1
Ogẹn Defidi lẹ Sọlụ gi kugụ, Jonatanị nwa Sọlụ nọ wechanrịn enwẹn ẹ ye Defidi, ihiẹn Defidi a sụọ a kẹ enwẹn ẹ dọn a sụọ a.
2
Gha ụhụọhịn hụ jẹnmẹ, Sọlụ nọ la Defidi tọ iwe ẹ, ọ nịzịn'a lashi iwe nẹdi ẹ.
3
Jonatanị nọzị du Defidi kuntarị ẹfan Osolobuẹ gi kwọngbama ya lẹ Defidi, makẹni o nwọn ihiẹn-ọsụsụọ Defidi kẹ o dọn nwọn ihiẹn-ọsụsụọ enwẹn ẹ.
4
Jonatanị a gbụpụ ẹwuru-tueni o yi, w'ẹ ye Defidi, ịya lẹ ẹwuru o yiye imẹ ẹ lẹ ọpịa-agha a lẹ ụta a lẹ akpụkpọ-ukun ẹ.
5
Ebe-lẹ-ebe Sọlụ zi Defidi, Defidi e jẹnchanrịn a ọhụnma. Ya Sọlụ nọ tumẹ ẹ onyẹ ndu-agha. Ihiẹnni sụọ ndị-agha Sọlụ ile lẹ ịhaịmẹ ẹ ile.
6
Ogẹn ikẹnnyẹ Izrẹlụ gi lakọ agha, kẹ Defidi gbugụ Golịatị onyẹ Filistia hụ, ikpoho nọ gi ẹbụ lẹ itẹn-egu ghasọnmẹ obodo ile rị Izrẹlụ pụha d'a sị eze wụ Sọlụ a lụa, wẹ hụ a bụ ẹbụ-ịghọghọ, a kụ ẹgede-chakachaka, a kpọ ụbọ.
7
Wẹ hụ e tẹn egun, a bụ: “Sọlụ e gbugụọ nnụ a ole-lẹ-ole, Defidi e gbu nnụ-iri ẹ ole-lẹ-ole.”
8
Iwe nọ we Sọlụ ọda-ọda; ẹbụnị a fụ a. Ọ nọ ku ẹ imẹ obi ẹ, sị, “Wẹ rị a gụn nnụ-iri e yeni Defidi, a gụn nnụ sụọ e yeni mmẹ nwẹn. Ọ họdụ nị wẹ kin ẹ eze!”
9
Ẹnya nọ fụma Sọlụ ebe Defidi rị gha ogẹn ahụn jẹnmẹ.
10
Eki e fọn eje-mmọn ahụn gha ẹka Osolobuẹ bịa nọ numẹ Sọlụ ọkụn-ọkụn, pụma a, yemẹ ẹ nsọngbu ọda-ọda imẹ ụlọ iwe ẹ, Defidi hụ a kpọ ụbọ hụ k'o dọn a kpọ a mbụ. Obo ọnụ-nkọn hụ Sọlụ ẹka.
11
Ọ nọ tụ Defidi obo hụ, a sị enwẹn ẹ, “M k'a dụn Defidi limẹni ẹjan,” kanị Defidi nọ wanahịn a mgbe ẹbụọ o mẹ ẹrịra.
12
Egun Defidi hụ a tụ Sọlụ, makẹni Osolobuẹ nọyeni nwan Defidi, la Sọlụ tọ.
13
Ya kẹ Sọlụ nọ gha ebe ọ rị zipụ a d'a rụnma azụụn ichẹn: o tumẹ ẹ onyẹ a kị ndị-agha nnụ-uku, Defidi nọ rị e dujẹn ndị-agha agha, wẹ hụ e mmẹri a lụaha.
14
Ihiẹn ile Defidi mẹ hụ a ghan'a ọda-ọda, makẹni Osolobuẹ nọyen'ẹ.
15
Ogẹn Sọlụ gi hụn kẹ ihiẹn gi rị a ghanị Defidi, egun ẹ nọ tụkẹnmẹ ẹ.
16
Kanị ihiẹn Defidi hụ a sụọ ndị Izrẹlụ ile lẹ ndị Juda ile makẹni ịya e dujẹn wẹ agha e dulụa.
