Samuela chu a thi a, Israel mi zawng zawng chu amah sûn tûrin an lo kal khâwm a. Rama khuaa a in kiangah chuan an phûm a. Tin, Davida chu a tho va, Paran thlalêrah chuan a chhuk a.
Maon khuaah chuan mi pakhat a awm a, Karmel-ah ram a nei a, a hausa hle a ni. Kêl sângkhat leh berâm sângthum a nei a, Karmel tlângah chuan a berâm hmulte chu a mêt a.
Chu pa hming chu Nabala a ni a, a nupui hming chu Abigaili a ni. Chu hmeichhia chu a felin a hmêl a ṭha hle a, a pasal erawh chu mi kawm tak leh thinbutut nei a ni. Ani chu Kaleba thlah a ni a.
“Karmel tlânga Nabala hnênah chho ula, ka hmingin chibai bûk ang che u. ‘I chungah te, in chhûngkaw chungah te, i neih zawng zawng chungah te thlamuanna awm rawh se.
He laiah berâm hmul i mêt tih ka lo hria a, i berâmpute pawh kan zîngah an khawsa ṭhîn a, an pawi eng mah kan khawih ngai lo, Karmel tlânga an awm chhûngin an thil eng mah a bo ngai hek lo.
I hote zâwt la, an hrilh thei ang che. Chuvângin, ka hote hi lo khawngaih la, hei in ruai ṭheh ni takin an lo kal hi, i neih ang ang, i chhiahhlawhte leh i fapa Davida hi lo pe tûrin ka ngên a che,’ va ti rawh u,” a ti a.
Davida hote chu Nabala chuan a chhâng ta a, “Davida chu tu nge maw ni le: Jesaia fapa chu tu nge ni? Tûnlai hian chhiahhlawh pute tlân bosan an tam mai a.
Davida chuan a mite hnênah, “Khandaih pai ṭheuh rawh u,” a ti a. Tichuan, khandaih an pai ta sang sang a, Davida pawh chuan a khandaih a pai a, mi zali laiin an zui chho va, mi zahnih chu bungraw vêngin an awm a.
Chhiahhlawh pakhatin Nabala nupui Abigaili hnênah, “Ngai teh, Davida chuan thlalêr aṭangin kan pu chibai bûk tûrin mi a rawn tîr a, ani chuan a lo hau va.
Tûnah, he thil hi engtin nge i tih dâwn ngaihtuah teh; chutilo chu kan pu chungah leh a chhûngkaw chungah thil ṭha lo a thleng mai ang e; kan pu lah hi a sual khawp a, thu hrilh theih pawh a ni si lo,” a ti a.
Abigaili chuan hmanhmawh takin chhang tlang zahnih leh uain bûr hnih leh berâm panga, a hmin sa te, vaikan kg. sâwm leh pasarih leh grep pho ro bâwr te, theipui hlâwm zahnih nên a rawn la a, sabengtung a phurhtîr a.
Davida chuan, “He pa thil neih zawng zawng hi pakhat mah bo lovin thlalêrah khân a thlâwnin ka lo vênsak a nih hi le, a chunga ka ṭhatna hi thil ṭha lovin min rûl ta si a.
A ke bulah a kûn a, a hnênah, “Ka pu, keima thiam loh vâng chauh a ni e, a mawh chu ka phur ang. I chhiahhlawhnuin i hnêna ka ngen hi khawngaih takin min ngaihthlâksak ang che.
Ka pu, he mi sualpa thu hi ngaimawh suh, a hming Nabala a ni ang ngei hian mi â a nih hi, â takin thil a ti ṭhîn a ni, kei i chhiahhlawhnu hian ka pu mi tirhte ka lo hmu lo atin a ni.
Tûnah ka pu, Lalpa mi nung leh i hming chhâlin ka sawi e, “Thisen chhuah lo tûr leh phuba la lo tûrin Lalpa chuan a vêng che a, i hmêlma, i ṭhat lohna zawngtute chu Nabala ang hian awm rawh se.
i chhiahhlawhnu sualna hi khawngaih takin ngaidam ang che. Lalpa chuan ka pu lalna chu tinghet sela; ka pu hi Lalpa tâna do i ni si a, i dam chhûngin thil ṭha lo i tih hmuh tûr awm suh se.
Miten tihhlum tumin ûm che mah sela, ka pu nunna chu Lalpa i Pathian chuan vênghim tlat sela, i hmêlmate nunna erawh chu lungtê an perh bo daih ang hi ni rawh se.
Chhan awm lova thisen i chhuah ngai loh leh phuba i lâk ngai loh hi, ka pu, i inchhîr rêng rêng lo vang. Lalpan ka pu hi a tihhlawhtlin hunah i chhiahhlawhnu hi min hre reng ang che aw,” a ti a.
Tina lo tûr che ua min khaptu Israel-te Pathian Lalpa, mi nung hmingin ka sawi e. Nang chuan mi lo hmuak lo la chu Nabala leh a mite chu tu mah zuah lovin naktûk zîng khaw ên hmain thah vek ka lo tum asin,” a ti a.
Abigaili chu Nabala hnênah chuan a hâwng ta a, inah chuan ruai ropui tak an lo ṭheh a, Nabala chu a rui hle a, a lo ṭawng lûng lûng a. chuvângin, a tûk khawvâr hma chuan a hnênah eng mah a sawi lo.
Nabala thih thu Davidan a lo hriat chuan, “Nabalan min hmuhsitna phuba min lâksak a, thil sual ti lo tûra a chhiahhlawh min vêngtu Lalpa chu fakin awm sela, Lalpa chuan Nabala chu a thil tihdik loh avângin a tuartîr a nih hi,” a ti a. Davida chuan Abigaili chu a nupui atâna va be tûrin mi a tîr a.
Davida chhiahhlawhte chu Karmel tlângah Abigaili hnênah chuan an va kal a, a hnênah, “Davida chuan a nupui atân hruai tûr chein min tîr a ni,” an ti a.