|
| 1 |
|
| Samueli akagambira Saulo ati: Nyakubaho akantuma kukusiiga amajuta kuba omugabe w'abantu be Abaisiraeli. Mbwenu hurira eki Nyakubaho arikugamba. |
|
| 2 |
|
| Mukama w'Amahe naagira ati: Niinyija kufubira Abaamaleki ahabw'eki baakozire Abaisiraeli, obu baabazibira kuraba omu muhanda nibaruga Misiri. |
|
| 3 |
|
| Mbwenu irooko oite Abaamaleki, ocwekyerereze kimwe byona ebi baine. Otagira eki waasaasira, kureka oite abashaija n'abakazi, abaana bato n'abeereere, ente n'entaama, engamira n'endogoya. |
|
| 4 |
|
| Saulo atyo ahuruza abantu ababarira Telaimu, bahika abashaija obukumi bubiri abarikugyendesa ebigyere n'Abaayuda baba akakumi kamwe. |
|
| 5 |
|
| Saulo agyenda n'engabo ze, ahika aha rurembo rw'Abaamaleki, abagwera omu ruhanga. |
|
| 6 |
|
| Saulo agambira Abakeeni ati: Nimwirooko mugyende, murugye omu Baamaleki, ntakaabacwekyereza hamwe nabo; ahabw'okuba imwe mukagirira Abaisiraeli embabazi nibaruga Misiri. Abakeeni batyo baruga omu Baamaleki. |
|
| 7 |
|
| Na Saulo abinga Abaamaleki okuruga Havila okuhika Shuuri eri ahari burugwa-izooba bwa Misiri. |
|
| 8 |
|
| Akwata Agagi omugabe w'Abamaleki ahuriire, acwekyerereza kimwe abantu boona. |
|
| 9 |
|
| Kwonka Saulo n'abantu basaasira Agagi n'entaama n'ente n'abaana b'entaama ebigomokire kandi ebirungi munonga, tibabicwekyerereza kimwe; kureka byona ebirikugaywa n'ebitaine mugasho baba nibyo baacwekyerereza kimwe. |
|
| 10 |
|
| Nyakubaho akagambira Samueli ati: |
|
| 11 |
|
| Niinyefuuza eki naahinduriire Saulo omugabe, ahabw'okuba agarukire enyima, yaareka kunkuratira, tiyaakora bi mmuragiire. Samueli ekyo kikamugwisa kubi, yaaraara naatakira Nyakubaho. |
|
| 12 |
|
| Omu kasheeshe kaakuratsireho, Samueli aimuka kare kubugana Saulo. Bamugambira bati: Saulo aizire Karumeeli, yaayebyarirayo eibaare ry'ekiijutsyo, yaakuba yaagumizamu, yaashuuma Giligaali. |
|
| 13 |
|
| Samueli atyo aija, ahika Saulo, n'onu amuramutsya ati: Nyakubaho naakakuhe omugisha! Manya nkozire eki Nyakubaho andagiire. |
|
| 14 |
|
| Samueli amugarukamu ati: Kandi shi ka nimpurira entaama n'ente ebirikujuga? |
|
| 15 |
|
| Saulo amugira ati: Manya n'ezi baihire omu Baamaleki, ahabw'okuba abantu barekire kwita entaama n'ente enungi munonga, kuzitambira Mukama Ruhanga waawe. Kwonka ebindi tubicwekyerereize kimwe. |
|
| 16 |
|
| Samueli agira Saulo ati: Rekyera aho, nkugambire eki Nyakubaho araire angabiire. N'onu amugira ati: Kingambire. |
|
| 17 |
|
| Samueli amugira ati: Nobu waabaire nooyegaya ngu ori muto, hati tiiwe mukuru w'enganda z'Abaisiraeli? Nyakubaho akakusiiga amajuta kuba omugabe w'Abaisiraeli. |
|
| 18 |
|
