɛ Ɛli ŋun daa nyɛ Yawɛ maligumaana Shilo la yaaŋa. Ka niriba maa so daa bi baŋ ni Jɔnatan chaŋya.
Jɔnatan ni daa yɛn doli so’ shɛli chaŋ Filistia tɔbbihi maa sani maa zuɣu tampiŋ kara ayi n-daa doya; yini daa dola yaɣili ka yini mi do yaɣ’ din’ la. Tampiŋ yini yuli daa boonila Bɔzɛz ka yini mi yuli booni Sɛne.
Ka Jɔnatan daa yɛli nachimbil’ so ŋun ʒir’ o tɔbutuhiri’ nɛma maa, “Chɛ ka ti baai du n-chaŋ Filistianim’ bɛn bi gundi ŋɔ tɔbbihi ŋɔ suɣa ŋɔ ni, di pa shɛli Yawɛ ni tum tuma ti ti, dama binshɛli kani din ni chɛ ka Yawɛ ku zaŋ niriba pam bee niriba biɛla tum tiliginsim tuma.”
Ka nachimbil’ ŋun daa ʒir’ o tɔbutuhiri’ nɛma maa yɛl’ o, “Niŋm’ a suhu ni yɛl’ a ni a niŋmi shɛlikam zaa, dama m be a sani, ka a suhu ni kul be shɛm, lala ka n gba suhu be.”
Ka bɛ niriba ayi maa daa zaŋ bɛmaŋ’ wuhi Filistia tɔbbihi maa, ka Filistianim’ maa daa yɛli, “Nyamiya, Hiburunim’ la yiri bɛ ni sɔɣi bɛmaŋ’ vo’ shɛŋa la ni na.”
Ka tɔbbihi maa daa kuhi bahi Jɔnatan min’ o tɔbutuhiri’ neenʒira maa zuɣu n-yɛli, “Dumiya ka ti sanna ka ti wuhi ya binshɛli.” Ka Jɔnatan daa yɛl’ o tɔbutuhiri’ neenʒira maa, “Doli n nyaaŋa na, dama Yawɛ zaŋ ba niŋ Izraɛlnim’ nuu ni.”
Di saha ka Jɔnatan daa zaŋ o nuhi ni o naba n-gbam du, ka o tɔbutuhiri’ neenʒira maa dol’ o nyaaŋa. Ka Jɔnatan daa ti ŋmɛri ba luhiri ka o tɔbutuhiri’ neenʒira maa mi dol’ o nyaaŋa kuri ba.
Ka bɛn daa be sansani maa ni mini bɛn daa be mɔɣu ni ni niriba maa zaa suhuri dii fuŋ, ka tɔbbihi zaŋ tabili ŋmɛnditoya zaa niŋgbuna sɔhira ka tiŋgbani daa dam, ka bɛ yɛma ŋma pam.
Di saha ka Sool daa yɛli ninvuɣ’ shɛb’ bɛn’ be o sani maa, “Kalimiya niriba maa n-nya ninvuɣ’ banima n-lee yi ti ni chaŋ.” Ka bɛ daa kali ba n-nya ka Jɔnatan min’ o tɔbutuhiri’ neenʒira maa n-kani
Sool ni daa kul yɛri maligumaana maa lala saha shɛli maa, ka Filistianim’ maa zɔbu yiriŋ mini bɛ vuri maa daa kul maan pahira; ka Sool daa yɛli maligumaana maa, “Chɛl’ li.”
Di saha ka Sool mini ninvuɣ’ shɛb’ bɛn zaa daa be o sani maa dii lu tɔb’ tuhibu soli. Ka niriba maa zaa daa gbaai tab’ tuhibu, dama bɛ daa birimya pam.
Ka Hiburunim’ bɛn daa pun be Filistianim’ sani hal ti paai tɔb’ maa tuhibu saha maa mini bɛn daa pahi doli ba chaŋ bɛ sansani maa ni zaa daa dii ŋmaligi pahi Izraɛlnim’ bɛn daa be Sool mini Jɔnatan sani maa zuɣu.
Ka Izraɛlnim’ dɔbba shɛb’ bɛn daa zo nti sɔɣi Ifriim tiŋgban’ ni zoya tinsi ni la gba ni daa wum ni Filistianim’ maa ŋmaligi guui n-zɔri ni bɛ tiligi maa, ka bɛ gba daa dii lo kpara zo n-doli tuhiri ba.
Ka di daa gbarigi Izraɛlnim’ maa pam dindali maa; dama Sool daa pola pɔri yɛli, “Ŋunkam di bindirigu ka wuntaŋ’ na bi lu n ni bɔhiri n dimnim’ biɛri dahin’ shɛli ŋɔ, noli din’ dim’ o.” Lala zuɣu niriba maa ni so noli daa bi to bindirigu.
Amaa Jɔnatan ŋun’ daa bi wum o ba ni po pɔri yɛli niriba maa shɛm maa, dinzuɣu ka o daa zaŋ jaaŋgbee din be o nuu ni tu shigbaŋ maa n-zaŋ o nuu nyɛhi li ti kpar’ o nol’ ni, ka o nini neei zaa.
