Cu Jo-na-than ruac agɔaa kɛ gua̱n kɛ kui̱ Dee-bid, wee i̱, “Kuäär cu ja̱ŋdu ni Dee-bid lät kä mi jiääk. Kɛ ɣöö thilɛ mi jiääk mi cɛ lät kä ji̱, kɛ ɣöö tin diaal tin cɛ la̱t gɔwkɛ kɛ ji̱ ɛlɔ̱ŋ.
Kɛn wär ɛ mɔ cu Thɔɔl naath jäk kä dhɔr Dee-bid ti wa jɛ guic, kɛ ɣöö derɛ jɛ näk kɛ runwaŋ. Duundɛ ɣöö cu Mi-kal, ciek Dee-bid ɛ la̱r Dee-bid i̱, “Mi ci rɔ bar ɛn wääri, kä ba ji̱ näk i̱ ruun.”
Kä cu Thɔɔl Mi-kal jiök i̱, “Ɛŋu kaaŋi ɣä i̱ nɔmɔ, a bi gua̱n tɛ̈rä jak kä wä, a lënyɛ rɔ mɔ?” Kä cuɛ jɛ loc i̱, “Cɛ ɣä jiök i̱, ‘Jak ni ɣä kä wä. /Cä jɛ go̱o̱r i̱ bi näk?’ ”
Kä cu Thɔɔl naath jäk kä Dee-bid. Kä mëë cikɛ buɔ̱n göökni nɛn latkɛ nyin go̱o̱kä, kä te Tha-muɛl cuŋä nhiam ala bo̱o̱thdiɛn, cu yiëë Kuɔth ben kä ja̱a̱k Thɔɔl, kä cukɛ nyin go̱o̱kä lat bä.
Kä mëë ca la̱r Thɔɔl, cuɛ nɛy ti kɔ̱ŋ ja̱k, cukɛ nyin go̱o̱kä lat bä. Kä cuɛ ja̱a̱k ti kɔ̱ŋ nyɔk kɛ jäkni kɛ diɔ̱kdiɛn, kä cukɛ lɛni ruac bä kɛ nyin go̱o̱kä.
Kä cu puɔ̱nydɛ wä kä Rama, kä cuɛ ben wi̱i̱ jiɛw in di̱i̱t in te kä Cɛ-ku. Kä cuɛ thiec i̱, “Tha-muɛl a ni kɛnɛ Dee-bid?” Kä cu ram kɛl ɛ loc i̱, “Kɛn a kä Na-yoth kä Rama.”
Kä cuɛ rɔ lony a bɛ te juutdä, kä cuɛ nyin go̱o̱kä lat nhiam Tha-muɛl. Kä cuɛ te juutdä kɛ cäŋ kɛnɛ wäär kɛɛliw. Ɛ jɛn min laar kɛ jɛ i̱, “Ɛn Thɔɔl tëë rɛy göökni bä nu?”