Kong’eet anyun Saul kochortagei kwo ong’atetab Sip, komi ak murenik elfusiek somok che bo Israel che kigilewen, koba kocheng’at Daudi eng’ ong’atetab Sip.
Ak king’eet Daudi ak konyo ole kiga teech Saul: ak kigeer Daudi ole kirue Saul, koboto Abner weritab Ner, ne ki kiptaiyatab lugennyi: kirue Saul kwenutab karisiek, ak kiteech bik koyiem inendet.
Kiwol anyun Daudi ak kolenji Aimelek Hitindet, ak Abisai weritab Seruia, ng’etab kametab Joab, Ng’o ne nyonei kechortage tuwai ole mi Saul eng’ nganaset? Kole Abisai, Kichortoige tuwai.
Kiit anyun Daudi ak Abisai kemoi ole mi bik: ak ogeero, kirue Saul kwenutab karisiek, ko lumdaat ng’otinnyi eng’ ye negite metinnyi: ak kiruei Abner koboto bik ko kayiem inendet.
Ingolooit eng’ ane eng’ Jehovah si machuul eunnyu abar ne iilat ne bo Jehovah: ago asomin ale, ib ng’otit ne mi ye negite metinnyi, ak sotetab beek, ak kebe.
Kiib anyun Daudi ng’otit ak sotetab beek che kimi ye negite metitab Saul; ak kiba ama keer chi, anan konai, ama kos chi age tugul: amu kiruitos tugul; amu kiibutyi ichek ruondo ne nyigis ne kibunu Jehovah.
Ak kilenji Daudi Abner, Tos, ma i muren? Ng’o ne ogerge eng’ Israel? Amu nee anyun si merib kiptaiyandeng’ung’ laitoriat? Amu konyo chi eng’ bik konyo kobar lairtoriat kiptaiyandeng’ung’.
Ma mie kii koiyai. Ko u ye sobei Jehovah, konyoljinok obegu, amu ma orib kiptaiyandeng’wong’, ne iilat ne bo Jehovah. Ogeer anyun-o, ole mi ng’otitab laitoriat, ak sotetab beek ne komi ye negite metinnyi.
Noto anyun, asomin ale, ingogas kiptaiyandennyu laitoriat ng’alekab otwogindennyi. Ngot ko Jehovah ne kiing’eetin iyaiywa ne ya, ko ingotaach inendet kagochinet: ago ngot ko werikab bik, ko ingoek ichek che chubotin eng’ taitab Jehovah; amu kagoona ichek rani si ma kinamge ak bororietab Jehovah, kolen, Ui iot kanamonik.
Ara anyun, amat kotumjigei ng’ony korotikyuk ole looe ole mi Jehovah amu kanyo laitoriatab Israel kocheng’ kimitiat, ko u ye cheng’ei chito taiywet eng’ tulonok.
Kole anyun Saul, Kaayai tengekto: weeige werinnyu Daudi: amu ma ayaun kiy ne ya kogeny, amu kabunji kamanut ne o rani sobondanyu eng’ taing’ung’: keero, kaayai berberindo, ak kaalel mising’.
Ak kogeny, keero, katinyei rani sobondang’ung’ kamanutiet ne o eng’ tainnyu, ko u noto ingosich agine sobondanyu kamanutiet ne o eng’ taitab Jehovah, ak ingosorua inendet eng’ nyalilda tugul.