Nyaamdu am e ndiyam am e kusel ngel kirsumi, meksooɓe gaasa baali am keɓata ɗum. Kadi mi hoo'a ɗum, mi hokka ɗum yimɓe ɓe mi anndaa iwde muuɗum'en na?”
Useni, numtu ɗum, anndu no a hisnirta en. To a waawaay, nden kam sarru ukkanto jaagorɗo amin e saare maako fuu. A anndi o meereejo, o nanantaa koo moy.”
Law Abigayel hoo'i tamseeje teemeɗɗe ɗiɗi, kanyakanyaaji inaboojam ɗiɗi, baali kirsaaɗi jowi e gabbe ca'aaɗe deydey ko heewata buhu e tame inabooje joorɗe teemerre e tame ibbe joorɗe teemeɗɗe ɗiɗi. O rimdi ɗum fuu dow bamɗe.
Hiddeko ɓe potta, Daawuda numno: “Fakat, ko gorko oo mari nder ladde fuu, mi ayni ɗum meere. Walaa koo gootel majji. Ammaa kaŋko o warji mbooɗeeŋga am bee halleende.
Ɗum Jawmiraawo haɗi ma waataago aybe man e rufugo ƴiiƴam hannde. Fakat bana Jawmiraawo o geeto, an boo a geeto, konne'en ma e ɗaɓɓanɓe halkugo ma fuu ɓe hiiteteeɓe bana Nabal.
Yaafanam, aybewol am, barkaama. Mi anndi Jawmiraawo waɗete laamiiɗo fakat, o tabitinan laamu ma haa saare ma boo. Ngam a ɗon haɓana Jawmiraawo nder konuuji mum, balɗe ma fuu walaa mo heɓata aybingo ma dow koo ɗume.
To goɗɗo taasni ma, yiɗi mbarugo ma, Allah Jawmiraawo maaɗa aynan yoŋki ma kommbi maako. Ammaa yoŋkiiji konne'en ma, o sakkinan ɗi bana goɗɗo sakkinirta hayre bee piwlol.
Ammaa fakat bana Jawmiraawo o geeto, Allah Isra'iila mo haɗi yam waɗugo ma kalluɗum: To a yaawɗaayno fottugo bee am, walaa koo gooto nder worɓe Nabal luttanno hiddeko jaŋngo fajiri.”
Nde Daawuda nani haala maajum, o wi'i: “Yettoore laatano Jawmiraawo ngam o waɗani yam kiita, o gooŋɗini yam. O haɗi yam waɗugo aybe, ammaa o hiiti mo ngam o huɗi yam, o lorni halleende Nabal dow hoore muuɗum.” Nden Daawuda neldi muuyugo Abigayel, ngam haa o te'a mo.