Engkim Lalpa chuan heti hian a ti, ‘Israel-te chu Aigupta ram ata an lo chhuah lai khân Amalek-hovin kawng lakah an lo tihbuai avângin ka hrem dâwn a ni.
Amalek-ho bei tûrin chhuak la, an thil neih zawng zawng tiboral vek ang che. A hmei a pa, nausên hnute hne lai chenin, an bâwngpa te, berâm te, sanghâwngsei te, sabengtung te nên tihlum vek ang che,’ a ti e” a ti a.
Aigupta ram aṭanga Israel-te an lo chhuah khân, Ken mite chuan an lo khawngaih hle a, Saula chuan an hnênah, “Lo chhuak ula, Amalek mite zîng ata inthiarfihlîm rawh u; chutilo zawng an zîngah ka tiboral ve dah ang che u,” a ti a. Chutichuan, Ken mite chu Amalek mite zîng ata chu an chhuak a.
Saula leh a mite chuan Agaga te, berâm ṭha ṭha te, bâwngpa ṭha leh thau thau te, berâmno ṭha ṭha te chu an tihlum duh lo va, ṭha lo deuh leh an duh loh chauh chu an that vek a.
“Saula, lal atân ka lo ruat ta chu pawi ka ti hle mai; min hawisan a, ka thupêk a zâwm si lo,” a ti a. Samuela chu a thin a ur hle a, zankhuain Lalpa a au va.
A tûkah chuan Samuela chu zîng takah a tho va, Saula hmuh tumin a chhuak a; mahse “Saula chu Karmel-ah a kal a, chutah chuan dam lai lung a phun a, a lo kîr leh a, Gilgal-ah a chhuk leh ta,” tiin Samuela chu miin an lo hrilh a.
Saula chuan, “Amalek mite ta an rawn lâksak a ni. Mite chuan berâm leh bâwng, a ṭha ṭha chu Lalpa, i Pathian hnêna thilhlan atân an rawn la a, a dang zawng chu kan tihlum vek e,” a ti a.
Saula chuan Samuela hnênah, “ Lalpa thu chu ka zâwm alâwm. Lalpa min tirhnaah chuan ka kal a, Amalek lal Agaga ka rawn man a, Amalek mite chu ka that vek asin.
Amaherawhchu, mite chuan râllâk thil - berâm leh bâwngte tihboral tûr zînga a ṭha ṭha chu Lalpa i Pathian hnêna Gilgal-a hlan atân an rawn la a ni,” a ti a.
Saula chuan, “Ka lo tisual ta a ni; mahse, ka mite zînga upaho leh Israel-te hmaah min zahder hrâm la, min hâwnpui leh rawh; Lalpa i Pathian chu ka bia ang,” a ti a.
Samuela chuan, “Amalek lal Agaga chu ka hnênah han hruai rawh,” a ti a. Agaga chu khûr chungin a hnênah a va kal a, “Thihna râpthlâk chu ka pumpelh tawh a ni ang chu maw?” a ti a.
Samuela chuan, “I khandaihin hmeichhiate fa nei lova i siam ṭhîn ang khân i nu pawh hmeichhe zînga fa nei lo nu a ni ang,” a ti a. Samuela chuan Gilgal khuaah Lalpa mit hmuhin a sât sawm ta berh a.
Samuela chuan a dam chhûngin Saula chu a tlawh leh ta lo va. Samuela chu Saula avâng chuan a rilru a na hle a; Lalpa chuan, Israel lal atân Saula a lo siam chu pawi a ti hle a.