Ni khat chu Saula fapa Jonathana chuan a râlthuam kengtu hnênah, “Hawh, râl lehlama Filistia sipai hmunah sâwn i va kal teh ang,” a ti a. A pa chu a hrilh lo va.
Puithiam Ahija pawh puithiam kawr hain a awm bawk a. Ani hi Silo khuaa Lalpa puithiam, Elia fa Finehasa fapa Ikaboda unaupa Ahituba fa a ni. Jonathana chu râl lehlamah a kal tawh tih tu mahin an hre lo.
Jonathanan a râlthuam kengtu tlangvâl hnênah chuan, “Hawh, serh tan lohho awmnaah sâwn i kal teh ang, Lalpan min ṭanpui ngei ang. An tam emaw, an tlêm emaw Lalpa tân min hnehtîr harsatna eng mah a awm lo,” a ti a.
Tichuan, an pahnihin Filistia sipaiho hmuh tûrin an va inlan a. Filistia mite chuan, “En teh u, Hebrai mite an bihrûkna hmun ata an lo chhuak e,” an ti a.
Vênbûka sipaite chuan Jonathana leh a râlthuam kengtu chu an au va, “Lo chho teh rêng u, in hre mai ang,” an ti a. Jonathana chuan a râlthuam kengtu hnênah chuan, ‘Mi rawn zui chho rawh, Lalpa chuan anni chu Israel-te kutah a pe ta e,” a ti a.
Jonathana chu a vâk chho ta a, a râlthuam kengtu chuan a zui zêl a. Jonathana hmaah chuan anni chu an tlu ta zawih zawih a, a hnungah a râlthuam kengtu chuan a rawn that zêl a.
Sipai zawng zawng, riahbûka awm te, phûla awm te, vênbûka awm te, hmatâwng pâwlte chu an chiai a, an buai ta mur mur a. Lîr te a nghîng a, Pathianin manganna nasa tak a thlentîr ta a.
Saula chuan a sipaite hnênah, “Inchhiar ula, tute nge kim lo han en teh u,” a ti a. An han inchhiar chuan Jonathana leh a râlthuam kengtu chu an lo awm ve lo va.
Tichuan, Saula leh a hnêna mipui awmte chu an pung khâwm a, indona hmunah an kal ta a. Ngai teh, Filistia mite chu anmahni leh anmahni khandaihin an lo inbei chiam a, an buai nuai nuai a.
Chutiang bawkin Efraim tlângrama Israel mi, biru zawng zawng pawh chu Filistia mite an tlânchhia tih an hriatin indonaah chuan an lo tel ve a, an rawn ûm ve nghâl a.
Saulan mipuite chu a vau va, “Ka hmêlmate chunga phuba ka lâk ni hian khaw thim hmaa chaw ei chuan ânchhia dawng rawh se,” a tih avângin chumi ni chuan tu man eng mah an ei lo, Israel-te chu an chau hle a.
An zînga mi pakhat chuan a hnênah, “I pain hetiangin min vau asin, ‘Tu pawh, vawiina chaw ei apiangin ânchhia dawng rawh se,” a tih avângin mite chu an chau zo ta a nih hi,” a ti a.
“Mite hian an hmêlmate laka an thil lâk hi an duh duhin vawiin hian ei sela chu an chak phah ang a, Filistia mite hi kan that tam lehzual tûr’” a ti a.
Saula hnênah, “Mite chuan thisen chawpin sa an ei a Lalpa lakah thil an tisual ta e,” tiin an sawi a. Ani chuan, “Dik lo takin thil in ti ta a ni, hetah hian lung min han lâk teh u,” a ti a.
Saulan chûng mite hnênah chuan, “Vâk darh ula, mi hnênah, ‘mi tinin bâwngpa leh berâm han la sela, hetah hian talh sela, ei rawh se. A thisen chawpa eiin Lalpa chungah thil tisual suh u,’ tiin hrilh rawh u,” a ti a. Chumi zân chuan an bâwngpa an rawn kai ṭheuh va, chutah chuan an talh a.
Saula chuan, “Zânah Filistia mite chu bei ila, zîng khaw ên thlengin i bei ang u, tu mah zuah tûr a ni lo,” a ti a. Anni chuan, “Ṭha i tih ang chuan ti rawh,” an ti a. Puithiam erawh chuan, “Pathian i râwn rih ang u,” a ti a.
Lalpa, Israel-te chhanhimtu, mi nunga chhâlin ka sawi e, ka fapa Jonathana tihsual pawh ni se, a thi ngei tûr a ni,” a ti a. Nimahsela, mipui zîng aṭangin tu mahin an chhang lo.
Israel mi zawng zawng hnênah chuan, “Inbûk ila, nangniho hi lehlamah ṭang ula, kei leh ka fapa Jonathana hi lehlamah kan ṭang ang e,” a ti a. Mite chuan Saula hnênah, “Ṭha i tih ang chuan ti mai rawh,” an ti a.
Saula chuan Israel-te Pathian hnênah chuan, “A dik tak chu han tar lang ta che,” a ti a. Ṭhumvâwr chu Saula leh Jonathana chungah chuan a tla a, mipui chu an fihlîm ta a.
Saula chuan Jonathana hnênah, “Eng nge i tihsual min hrilh rawh” a ti a. Jonathana chuan a hnênah, “Ka tiang hmâwra khawizu tlêm chu ka tem ngei alâwm; chuvângin, ka thi mai tûr a ni,” a ti a.
Mite chuan Saula hnênah, “Israel-te tâna hnehna ropui tak thlentu Jonathana hi a thi ang maw? A thi tawp lo vang. Lalpa nunna chhâlin kan sawi e, a samzai pakhat pawh leiah a tla lo vang,” an ti a. Mipui chuan Jonathana chu thi lo tûrin an chhan chhuak ta a.
Saula chu Israel lal a lo nih chuan kil tina an hmêlma Moab mi te, Amon mi te, Edom mi te, Zoba lal te, Filistia mite chu a do va. A hawina lam apiangah a hneh zêl a.
A dam chhûng zawng, Saula chu Filistia mite nên nasa takin an indo ṭhîn a, Saula chuan mi chak emaw, mi huaisen emaw a hmuh apiang lamṭang atân a siam zêl ṭhîn.