Abeipa ta Samuela hnohta, “Sawla cha Izarei chô liata bei châta ei khoh khao leipa châ ta, ano vâta khachâ ma pachârôhpa ta na y aw? Na saki ôh liata sathaw pabie la, sie teh. Bethlehe khihpa Zese lâta ei cha tuah aw. A sawchapawzy hry liata pakha keima châta bei ta ei rao haw,” tah ta.
Samuela ta, “Kheihta ma ei sie thei aw? Sawla ta a vaw thei khiahta cha, ei na thie aw mâh tâh,” tah ta. Abeipa ta, “Viahchao zeinô a chhi la, ‘ Abeipa lâta atheihna hlâ awpa ta ei vy,’ na tah aw.
Samuela cha Abeipa reipa hawhta tao ta, Bethlehe lâ cha sie ta. Khihpi machâzy ta a chalyuna chôta ano cha vaw dy ei ta, “Thlalôhna bie a vaw phaohpa na châ ma?” tah ei ta.
Ano ta, “Thlalôhna bie na ei vaw tlôkhei. Abeipa lâta atheihna hlâ awpa ta ei vy. A pathai u la, atheihna hlâna lâ a vy teh u,” tah ta. Zese nata a sawchapawzy cha pathaisa ta, atheihna hlâna liata a hlao awpa ta âmo cha hrua ta.
Châhrasala Abeipa ta Samuela hnohta, “A hmisâ tlyma, a pôraoh tlyma moh kha, ano kha khoh va na. Abeipa ta la chyhsapa hmôzie hawhta hmô vei. Chyhsapa ta cha khôtho lâ alânazie moh tyh ta, Abeipa deikua cha palôh tlao a moh tyh,” tah ta.
Samuela ta Zese hnohta, “Na sawchapawpa zydua amâ ki ma?” tah ta. Zese ta, “A seihnai chaipa y ta, châhrasala ano cha mietakuzy vaina liata na a y haw,” tah ta. Samuela ta Zese hnohta, “Kei paawsa teh, a vaw tlô hlâlei a tyuh aw ma pi,” tah ta.
Kei paawsa ta, a vaw chhi ei ta. Sabia panyu kawpa, a mopadei a ngia kawpa nata hmipha ngaitapa châ ta. Abeipa ta Samuela hnohta, “Thyu la, sathawthu teh, kha tlai kha na a châ,” tah ta.
Samuela ta saki ôh sathaw cha la ta, ano cha a unawhzy hmiakô liata sathawthu ta. Cha noh tawhna chata, Abeipa Thlahpa cha Dâvi chô liata thatlô ngaitapa ta vaw tlô ta. Samuela cha thyu ta Râmâ lâ sie ha ta.
Eima zibeipa ta na hmiakô liata a ypa châ chakaotuhpazy he totâ tô thaipa tlua awpa ta bie miah pie sala, na chô liata Khazohpa tuapa ahripa a vaw tlôna maihta, totâ tô tyh aw ta, na pha thlâh ha aw,” tah ei ta.
Satlia pakha ta a chhy ta, a hnohta, “Pachâ teh, Bethlehe khihpa Zese sawchapawpa pakha hmô na ta, ano cha totâ tô thai ngaitapa, chyhsa riahphapa, adyuhpa chyhsa, bierei a thai kawpa nata hmipha ngaitapa châ ta, Abeipa ta a ypâpa chyhsa a châ,” tah ta.
Khazohpa tuapa ahripa Sawla chô liata a vaw tlôna maihta, Dâvi cha totâ la ta, tô tyh ta. Chatanachata Sawla cha vaw tlâhpa ta, pha heih tyh ta, ahripa ta ano cha a puasai ha tyh.