×

Ika Bible 2018

1 Samuẹlụ 24

1
Ogẹn Sọlụ gi ghagụ ebe o jẹn d'a chụ ndị Filistia kinhẹn, wẹ nọ sị a, “Defidi rị nwan atụ alị ọkpọ-nkụn Ẹn-Gẹdi.”
2
Ya Sọlụ nọ gha imẹ Izrẹlụ ile họrị madụ nnụ-uku ẹtọ (3,000), jẹnmẹ d'a chọ Defidi lẹ itu ẹ ihun “Ọmụma Ewu-ọfịa”.
3
Sọlụ e ru ebe wẹ nọ a zụn atụnrụn rị mkpẹnrẹn ụzọ ebẹhụ, ọ nọ kụye okporo ohu rị ebahụn d'a nyụn. Kanị okporo ohu nwẹn kẹ Defidi lẹ itu ẹ warị, imẹ-imẹ ẹ.
4
Ndị itu Defidi nọ sị Defidi, “Lee ẹ nwan! Tannị wụ ụhụọhịn ahụn Osolobuẹ gwa ị oku ẹ, sị, ‘M k'e bu eṅẹnrẹn i che i ẹka, n'ị hụn ụzọ mẹ ẹ k'ọ sụọ ị.’ ” Ya Defidi nọ gejẹn d'e beri ntịn-ẹwuru Sọlụ, bụ Sọlụ amarịn.
5
Omẹgụ, obi nọ gbumẹ Defidi mgbu n'o bepụ ntịn-ẹwuru Sọlụ.
6
Defidi nọ sị ndị ịya lẹ wẹ wị, “Osolobuẹ anịlẹ m mẹ nna m, onyẹ hụn Osolobuẹ tumẹ, ihiẹn nọ ẹrịra mọbụ gbu ẹ; makẹni onyẹ Osolobuẹ tumẹ k'ọ wụ.”
7
Oku ndịnị kẹ Defidi gi jụgbọ itu ẹ, ọ nịnị wẹ maye Sọlụ. Sọlụ e mẹmẹgụ, gha imẹ okporo hụ pụ, jẹnmẹ ebe o jẹnkọ.
8
Ya kẹ Defidi nkẹ nọ gha imẹ okporo hụ pụha, hịcheni Sọlụ, “Eze nwọnni m!” Ogẹn Sọlụ gi lee ẹnya azụụn, Defidi nọ hulụan'a alị, ye ẹ ọghọ.
9
O nọ sị Sọlụ, “Kị haịn i gi e gọn wẹ ntịn nị, ‘Defidi rị a chọ ị njọ’?
10
Y'e gigụọ nwan ẹnya ị hụn a tannị nị Osolobuẹ e te bugụọ ị che m ẹka imẹ okporo hụ. O te nwọngụọ ndị sị m gbu i, kanị egbuni m'i; m sị, ‘Egbukọ m nna m, makẹni onyẹ Osolobuẹ tumẹ rọ.’
11
Baba, lee ẹnya: ledẹ ntịn ẹwuru i rị m ẹka! Mmẹ beri ntịn ẹwuru i, kanị egbuni m'i. Gi nwan ọnwan ghọta, gi ẹ marịn, n'o nwọnni eje-ihiẹn mọbụ nnupụ-isi rị m ẹka. Emẹni m'i njọ, kanị ị chụkọ m nwan n'i gbu m.
12
“Osolobuẹ ya hannị mmẹ lẹ ịyụ eṅẹn. Osolobuẹ ya mẹgwarị ị eje-ihiẹn i mẹ m, kanị emẹtụkọ m'ị ẹka.
13
Ọ nọ nwan kẹ ndị akan dọn ku ẹ, ‘Imẹ ndị e mẹ eje-ihiẹn kẹ eje-ihiẹn gha a pụhasọnmẹ.’ Emẹtụkọ m'ị nwan ẹka.
14
“Onyẹ kẹ eze Izrẹlụ rịdẹ nwan a chụ ihiẹnni? Nkitẹ nwụnhụnnị? Ẹnwụn-nta?
15
Osolobuẹ ya hannị mmẹ lẹ ịyụ eṅẹn. Ya leban oku m ẹnya, kuni m ọnụ m; ya zụọpụha m ẹka ị gi ghọsị nị emẹni m'i njọ!”
16
Mgbe Defidi gi kugụ ihiẹnni, Sọlụ nọ sị, “Defidi nwa m, ịyụ rị e ku? Sọlụ nọ kwanma ẹkwan, kwanshi elu.”
17
Ọ nọ sị Defidi, “Ịyụ ka m ezi ịhịan e mẹ, makẹni y'e gigụọ mma kụ m njọ m.
18
Y'a gwagụọ m nwan ọhụnmanị i mẹni m, Osolobuẹ e te bugụọ m che i ẹka hụn nkẹ y'e gi gbu m, kanị y'e gbuni m.
19
Onyẹ hụn eṅẹnrẹn ẹ k'ọ danban a ẹka, n'ọ nị a la mmaka? Osolobuẹ ya gi ihiẹn rị mma kụ ị ụgwọ ihiẹn i mẹni m tannị.
20
A marịnghọ m nị ị k'a wụrịrị eze, nị alị-eze Izrẹlụ k'a nọ ẹka ị gha ihun.
21
Kunni m nwan Osolobuẹ nị y'e gbukọ ụmụ m mọbụ finchanpụ ẹfan m imẹ ikpụlọ nẹdi m.”
22
Ya Defidi nọ kunni Sọlụ Osolobuẹ. Sọlụ nọ lama, kanị Defidi lẹ itu ẹ nọ shizi ebe wẹ warị.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes