Daar a yembre, Soaala yeela a Samwɛl: «Fo na n kell n yõka yãbre, a Sol poorẽ, n ta da-bʋre? Fo zɩ tɩ m bas-a lame. A kõn le rɩ naam Israyɛl ye. Sui f yɩɩlla kaam tɩ pidi, la yiki! Mam tʋmd-f-la a Zese, Bɛtelyɛɛm neda, yiri, tɩ m yãenda a kamba sʋka dĩm ning m sẽn datã.»
La a Samwɛl leokame: «Mam maanda a wãn n ta be? A Sol sã n bãnge, a na n kʋ-m lame.» Soaala yeelame: «Fo na n talla nag-sadg n kẽnge la f na n tɩ yeelame: ‹M wat n na n kʋʋ maoongo n kõ Soaala-Wẽnd.›
Fo na n boola a Zese t'a wa maoonga kʋʋbã. M meng m toor na wilg-f f sẽn tog n maan bũmb ninga. Mam sẽn na wilg foom a soaba zug la f na n pʋdg naama kaam.»
T'a Samwɛl leoke: «Yaa noog bala; m wat n na n kʋʋ maoongo, bɩ y segl y mens n yɩ sõma, la y wa tũ maan tɩ d kẽng maoongã kʋʋb zĩigẽ.» La yẽ meng yɩlga a Zese ne a kamba, la a bool-b-la maoonga kʋʋb zĩigẽ.
La Soaala-Wẽnd yeela a Samwɛl: «Da ges a neng neerem ye, da ges a woglem ye, tɩ ka yẽnda la m yãkd ye; ninsaal geta nin sẽn ne, Soaala-Wẽnd geta sũurẽ.»
La a le yeelame: «Fo kamba tɛk la woto bɩ?» T'a Zese yeele: «B yao n kete, n ya rũm-kɩɩma.» A Samwɛl yeela a Zese: «Tʋm tɩ b tɩ bool-a t'a wa tɩ tõnd kõn sɩng rɩɩbo t'a nan pa wa ye.»
La a Zese tʋmame tɩ b babs-a t'a wa; a Daviid nenga da yaa yãag nenga; a neng ra yaa neere n sakd gesgo. La Soaala-Wẽnd yeela a Samwɛl: «Yik n pʋdg a zug naama kaam, tɩ yaa yẽ!»
A Samwɛl rɩka kaama ne yɩɩllã, n pʋdg a Daviid zugu, a kẽem dãmba nifẽ. La badaar tɛka, la sẽn pʋge, Naaba-Wẽnd pãng kẽe a Daviid. A Samwɛl dɩka sore la Rama la a leb yã.
Sẽn be yaa y kõ noor bala tɩ d be-la y yĩnga. D na yãend ned sẽn mi bɛɛl wẽebo, la yam yoogã sã n wa namsd yãmba, nin-kãng na wẽ bɛɛlã tɩ yãmb paam yolsgo.»
Na-yir dãmba nin-yend yeelame: «Ade, mam yãee Bɛtelyɛɛm daoa a Zese biiga, a mii bɛɛla, n paas me, a yaa gãndaoogo n tar pãnga, n ya zab-zabda, a noor mii goama, la yaa dasãnga, la Soaala-Wẽnd bee ne-a.»
La yam wẽngã, Soaala-Wẽnd sẽn bas-a ne a soaba, sã n da kẽe a Sol fãa, a Daviid da rɩkda bɛɛl n wẽ. La a Sol da paamda laafi la yolsgo; la yam wẽngã da zoet n basd-a lame.