Ka Filistianim’ daa ti laɣim bɛ tɔbbihi n-lo tɔbu; bɛ daa laɣimla Soko din be Juda tiŋgban’ ni la, ka ti bɛ suɣa Soko maa mini Azɛka tiŋ’ shɛli din be Ɛfɛsidammim’ tiŋgban’ ni la sunsuuni.
Ka Tiyaawumya daa yi Filistianim’ maa sanna, o yuli n-daa booni Goliat ka o yi tiŋ’ shɛli din yuli booni Gaat na. O wɔɣilim daa nyɛla kaman mita ata laasabu.
Ka o daa kana ti zani, ka kuhi bahi Izraɛl tɔbbihi na, “Bɔ n-niŋ ka yi lo tɔbu na ni yi ti tuhi ti? Pa Filistia nira n-nyɛ ma? Ka yi mi pala Sool tɔbbihi? Dinzuɣu piimiya yi ni ninvuɣ’ yino n-chɛ ka o siɣi n sanna.
Dauda daa nyɛla Jɛsi bia, ka Jɛsi mi nyɛ Ɛfirat daŋ ni nira, ka be Bɛtilihɛm din be Juda tiŋgban’ ni la. O daa malila bidibis’ anii. Sool ʒiɛmani maa ni Jɛsi daa kurigiya pam.
Jɛsi bidib’ kpamba ata daa dolila Sool chaŋ tɔb’ maa ni; o bidibis’ ata bɛn daa doli chaŋ tɔb’ maa ni yuya n-daa booni Ɛliab, ŋun daa nyɛ o bidib’ kpɛm’ la, ka ŋun daa pa o zuɣu yuli booni Abinadab, ka ŋun pah’ ata mi yuli booni Shamma.
Ka zaŋ waagasi kpil’ pia ŋɔ mi ti ti bɛ yaɣili maa sapashin’ kpɛma, ka nya a biɛyanim’ maa daalaafee ni nyɛ shɛm, ka ʒi shɛhirili bini bɛ sani mali kuna.”
Ka Dauda daa daŋ yiɣisibu biɛɣ’ asiba n-chɛ ka so guli piɛri maa, ka o zaŋ bindira maa chaŋ kaman o ba Jɛsi ni daa wuh’ o shɛm maa. O daa paai sansani maa shee la saha shɛli bɛ ni daa maani shili ni bɛ chaŋ tɔb’ gɔɣ’ ni, ka buri zambu.
O min’ o biɛyanim’ maa ni daa na mali alizama saha shɛli maa, ka Filistianim’ tiyaawumya ŋun yuli booni Goliat ka o nyɛ Gaat nir’ la daa yi Filistianim’ maa sanna nti lan yɛr’ o ni daa pun yɛri yɛtɔɣ’ shɛŋa la. Ka Dauda daa wum o ni yɛli shɛm maa.
Ka Izraɛlnim’ maa daa yɛri taba, “Yi nya do’ so ŋun yina ŋɔ? O yaa yimina ni o ti mo Izraɛlnima, ka ninvuɣ’ so yi ku o, naa ni ti dilan’ buni pam, ka zaŋ o bipuɣiŋga ti o pahi, ka lan chɛ ka dilan’ daŋ zaa niŋdi bɛ yubu Izraɛl tiŋgbɔŋ ŋɔ zaa ni.”
Ka Dauda daa bɔhi ninvuɣ’ shɛb’ bɛn daa ʒe o sani maa, “Ninvuɣ’ so yi ku doo ŋɔ ka yihi filiŋ ŋɔ Izraɛl tiŋgbɔŋ ni, bɔ ka bɛ yɛn niŋ ti dilana? Dama Filistia nir’ ŋun bi guni ŋɔ mi leei nyɛ ŋuni hal ti kana ni o ti ta Naawuni ŋun be ŋɔ tɔbbihi daɣiri?”
Ka Dauda biɛli Ɛliab daa wum o ni yɛri niriba maa shɛm maa, ka o suhu yiɣisi bah’ o zuɣu ka o bɔh’ o, “Bɔ ka a lee ka kpe na ni a ti niŋ? Ka ŋuni ka a lee chɛ piɛri biɛla maa ti mɔɣu maa ni? M mi a ni lo shɛli, ka lan mi zaɣ’ biɛɣu din be a suhu ni; a kamina ni a ti nya tɔb’ tuhibu.”
