koteebe anyun Daudi Kamuktaindet ne Toroor koleenji, “Tos myee awo abar Philistichuuto?” Ak ki leenji `Kamuktaindet ne Toroor Daudi, “Ui ak ibar Philistiik ak isaru Keila.”
ki ngemwachi Saulo keleenji, “Kogonyo `Daudi Keila,” kole, “Kagonde Kamuktaindet ineendet eunnyu, amu kagegerchi oriit, amu ki wo nganaseet ne tinyei ormariichok ak temeleiywek.”
Tos indea piigap Keila eunnyi? Chorugei Saulo, ko uu ye kagogas otwogindeng'ung'? Ee, Kamuktaindet ne Toroor, Kamuktaindetap Israel, asoomin miising' ale, mwachi otwogindeng'ung'.” Kowol Kamuktaindet ne Toroor kole, “Chorugei.”
Ki ng'eet anyun Daudi kobooto piikyik che ki olo po pogol lo ak koba eng' Keila, koba oldo tugul ole ki imuuch koba. ki ngemwachi Saulo keleenji ki komwei Daudi eng' Keila, ko mata kwo.
Ki tebee `Daudi irimoik eng' surkwen ak ki tebee emetap tuloonook eng' surkwen ne po Ziph. Ki cheeng'ei `Saulo ineendet eng' peetuut age tugul, ago ma inde `Kamuktaindet ineendet eunnyi.
Ki leenji ineendet, “Meiywei, amu ma nyoorun eutap kwandanyu Saulo, ak iegu laitoryat eng' Israel, ak aegu ne rubin. Agot Saulo kwandanyu kongen nooto agine.”
Ki pa anyun `Sipik kotogosta ole mi Saulo eng' Gibea koba koleenji, “Tos ma unyegei Daudi eng' olinnyo eng' irimoik che mi timiin eng' tulweetap Hakila, ne mi murot tai ne po surkwen?
Ogeer anyun ak onai komoswek tugul ole ung'egei yeityo obwa kogeny yu ami oibu ng'aleek che po iman, si keebe tugul. Ngot komi emoni, acheeng'oti eng' eliphuusyek tugul che po Judah.”
Ki pa Saulo ak piikyik koba kocheeng' ineendet. Ak ki ngemwachi Daudi, kochoortagei anyun kwo ole mi rwandet, ak ki tebee surkwen ne po Maon. Kingo kas Saulo, kwo koosup Daudi eng' surkwen ne po Maon.
Ak ki pun Saulo tulweet komosi, ak ki pun Daudi ak piikyik tulweet komosin. Kichaakta Daudi komwei amu ki iywei Saulo, amu kiyiem `Saulo ak piikyik Daudi kobooto piikyik kole konam.