Di saha ka niriba maa ni yino daa yɛli, “A ba pola pɔri yɛli niriba, ‘Ŋunkam di bindirigu zuŋɔ dabisili ŋɔ, noli din’ dim’ o.’ ” Niriba maa daa kul gbarigimi zaa.
Ka bɛ daa kab’ chaŋ bɛ ni daa tuhi fa neen’ shɛŋa maa gbini nti kɔri piɛri mini naɣilahi ni naɣinyama sɔŋ, ka niriba maa daa ŋub’ ba, bɛ mi daa bi kɔri ba viɛnyɛliŋga.
Ka bɛ daa yɛli Sool, “Nyama, niriba maa ni ŋubiri nimdi maa shɛm maa, bɛ tumdila alahichi Yawɛ sani maa, dama bɛ bi kɔri ba viɛnyɛliŋga.” Ka o yɛli ba, “Yi nyɛla nyaanyiriba, bilimmiya kuɣ’ titali sɔŋ ma kpe na.”
Ka Sool daa lan yɛli ba, “Wurimmiya chaŋ niriba maa sani ti yɛli ba, ‘Sokam zaŋm’ o naɣilaa bee o piɛɣu na nti kɔrigi kpe ŋubi, ka di ŋubiriya nim’ shɛli bɛ ni bi kɔrigi viɛnyɛliŋga ka di zuɣu chɛ ka yi tum alahichi Yawɛ sani.’ ” Di saha ka sokam daa zaŋ o naɣilaa bee o piɛɣu na dindali maa yuŋ nti kɔrigi nimaani.
Di saha ka Sool daa yɛli ba, “Chɛliya ka ti doli Filistianim’ maa yuŋ ŋɔ n-tuhi ba, ka di nɛma hal ka biɛɣu ti neei, ti di chɛ ka bɛ ninvuɣ’ yino gba kpalim.” Ka niriba maa daa yɛli, “A ni nya ka shɛli viɛl’ a sani nyin’ niŋmi li.” Amaa ka maligumaana la daa yɛli ba, “Chɛliya ka ti bɔhi Naawuni kpe nya.”
O daa lan yɛli, “Yawɛ ŋun be ka tiligi Izraɛlnim’ ŋɔ zuɣu, biɛhiŋ kani, n ni ku m bia Jɔnatan, hal Naawuni ni kul chɛ ka ti nya tiliginsim ŋun Jɔnatan kɔbili ni maa zaa yoli.” Amaa ka niriba maa zaa so daa bi garig’ o.
Ka o daa lan yɛli Izraɛlnim’ zaa, “Labimiya yaɣ’ yini polo, ka m mini m bia Jɔnatan mi labi yaɣ’ yini polo.” Ka niriba maa daa yɛli Sool, “A ni nya ka shɛli viɛl’ a sani, nyin’ niŋmi li.”
Dinzuɣu ka Sool daa yɛli, “Yawɛ ŋun nyɛ Izraɛlnim’ Naawuni ŋɔ, bɔ n-niŋ ka a bi garigi mani ŋun nyɛ a dabili ŋɔ zuŋɔ dabisili ŋɔ? Taali ŋɔ yi nyɛla m mini m bia Jɔnatan taali, nyin’ tim’ ti Urim, ka di mi yi nyɛla a niriba ŋɔ taali, nyin’ tim’ ti Tumim.” Ka di daa gbaala Jɔnatan mini Sool, ka niriba maa nuu daa yi.
Di saha ka Sool daa yɛli Jɔnatan, “Yɛlim’ ma a ni niŋ shɛli.” Ka Jɔnatan yɛl’ o, “N di zaŋla jaaŋgbee din be n nuu ni n-suɣi shiri di, dinzuɣu n-nyɛ ma, m mali shili ni n kpi.”
Ka niriba maa daa yɛli Sool, “A yɛn kula Jɔnatan ŋun tuhi di nasara titali n-ti Izraɛl tiŋgbɔŋ ŋɔ? Din’ kariya! Hal ka Yawɛ ŋun be ŋɔ zuɣu, Jɔnatan zabigu zaɣ’ yini gba ku yi o zuɣu ni lu tiŋa; dama Naawuni m-be o sani n-chɛ ka o tum tuun’ shɛli o ni tum zuŋɔ ŋɔ.” Ka niriba maa daa fa Jɔnatan bahi, ka o bi ku o.
Sool ni daa ʒini Izraɛl nam ʒiishee, o daa tuh’ o dimnim’ bɛn be bɔba ni yaɣa ni zaa. O daa tuhi Mɔabnim’ mini Ammɔnnima ni Ɛdomnima ni Zɔba nanima ni Filistianima; o ni daa tuhi shɛb’ zaa, o daa dila nasara.
Sool bidibisi daa nyɛla Jɔnatan mini Ishivi ni Malikishua; ka o bipuɣins’ ayi mi yuya daa booni Mɛrab, ŋuna n-daa nyɛ o bipuɣin’ kpɛma, ka biasani mi yuli booni Mikal.
Sool ʒiɛman’ ni zaa, o mini Filistianim’ daa kul tuhirimi ni nimmoo, dinzuɣu o daa yi kul nya do’ so ŋun mali kpiɔŋ bee suhukpeeni o zaŋd’ o mi leeg’ o tɔbbia.