| Hati akutumire naakuragiira ati: Irooko ocwekyerereze kimwe Abaamaleki enyabibi, obarwanise okuhitsya obu oraabamareho. |
|
| 19 |
|
| Mbwenu ekikuzibiire kukora eki Nyakubaho akuragiire ni ki? Ahabw'enki oshahwire eminyago, okakora ekirikugwisa kubi Nyakubaho? |
|
| 20 |
|
| Saulo agarukamu Samueli ati: Nkozire eki Nyakubaho andagiire, naaza ei antumire, naareeta Agagi omugabe w'Abaamaleki, kandi abo Baamaleki naabacwekyerereza kimwe. |
|
| 21 |
|
| Kwonka aha minyago, abantu baihireho entaama n'ente ebirungi munonga omu bibaire biri eby'okucwekyerezibwa, kubitambira Mukama Ruhanga waawe kunu Giligaali. |
|
| 22 |
|
| Samueli amugarukamu ati: Noogira ngu Nyakubaho naashemerererwa ebitambo bicwekize n'ebindi bitambo okukira eki aragiire? Manya okuhurira nikukira ekitambo, n'okworoba nikukira ebishaju by'empaya z'entaama. |
|
| 23 |
|
| Kandi obugomi ni nk'ekibi ky'oburogo. N'obugangaazi ni nk'ekicumuro ky'okuramya ebishushani. Ahabw'okwanga kukora eki Nyakubaho akuragiire, nawe nikyo yaakucwera aha bugabe. |
|
| 24 |
|
| Saulo agambira Samueli ati: Ncumwire, tinaakora eki Nyakubaho andagiire, eki ongambiire, ahabw'okuba ntiinire abantu, naayorobera ebi bagambire. |
|
| 25 |
|
| Mbwenu ninkweshegyereza, onsaasire ekibi kyangye, ogarukyeyo naanye mbone kuramya Mukama. |
|
| 26 |
|
| Samueli agira Saulo ati: Tindikwija kugarukayo naiwe, ahabw'okuba oyangire kukora eki Nyakubaho akugambiire, nawe nikyo ayangiire ku oba omugabe wa Isiraeli. |
|
| 27 |
|
| Samueli ku yaahindukire kugyenda, Saulo yaakwata omukugiro gw'ekijwaro kye, kyataaguka. |
|
| 28 |
|
| Samueli yaamugira ati: Eri izooba Nyakubaho yaakwaka obugabe bwa Isiraeli, yaabuha mutaahi waawe orikukuhita. |
|
| 29 |
|
| Ruhanga Kitiinwa kya Isiraeli tabeiha, kandi tahindura ki yaagamba, ahabw'okuba ti muntu kuhindura eki yaagamba. |
|
| 30 |
|
| Ebyo ku bihwa, Saulo agira ati: Ncumwire, kwonka hati ngirira enshoni omu maisho g'abakuru b'abantu bangye na Isiraeli, ogarukyeyo naanye, mbone kuramya Mukama Ruhanga waawe. |
|
| 31 |
|
| Samueli nikwo kugarukayo nawe, Saulo akaramya Nyakubaho. |
|
| 32 |
|
| Bwanyima Samueli aragiira ati: Nimundeetere aha Agagi omugabe w'Abaamaleki. Agagi aija ahu ari naanyimbuka naagira ati: Okufa kubi tikwakiriho! |
|
| 33 |
|
| Samueli amugira ati: Nk'oku rurara yaawe yaahindwire abakazi encwekye, nikwo na nyoko araabe encwekye nkabo. Samueli atyo ahirimburira Agagi omu maisho ga Nyakubaho omuri Giligaali. |
|
| 34 |
|
| Ebyo ku bihwa, Samueli aza Raama, na Saulo ainamuka, aza owe Gibea. |
|
| 35 |
|
| Kandi Samueli obu yaabaire akihuriire, taragizire bu areebana na Saulo obundi. Samueli aguma naasaasibwa Saulo, ahabw'okuba Nyakubaho akeefuuza eki yaamuhinduriire omugabe wa Isiraeli. |
|
|
|
|