17
Ya Sọlụ nọ sị Defidi, “Lee nwa m okpoho-kanị wụ Mẹrabụ, m k'e ye i y'ẹ lụrụ. Ka wụsọnmẹ odogun-agha m, lụsọnmẹ agha Osolobuẹ.” Sọlụ rị a sị enwẹn ẹ, “Emẹtụkọ m'a ẹka; ndị Filistia wụ ndị-iṅẹnrẹn ẹnyi wẹ gbu ẹ imẹ agha.”
18
Kanị Defidi nọ sị Sọlụ, “Onyẹ kẹ m wụ? Kị wụ ikpụlọ nẹdi m lẹ ndị nke ẹnyi imẹ alị Izrẹlụ, hụn m gi e mẹ ọgọ eze?”
19
Ogẹn Sọlụ te k'e gi we Mẹrabụ nwa a ye Defidi lụrụ, ọ nọ w'ẹ ye Adriẹlụ onyẹ Mẹhola lụrụ.
20
O mẹgụ, ihiẹn Defidi nọ sụọma nwa Sọlụ okpoho w'a kpọ Mikalụ. Mgbe Sọlụ gi nụ nị ihiẹn Defidi rị a sụọ nwa a hụ, ẹfọ nọ sụọ a ụsụọ.
21
Ọ nọ sị enwẹn ẹ, “M k'e w'ẹ ye ẹ, gi shin'ẹ ọnyan lẹni ndị Filistia hụn ụzọ gbu ẹ.” Ọ sị Defidi, “O fiechanrịnn'ị! Y'e nwọnghọzị efe y'e gi wụrụ ọgọ m.”
22
Ya Sọlụ nọ sị ndị idibo ẹ, “Kagwa nị Defidi, sị a, ‘Lee ẹ, ihiẹn i a sụọkẹnmẹkẹ eze, ihiẹn i a sụọkẹnmẹkẹzikwọ ndị idibo ẹ ile; wụrụ ọgọ eze nụ.’ ”
23
Ndị idibo eze nọ gwachanrịn Defidi ihiẹn ndịnị. Kanị Defidi nọ sị wẹ, “Ụnụ ro ni ịwụrụ ọgọ-eze wụ ihiẹn mẹ ẹkẹrẹ — ebe m wụ ogbẹnnyẹ nwọnlẹni ẹfan?”
24
Ogẹn idibo Sọlụ gi gwa a ihiẹn Defidi shịarị,
25
Sọlụ nọ sị wẹ, “Sị nị Defidi, ‘Onwọnni ihiẹn ọzọ eze chọ n'i gi lụ nwa a karị n'ị kwa ndị Filistia ọgụn-isẹn ugun wẹhẹ ihiẹn ị bepụha wẹ ẹhụ; ọ chọ n'o mẹgwarị ndị-iṅẹnrẹn ẹ.’ ” Kanị Sọlụ chọkọ kẹ ndị Filistia a dọn gbu Defidi.
26
Ogẹn idibo Sọlụ gi gwa Defidi ihiẹn ndịnị, ọ nọ sụọ a n'ọ wụrụ ọgọ eze. Ogẹn wẹ ye ẹ gini d'e zu,
27
Defidi lẹ itu ẹ nọ pụ d'e gbu ndị Filistia ọgụn-iri. Ọ nọ wẹhẹ akpụkpọ wẹ kwapụha wẹ ugun, wechanrịn wẹ ile ye eze n'ọ wụrụ ọgọ a. Ya Sọlụ nọ we nwa a wụ Mikalụ ye ẹ lụrụ.
28
Ogẹn o gi we eze ẹnya nị Osolobuẹ nọyeni Defidi lẹni ihiẹn Defidi sụọ Mikalụ nwa a,
29
egun Defidi nọ tụkẹnmẹ Sọlụ, ọ nọ wụrụ eṅẹnrẹn Defidi o we nwụn.
30
Ndị ndu-agha Filistia a maye Izrẹlụ ọgụn mbụ-lẹ-ẹbụọ. Hụn ahụn ile, Defidi hụ a gha ihun a karị ndị ọrụn Sọlụ ile họdụnị, ẹfan Defidi nọ tigbarị.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc