Ak ki leenji `Samuel Saulo, “Ki iyookwo Kamuktaindet ne Toroor anyo aiiliin iegu laitoryatap piikyik si ibou Israel. Ara kas anyun ng'aleegap Kamuktaindet ne Toroor!”
Kamwa Kamuktaindet ne Toroor ne po lugoosyek kole, “Kaabwaat kiit ne ki yachi `Amelek Israel, ye ki kirinda ineendet eng' ooreet ye kitogosu eng' Misiri.
Ui anyun nguno ibookyi Amelek ak ing'em igeesu tuguuk tugul che tinyei. Amat ibagaakte chii, ago par muren ak kwony, lakwa ak ne reryei, teta ak keechiiryet, tambeesyet ak sigiryet!”
Ki mwachi `Saulo Kenik koleenji, “Oba oistegei, ochoortegei oistoegei Amelegik, si ma paraak kobooto icheek. Amu ki oriree lagok tugul che po Israel, ye kitogosu komong'u eng' Misiri.” Koistogei anyun Kenik eng' Amelegik.
Ago ki pagaach Agag `Saulo ak `piik ak keechiirek che korooron eng' tugul, kobooto tuuga che akwaen ak aaregap keechiir kobooto tuguuk tugul che ki myachen, ama cham kobar kogees. Ago king'em kiit age tugul ne kisasei ak ne ma kiy kogees.
“Ki ma ta myee aeet Saulo koek laitoryat. Amu kagoweektagei let mata kosuba, ama yai ng'atuutikyuk.” Ki nereech anyun Samuel ak koriirchi Kamuktaindet ne Toroor kemout komugul.
Ki ng'eet Samuel karon miising' kwo kotuiyo ak Saulo. Ki kimwachi Samuel keleenji kanyo Saulo Karmel ak koteekyigei kiit ne kibwaatee ineendet, yeityo kowendot kwo kosiirto kochoortagei Gilgal.
Kole Saulo, “Koget piik kechirechooto ak tuuga chooto eng' Amelegik, amu kobagaakta piik keechiirek ak tuuga che korooron eng' tugul, si koeng'ji Kamuktaindet ne Toroor Kamuktaindeng'ung', ago ko ki par kigesu che kong'et.”
Ki mwa Samuel kole, “Nganda ki iming'in ye ki igeeregei, ko ki ma kieetin iegu kandoindetap pororyosyegap Israel? Ki iilin Kamuktaindet ne Toroor iegu laitoryat eng' Israel,
Koleenji `Saulo Samuel, “Ee, koagas iit kutitap Kamuktaindet ne Toroor ak koawe ooreet ne koiyookto Kamuktaindet ne Toroor awe ak koamutu Agag laitoryatap Amelegik ak koabar Amelegik kogeskei.
Ak ki mwa Samuel kole, “Tos, ting'ee Kamuktaindet ne Toroor poiboiyet ne oo kagoochinoik che kibeelei ak tiseiywot, ko uu ye ting'ee kasetap iit ne po ng'olyootap Kamuktaindet ne Toroor? Keero, siirei kasetap iit tiseiywot ak siirei kasetap iit mwanigap mengichik.
Amu kergei ngelelnateet ak tengektap ponisyet ak kergei uuindap met ak chalwokto ak saaetap kanamonik. Amu koieesye ng'olyootap Kamuktaindet ne Toroor, ko kagoeesyen aginye si mata iegu laitoryat.”
Ak ki mwachi `Saulo Samuel koleenji, “Koayai tengekto amu koabistoe ng'atuutyetap Kamuktaindet ne Toroor, ak ng'aleeguk. Amu koaiywei piik ak agas iit kutinnywa.
Ak ki mwachi `Samuel Saulo koleenji, “Ma kiweeksei ak inyee, amu koieesye ng'olyootap Kamuktaindet ne Toroor, ko kagoeesyen Kamuktaindet ne Toroor, ma iegu laitoryat eng' Israel.”
Ki mwachi `Samuel ineendet koleenji, “Kagogereerenen Kamuktaindet ne Toroor laitornatetap Israel rani, ak kogoochi chiitap kokweng'ung' ne kaigai eng' inyee.
Komwa Saulo kole, “Koayai tengekto, ago asaain kora ale konyita nguno eng' taitap poisyegap piikyuk ak eng' Israel ak ingeweigei tuwai, si agutung'ji Kamuktaindet ne Toroor Kamuktaindeng'ung'.”
Yeityo komwa Samuel kole, “Omutwaa Agag laitoryatap Amelegik konyo yu.” Ki nyo anyun Agag kobaibai ak kobwaati koleen, “Eng' iman ni ko ng'wanindap meet.”
Ago ki mwa Samuel kole, “Ko uu ye ki yachi rotweng'ung' po chok kobogorisyek kobetyi lagok, koegu kamenng'ung' agine ne ma tinyei lakwa eng' kobogorisyek.” Ak kimurmur `Samuel Agag kotonaton eng' taitap Kamuktaindet ne Toroor eng' Gilgal.
Ak ki mata konyo kogeny Samuel kogeer Saulo agoi peetuutap meennyi. Nga no ko ki riirchi `Samuel Saulo; amu ki riir let Kamuktaindet ne Toroor kole kiga koyai Saulo koek laitoryat koboi Israel.