Neb niyns fãa sẽn dɩt-b pɛta, la sẽn da tar-b sama bɩ sẽn da namsd-ba la sũ-pa-noang rãmba, fãa tigma taab a Daviid nengẽ la a lebga bãmb naaba. Woto sẽn babs-ba a Daviid da ta kobs-naase.
A Daviid yii be n kẽng Mispa, Moab tẽn-peelmẽ. A tɩ yeela Moab dĩma: «Kõ-y m ba ne m ma sore, tɩ b wa zĩnd ne yãmba, n gũud m sẽn na n wa bãng Naaba-Wẽnd sẽn dat-m ne bũmb ninga.»
A Sol yeel-b lame: «Bẽnzame yagense, kelg-y ka! A Zese biigã na n pʋɩ yãmb fãa pʋt la bugsuntund wala m sẽn maand ne yãmba laa? Yaa Yãmb la a na n kõ tãnsobend tɩ y soog a tãb-biisa laa? M pa tẽed ye.
Bõe yĩng marsã la yãmb maand sudum, n dat n zab ne maam? Ned ba a ye ka saag n wilg-m tɩ m biiga Zonatã yõga zood ne a Daviid ye. Ned ba a ye ka wa yeel-m tɩ m gũus t'a tusda a Daviid t'a gãneg-m bẽdgo, wala m sẽn ne rũnna wã ye.»
Dĩma a Sol sẽn wʋme, a tʋmame tɩ b tall a Ayitub biiga, maan-kʋʋd a Ayimelɛk, n wa, ne a ba roog rãmba fãa la maan-kʋʋdba sẽn da be-b Nob. Bãmb fãa yik n wa saka naaba.
A Sol yeelame: «Bõe tɩ foo ne a Zese biiga naag taab n baood m yõore? Fo kõ-a-la rɩɩbo la sʋʋga, la f sok Naaba-Wẽnd a yĩnga, t'a yik marsã n na n zẽk a zug ne maam la a gãneg-m bẽdgo, wala sẽn maand dũnna wã.»
A Ayimelɛk leoka dĩma: «Yãmb sõgen-kamba fãa sʋka, ãnd n tõe n mak a meng ne a Daviid, pʋ-peelem soaba, naab rɛɛmba, sẽn ligind-b fo yõorã, tãnsoaba, la sẽn paamd waoor f meng zakẽ.
Ka rũnda bal la m sɩng n sokd Wẽnd a yĩng ye. Ade! M yam zãr ne m maan sudum ne yãmba. M naaba da rɩk yell ba a ye n dogl m zug la m ba roog zug ye, tɩ sɩda, m da ka tar yella buk ba bilf ye.»
La dĩma yeela a sõgen-kamba sẽn da yɛs a sɛɛgẽ: «Kʋ-y maan-kʋʋdbã, tɩ bãmb me sõngda a Daviid. B bãngame t'a Daviid da zoetame, la bãmb pa togs maam ye.» La naaba sõgen-kamba pa sak n zẽk b nug n kʋ maan-kʋʋdba ye.
Dẽ la dĩma yeel a Doeg: «Bɩ fo wẽnemde! Kʋ-ba!» La a Doeg, Edomitga, wẽnemdame la yaa yẽ n kʋ-ba. Badaare, a kʋʋ dap pis-nii la a nu, bãmb fãa da bobda Wẽnd bagra bag-teedã.
A Daviid yeela a Abiyatar: «Nin-daarẽ wã m da miime tɩ Edomitga, a Doeg, da bee d sʋka la a kõn pa n ka wilg a Sol ye. Maam n wẽnemd yellã n tees f ba roogo.