Masaba y'a fɔ Samuyɛli ye ko: «I bena to ka kasi Sayuli kosɔn fɔɔ tuma jumɛn? Ne bann'a la, a te se ka kɛ masacɛ ye Isirayɛlidenw kunna tugu. Wili k'i ka gɔɔn fa tulu la ka taga. Ne b'i ci Zese fɛ ka bɔ Bɛtilehɛmu, bari ne ye masacɛ woloma a deenw cɛma.»
Samuyɛli y'a jaabi ko ale be se ka taga cogo di. Ko ni Sayuli y'o mɛn, a ben'a faga. Masaba fana y'a fɔ ko: «N'i be taga tuma min na, i be misi dɔ minɛ ka taga n'a ye, i b'a fɔ ko e nana janko ka saraka bɔ Masaba ye.
A y'u jaabi ko: «Ɔnhɔn! Ne nana janko ka saraka bɔ Masaba ye. Aw k'aw yɛrɛ saniya ka na an be taga saraka bɔyɔrɔ la.» A ye Zese n'a deenw saniya k'u wele ka taga saraka bɔyɔrɔ la.
Nga Masaba y'a fɔ a ye ko: «I kan'a filɛ a ɲada ma n'a ka jaɲa ma, bari ne banna ale la. Mɔgɔ be fɛɛn min jati, ne, Masaba te o jati. Mɔgɔ b'a tɔɲɔgɔn filɛ a ɲaa ma dama, nga ne, Masaba be dusu le filɛ.»
O kɔ, Samuyɛli ye Zese ɲininga ko: «I deenw bɛɛ le ye nunu ye wa?» A ye Samuyɛli jaabi k'u bɛɛ dɔgɔnin le tora, ko ale be saga dɛndɛna kongo kɔnɔ. Samuyɛli y'a fɔ a ye ko: «Mɔgɔ ci ka ta'a wele, an tena saraka dumuni kɛ n'a ma na.»
Zese ye mɔgɔ ci. A tagar'a wele, a nana. Cɛwulennin tun lo. A ɲada ka ɲi, a cɛɛ tun ka ɲi. Masaba y'a fɔ Samuyɛli ye ko: «Wili ka tulu bɔn a kuun na, ale lo.»
Samuyɛli ye gɔɔn ta, tulu be min kɔnɔ, k'a bɔn a kuun na a kɔrɔw ɲana. Masaba ka Nii donna Dawuda la kabini o loon na ani waati tɔɔ bɛɛ la. O kɔ, Samuyɛli wilila ka taga Arama.
Matigi, an be mɛnni kɛra i fɛ, n'i b'a fɛ ka min fɔ, i k'o fɔ. An bena mɔgɔ dɔ ɲini min be se ka gɔni fɔ, ni Ala y'a kɛ nii kuntan nin wilila i kama tuma o tuma, o tigi be gɔni nin fɔ i hakili be sigi.»
Sayuli ka baaraden dɔ y'a fɔ ko ale ye Zese ka bɔ Bɛtilehɛmu deen dɔ ye. A be se fɔli la kosɔbɛ, a jaa ka gwɛlɛ fana, a be se kɛlɛ la, a ka kuma ka di, a fana ɲada ka ɲi. Masaba fana be n'a ye.
Tuma o tuma ni Ala y'a kɛ nii kuntan wilila Sayuli kama, Dawuda tun be to ka gɔni fɔ, o tuma na, a be ninakili ka ɲa, a hakili be sigi, nii kuntan nin be sɔrɔ k'a bila.