現代台語譯本漢字版
|
| 1 |
| 過無偌久, 非利士 人召集軍隊欲攻擊 以色列 人。 亞吉 王對 大闢 講:「你應該知,你及你的部下著及我鬥陣作戰。」 |
| 2 |
| 大闢 應講:「無問題,我是你的奴僕,你知我會為著你做什麼。」 亞吉 王給 大闢 講:「按呢,我欲派你做我終身的侍衛。」 |
| 3 |
| 彼時 撒母耳 已經死,所有的 以色列 人為著伊哀哭,給伊埋葬佇伊的故鄉 拉瑪 。 掃羅 曾將尪姨及行邪術的攏趕出國境。 |
| 4 |
| 非利士 人聚集,行軍到 書念 紮營; 掃羅 聚集所有的 以色列 人佇 基利波 紮營。 |
| 5 |
| 掃羅 看著 非利士 的軍兵,就真驚,心肝噗噗筅。 |
| 6 |
| 掃羅 問上主;上主攏無用眠夢,無用烏陵 ,抑是先知,給伊應答。 |
| 7 |
| 掃羅 吩咐伊的僕人講:「給我尋一個尪姨,我通去問伊。」 僕人講:「佇 隱‧多珥 有一個尪姨。」 |
| 8 |
| 掃羅 就變裝,穿別款衫;導兩個人及伊做夥去。佇暝時𪜶去彼個尪姨遐。 掃羅 給伊講:「請你用牽亡的法術,牽我給你講彼個人出來。」 |
| 9 |
| 尪姨對伊講:「你知 掃羅 的所做;伊有給尪姨及行邪術的攏趕出國境 ;你是按怎設計欲害我的性命?」 |
| 10 |
| 掃羅 指上主對伊咒誓,講:「我指永活的上主咒誓,你𣍐因為此個代誌受刑罰。」 |
| 11 |
| 尪姨講:「你愛我給你牽啥人出來?」 伊講:「給我請 撒母耳 出來。」 |
| 12 |
| 尪姨看著 撒母耳 就大聲吱出來,給 掃羅 講:「你是按怎騙我?你是 掃羅 !」 |
| 13 |
| 王對伊講:「免驚,你看見什麼?」 尪姨給 掃羅 講:「我看著神魂對地裡出來。」 |
| 14 |
| 掃羅 講:「伊生做啥款?」 尪姨講:「有一個老人出來,身軀幔長衫。」 掃羅 知是 撒母耳 ,就仆佇土腳給伊拜。 |
| 15 |
| 撒母耳 給 掃羅 講:「你是按怎攪擾我,牽我出來?」 掃羅 講:「我非常痛苦,因為 非利士 人來攻擊我,上帝嘛離開我,無閣通過先知抑是眠夢應答我。所以我請你來,通指示我著按怎做。」 |
| 16 |
| 撒母耳 講:「上主已經離開你,做你的對敵;你哪著問我? |
| 17 |
| 上主會照伊交代我對你講的實現;伊已經將你的王權剝起來交互你的同伴 大闢 。 |
| 18 |
| 因為你違背上主的話,無將 亞瑪力 人及𪜶所有的攏消滅,所以上主今仔日對你做此個代誌。 |
| 19 |
| 上主欲將你及 以色列 交佇 非利士 人的手。明仔載你及你的子兒會及我做夥;上主嘛欲將 以色列 的軍隊交佇 非利士 人的手。」 |
| 20 |
| 掃羅 因為 撒母耳 的話非常驚惶,隨時倒落去,倒甲直直直;歸暝歸日無食半項,身軀攏無力。 |
| 21 |
| 彼個尪姨行倚去 掃羅 遐,看著伊赫呢驚惶,就對伊講:「你的女婢聽你的話,無顧家己的性命,有照你的要求去做。 |
| 22 |
| 今,請你聽女婢的話,允准我款淡薄物件互你食,你才有氣力上路。」 |
| 23 |
| 掃羅 拒絕,講:「我毋食。」毋拘伊的僕人及尪姨給伊好嘴苦勸,伊才聽𪜶的話,對土腳起來,坐佇眠床。 |
| 24 |
| 尪姨趕緊牽厝裡彼隻肥牛仔去刣,閣抄麵粉,烘無酵餅, |
| 25 |
| 排佇 掃羅 及伊的僕人面前,𪜶就食。彼暝𪜶起身倒去。 |
| 保存笔记 |
https://beblia.bible:81/BibleAudio/chinesettvh/1samuel/028.mp3
31
28