1
Ya Defidi nọ gha Nayọtụ rị Rama gbapụ; ọ nọ buru Jonatanị, sị a, “Kịnị kẹ m mẹ? Elee ikpe ma m? Nanị kẹ m dọn mẹfieni nẹdi i, hụn o gi a chọ n'o gbu m?”
2
Jonatanị nọ sị a, “Ọhụn emẹkọ! Y'a nwụnkọ! Lee ẹ, onwọnni ihiẹn nẹdi m ghalẹni a gwa m — kẹ okẹn-ihiẹn kẹ ihiẹn mẹ ẹkẹrẹ. Nanị o dọn nwan zuemẹni m hụnnị? Ẹlẹ ẹrịra!”
3
Defidi nọ kun ẹfan Osolobuẹ, sị, “Nẹdi i a marịngụọ nị ihiẹn m sụọ ị; ọ sịgụọ nwan enwẹn ẹ, ‘Agwakọ m Jonatanị ihiẹnni, amamgbe m'a kpagi ẹ obi.’ Kanị ezioku-ezioku, ẹkẹrẹ sụọ họdụ n'o gbu m, ma Osolobuẹ lẹ isi i!”
4
Jonatanị nọ sị a, “Ihiẹn ọwụlẹ ị chọ nị m mẹn'i m k'e mẹn'i y'ẹ.”
5
Defidi nọ sị a, “Lee ẹ, eki wụ Mmẹmmẹ Ifọn-ọhụn, mmẹ lẹ eze te k'e ri ihiẹn-oriri; kanị, nị m jẹn d'a warị imẹ ugbo d'e ru ẹnyasị nwẹnẹ-eki.
6
Nẹdi i jụ ukwere m, sị a, ‘Defidi rịọ m nị a gbajẹn obodo wẹ wụ Bẹt'lẹhẹm, makẹni o nwọn ẹjan w'a chụ ahụa-ahụa wẹ sikọ d'a chụnnị ndị nke wẹ ile.’
7
Omẹni ọ sị, ‘Ọ hụghọ mma!’ Ya wụ nị mmẹ wụ odibo i a hụnghọ isi. Kanị, omẹni olulu e bumẹ ẹ, y'a marịn n'ọ kwademẹgụọ obi ẹ n'ọ chọ m njọ.
8
Yụ nwẹn, dodo mẹni mmẹ wụ odibo i ọhụnma, makẹni y'e mẹgụọ mmẹ wụ odibo i du i kwetarị nkwa idẹnya Osolobuẹ. Omẹni m mẹ njọ, gihụ ẹka ị gbupụ m! K'ị k'e reni m ye nẹdi i gbu?”
9
Jonatanị nọ sị a, “Omẹkọ ị! Omẹni m te marịn nị nẹdi m a kwademẹgụọ n'o gbu i, m'e k'e gwa ị?”
10
Defidi nọ jụ a, “Onyẹ k'a gwa m nwan omẹni nẹdi i gi olulu shịarị ị oku?”
11
Jonatanị nọ sị a, “Pụha nị ẹnyi wịrị shi imẹ ugbo.” Wẹ nọ wịrị shi ebẹhụ.
12
Jonatanị nọ sị Defidi, “Ma Osolobuẹ, Chuku Izrẹlụ, m sikọ d'a chọpụha ihiẹn nẹdi m rị e ro o gini d'e ru mgbeni nwẹnẹ-eki! Omẹni o kughọ oku i ọhụnma, e mẹ m'i marịn.
13
Kanị, omẹni nẹdi m rị a chọ ị njọ, Osolobuẹ ya mẹ m ihiẹn, mẹshidẹ m'ẹ ikẹn, omẹni abịanị m d'a gwa ị, zi i lama pẹrẹ. Osolobuẹ ya nọyeni i k'o te dọn nọyeni nẹdi m.
14
Omẹni m hụ ndụn, mẹ m kẹ onyẹ nke i kẹ Osolobuẹ e mẹ, makẹ m'a nwụn;
15
emẹbehikwọlẹ ikpụlọ m kẹ ndị nke i ogẹn Osolobuẹ e gi gbupụchanrịngụ ndị-iṅẹnrẹn Defidi.”
16
Ya kẹ Jonatanị nọ kwe ikpụlọ Defidi nkwa, sị, “Ẹka Osolobuẹ ya rịsọnmẹ ndị iṅẹnrẹn Defidi ukun!”
17
Ya kẹ Jonatanị nọ mẹ Defidi kwedọnzi ẹ nkwa, makẹni ihiẹn Defidi sụọ a: ihiẹn Defidi sụọ Jonatanị kẹ enwẹn Jonatanị.
18
Ya Jonatanị nọ nwan sị Defidi: “Eki wụ Mmẹmmẹ Ifọn-ọhụn. Wẹ sikọ d'a jụrịrị ukwere i makẹni ocho i jẹnkọ d'a gba okpokoro.
19
Ibẹka ẹnyasị nwẹnẹ eki, jẹnmẹ ebẹhụ i jẹn d'a warị ogẹn nsọngbuni gi bidọn; d'e cheri ẹhụ ọmụma Ezẹlụ.
20
M k'a gba ụta mgbe ẹtọ ye ẹhụ ọmụma ahụn, nọkẹsị o nwọn ihiẹn m rị a gba a.
21
M k'e zi nwata okẹnnyẹ ohu, sị, ‘Jẹn d'e wẹhẹ ọbara ndị hụ m gba.’ M sị nwata hụ, ‘Lee ẹ, ọbara ndị hụ rị ị azụụnnị; wẹhẹ wẹ,’ y'a pụha, ma Osolobuẹ, ya wụ nị nsọngbu arịa!