Mani ŋun nyɛ a dabili ŋɔ pun ku gbuɣima mini kunduna, ka Filistia do’ so ŋun bi guni ŋɔ gba ni lee bɛ ni yino, dama o ta Naawuni ŋun be ŋɔ tɔbbihi daɣiri.”
Ka Dauda daa lan yɛli, “Yawɛ ŋun daa fa ma gbuɣinli nyinyɛhi ni bahi ka lan fa ma kunduŋ nyinyɛhi ni bahi ŋɔ ni lan fa ma Filistia doo ŋɔ gba nuu ni bahi.” Ka Sool daa yɛli Dauda, “Chama, Yawɛ be a sani.”
Ka Dauda daa zaŋ Sool takɔbi nyaɣi pa gbaɣino maa zuɣu, ka yɛn chaŋ ka di nyaŋ o, dama o daa na ʒi n-zaŋ li niŋ omaŋa. Di saha ka Dauda daa yɛli Sool, “N ku tooi zaŋ nɛma ŋɔ niŋ mmaŋ’ chaŋ; dama m bi mil’ li.” Ka daa yihi di zaa sɔŋ.
Di saha ka Dauda daa zaŋ o jaaŋgbee niŋ o nuu ni ka gahim kuɣ’ polipoli diba anu n-niŋ o piɛgul’ koligu ni, ka o kuɣilɔŋ be o nuu ni ka o vu m-miri Filistia doo maa ha.
Di saha ka Dauda mi daa yɛli Filistia doo maa, “Nyin’ kanila n sanna ni takɔbi mini kpan’ titali ni kpam’ bila, amaa man’ zaŋla Yawɛ ŋun nyɛ Tɔbbihi Naa, ka nyɛ Izraɛl tɔbbihi Naawuni so a ni ta daɣiri ŋɔ yuli kan’ a sanna.
Zuŋɔ dabisili ŋɔ Yawɛ ni zaŋ a niŋ n nuu ni, ka n ŋme a luhi, ka ŋmaag’ a zuɣu, ka zaŋ Filistia tɔbbi’ kpima pam niŋgbuna ti juri mini mɔɣu ni biŋkɔbiri. Ka dunia zaa baŋ ni Naawuni be Izraɛl tiŋgbɔŋ ni;
Ka Dauda daa zaŋ o nuu tim o koligu ni yihi kuɣili niŋ o kuɣilɔŋ ni n-zaŋ labi Filistia doo maa gbɛɣu, ka kuɣili maa chaŋ ti firi o gbɛɣu maa ni, ka o lu m-pil’ o puli zuɣu, ka o nini kpa tiŋa.
Di saha ka Dauda daa dii guui chaŋ ti du n-tam Filistia doo maa zuɣu, ka darigi ŋooi ŋun’ Filistia doo maa maŋmaŋ’ takɔbi di tɔɣu ni n-zaŋ li ku o, ka ŋma o zuɣu. Filistianim’ maa ni daa nya ka bɛ tiyaawumya maa kpi maa, ka bɛ ŋmaligi guui.
Ka Izraɛlnim’ mini Judanim’ daa dii yiɣisi kuhi bahi Filistianim’ maa zuɣu, n-kari dol’ ba hal ti paai Gaat mini Ɛkurɔn dunoya ni, ka di zuɣu daa chɛ ka Filistia tɔbbi’ shɛb’ bɛn nya dansi kul luri soli ni, zaŋ Shaaraim hal ti paai Gaat mini Ɛkurɔn.
Sool ni daa nya ka Dauda chani ni o ti tuhi Filistia doo maa, ka o bɔhi Abinɛr ŋun daa nyɛ sapashin’ kpɛm’ la, “Ŋun’ bia n-lee nyɛ nachimbil maa?” Ka Abinɛr garigi yɛli, “Naa, nyini ŋun be ŋɔ zuɣu, m bi mi.”