O David mislila gia: Fisavo llive o Saul ka mundarel man, goleke mai sukar te llautar ande phuv katar e filisteura, gia o Saul ka mukel man ta ni ka rodel man ios ando Israel ta gia ka nasav letar.
Ta o David ta leke llene zivisarde ando Gat e charoia o Akis suako lleno pe familiaia, ta o David zivisarda pe duie diskinienchar, e Ajinoam katar e phuv Jezreel ta e Abigail kai saia e rromi e Nabaleki katar o Karmel.
Ta o David phenda e Akiseke: Te mangea glamno charo te chere mange lachipe, me moliv man chuke te muke man te ziviv ande iek foro katar e phuv, soke inai sukar te ziviv tuia ande gava foro kai si katar e charoina.
Ta o David likela pe llenenchar te marelpe e llenenchar katar o Gesur, Gezer ta Amalek kai cherela but vreme kai zivina ande goia phuv katar o Telaim, po drom kai llal ando foro Chur llik kai o Ejipto.
O David zatrila sa goia phuv ta ni mukela llundo murusen ni diskinien. Lela e bakren, e guruven, e magarchen, e deven ta i e patave. Mapalal irilape kai o Akis,
ta o Akis puchela le: ¿Kai llelana allive? Ta o David phenela leke: Ando Negev katar o Juda, ando Negev katar o Jerameel ta ando Negev katar e kenitura.
O David ni mukela llundo ni murusen ni diskinien, gia te na llal niko ando foro o Gat te phenen kai vou saia gua kai cherela sa gala ezgode. Ta gia cherda o David sa o vreme kai achilo ande phuv katar e filisteura.