22
Kanị, m sị a, ‘Lee ẹ, y'e ke ru ebe ọbara ndị hụ rị,’ ya wụ nị ị pụkọ ozigbo, makẹni Osolobuẹ rị e zipụ ị.
23
Banyeni ihiẹn mmẹ lẹ ịyụ ku, nyanhankwọ nị Osolobuẹ wụ ọshẹri ẹgbata mmẹ lẹ yụ jẹnrin-ejẹn.”
24
Ya Defidi nọ warị imẹ ugbo. O ru ogẹn oriri Mmẹmmẹ Ifọn-ọhụn, eze nọ weri ocho n'o ri ihiẹn-oriri hụ.
25
Eze nọdị alị ocho ẹ nọkunmẹ ụsụọ-ẹjan, k'o mẹ mbụ; Jonatanị nọdị azụụn teburu hụ hụn ẹbọ bu ihun zimẹ nẹdi ẹ; Abna hụn a kị ndị-agha nọsọn Eze — kanị ebe Defidi a dịnọ gba okpokoro.
26
Onwọnni ihiẹn Sọlụ ku ụhụọhịn hụ, makẹni ọ sị enwẹn ẹ, “O nwọngụọ ihiẹn mẹ Defidi, ọ rụ a rụ, ọ rụ a rụ nkesi.”
27
Kanị eki e fọn, nke akpọhịn ẹbụọ imẹ ifọn ahụn, ocho Defidi a gbazị okpokoro. Sọlụ nọ jụma Jonatanị nwa a, “Kị haịn nwa Jese gilẹni bịa oriri, kẹ ụnyanhụn kẹ tannị?”
28
Jonatanị nọ sị a, “Defidi rịọkẹnmẹ m n'o jẹn Bẹt'lẹhẹm.
29
Ọ sị, ‘Nị m jẹn, makẹni ndị ikpụnọ ẹnyi rị a chụn ẹjan imẹ obodo ẹnyi; nwẹnẹ m okẹnnyẹ a gwagụọ m nị m k'a rịrịrị ebẹhụ. Dodo, omẹni ihiẹn m a sụọghọ ị, nị m jẹn d'a hụn umunẹ m.’ Ya k'o gilẹni bịa d'e sọn eze ri oriri.”
30
Sọlụ nọ gi olulu sị Jonatanị, “Ịyụ, nwatanị okpoho isi-ikẹn ẹnya rịlẹni ụzọ ohu mụ! A marịngụọ m nị y'a bangụọnị nwa Jese ọbụban hụn ifẹnrẹn e gi mẹgbu yụ lẹ ọtọ nnẹ i?!
31
Omẹni nwa Jese ahụn anwụnnị, onwọnni mgbe yụ lẹ alị eze i e gi turu. Zi wẹ nwan d'e wẹhẹni m'ẹ, makẹni o k'a nwụnrịrị!”
32
Jonatanị nọ sị nẹdi ẹ, “Kị wẹ k'e gbun'ẹ? K'o mẹ?”
33
Sọlụ nọ tụ Jonatanị obo ọnụ-nkọn n'o gbu ẹ. Ya kẹ Jonatanị nọ marịn nị ezioku-ezioku, nẹdi ẹ chọ n'o gbu Defidi.
34
Jonatanị nọ gi ọnụma gha ebẹhụ wẹ rị e ri ihiẹn-oriri pụ; o rini ihiẹn-oriri ụhụọhịn ahụn mẹ ẹ akpọhịn ẹbụọ imẹ ifọn, makẹni ihiẹn-ifẹnrẹn ahụn nẹdi ẹ mẹ Defidi gbu ẹ ẹhụ.
35
Eki e fọn ụtụntụn, Jonatanị nọ pụ, shi imẹ ugbo d'a hụn Defidi kẹ wẹ dọn ku. O jẹnkọ, ọ nọ weri nwata okẹnnyẹ ohu mẹ ẹkẹrẹ.
36
Ọ sị nwata hụ, “Gbama ọsọ, kẹni m gba ụta y'a chọha ọbara ndị m jẹnkọ d'a gba.” Hụn nwata ahụn gi gbama ọsọ, Jonatanị nọ gba ọbara ohu ghafe ẹ.
37
Mgbe nwata ahụn gi rumẹ ebe ọbara hụ rị, Jonatanị nọ kpọ chen'ẹ, sị, “Ọbara hụ rịkwọ ị ihun!”
38
Ọ nọ sịzị, “Jẹnkẹnrin! Ozigbo-ozigbo! Akụsịkwọlẹ!” Ya nwata hụ nọ tụtụrụ ọbara hụ, kinhẹn d'e kunrun di-nwọnn'ẹ.
39
(Nwata hụ amarịndẹ ihiẹn rị e mẹni: Jonatanị lẹ Defidi sụọ marịn.)
40
Jonatanị nọ bu ihiẹn-ọgụn a ye nwata hụ, sị a, “Lama; bu wẹ la imẹ obodo.”
41
Nwata hụ a lamagụ, Defidi nọ gha ụsụọ ọmụma hụ, ẹbamịn ndịdan-mirin ẹ, pụha, hulụanị Jonatanị isi mgbe ẹtọ. Wẹ nọ dide, kwanma ẹkwan; kanị Defidi ka a kwan.
42
Ya Jonatanị nọ sị Defidi, “Ijẹn ẹwẹrẹ; ẹnyi e kuntarịgụọ ẹfan Osolobuẹ, sị, ‘Osolobuẹ wụ ọshẹri nkwa rị ẹgbata mmẹ lẹ yụ lẹ ẹgbata ụmụ ị lẹ ụmụ m jẹnrin ejẹn.’ ” Ya Defidi nọ pụ, Jonatanị nkẹ nọ lakin imẹ obodo.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc